Sal 96
96
Ri Dios kan xaxe rija' ri rey
1Kan keqabixaj k'ak'a' taq bix chire ri Jehová.
Tiqabixaj rubi' rija' qonojel winaqi' richin chijun ruwach'ulew.
2Tiqaya' ri qabix chire, y tiqanimirisaj ri rubi'.
Kan q'ij-q'ij k'a tiqataluj rubixik ri kolotajik ri nuya' rija'.
3Tiqach'abalij ri ruwaq'ijaj richin rija', chikikojol ri tzobaj winaqi' richin ri ruwach'ulew.
Tiqatzijoj chupan ronojel tinamit ri nima'q taq banobel ri yeruben.
4Roma ri Jehová kan janila nim, y kan ruk'amon richin niqanimirisaj ruq'ij.
Kan xaxe wi rija' ri ruk'amon chi niqaya' ruq'ij chikiwech ri ch'aqa' chik dios.
5Roma ri ki-dios ri ch'aqa' chik tinamit xa e wachibel.
Jak'a ri Jehová kan ja rija' xbanon ri kaj.
6Ri chuwech rija' kan xaxe k'a ruwaq'ijaj k'o.
Uchuq'a' y k'ojlemal k'o pa rachoch.
7Tiqak'ama-pe bix chire ri Jehová qonojel roj:
Achijlonela', ixjayilonela' y alk'ualaxela' richin chijun ruwach'ulew.
Kan tiqaya' k'a rejqalen ri ruk'ojlemal y ri ruchuq'a' ri Jehová.
8Kan tiqaya' k'a ruq'ij achi'el ri ruk'amon chire rija'.
Tiqak'amala-pe sipanik chuwa-jay chire ri rachoch rija'.
9Tiqaqasaj-qi' chuwech ri Jehová chupan ri rachoch.
Kan qonojel k'a ri ojk'o chuwech ri ruwach'ulew tik'oje' ruq'ij-ruk'ojlen ri Jehová chiqawech.
10Tiqabij k'a chike ri winaqi' ri man nikitzeqelibej ta ri Jehová chi ja rija' ri niq'aton-tzij.
Ja rija' ri xjikiban ri ruwach'ulew y kan man jun xtisilon richin.
Kan ja rija' ri xtiq'aton-tzij pa qawi' rik'in ruchojmilal.
11Kan tikikot k'a ri kaj y ri ruwach'ulew.
Tiwajin k'a ri palou y ronojel ri ek'o chupan.
12Kekikot k'a ri juyu' y ronojel ri ek'o chuwech.
Ronojel ri liaj taq che' kan kejumum roma kikoten.
13Ronojel k'a re' tiqabana' chuwech ri Jehová ri xtipe.
Kan xtipe k'a richin noruq'ata-tzij pa ruwi' ri ruwach'ulew.
Rik'in k'a ruchojmilal xtuq'et-tzij pa qawi' qonojel ri ojk'o chuwech re ruwach'ulew.
Xtuq'et-tzij pa kiwi' ri tinamit rik'in ri ruch'abel rija'.
Currently Selected:
Sal 96: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
