Sal 94
94
Ri Jehová jari' ri To'onel
1Nimalej Jehová, ri yaya'on rutojbalil ronojel ri mak,
kan tak'utu' k'a awi' rat richin naya' rutojbalil-mak.
2Rat ri yachojmirisan ronojel ri nibanatej chuwech chijun ri ruwach'ulew.
Kayakatej k'a y tataqa-pe ri awoyowal pa kiwi' ri kinimirisan-ki'.
3Nimalej Jehová, ¿kan jantape' kami xkekikot ri winaqi' ri maneq awejqalen chikiwech?
¿K'a janipe' k'a ri'?
4¿K'a janipe' kami xketane' richin nikibila' poqon taq ch'abel?
¿Kan jantape' kami xtikinimirisaj-ki' re e banoy taq etzelal?
5Re winaqi' re' kan janila k'a poqon nikiben chiqe roj ri oj atinamit rat.
Kan yojkitz'ila' k'a roj ri xojacha' rat.
6Kan yekikamisaj k'a ri malkani' y ri winaqi' man e qawinaq ta.
Yekikamisaj k'a chuqa' ri meba'i' roma kan man yetikir ta nikito-ki'.
7Ri itzel taq winaqi' nikibij-qa chi ronojel re' kan man xtatz'et ta rat.
Nikibij chi rat xa kan man xtawak'axaj ta k'a.
8Rix ri man jun iwetaman, kan tiq'ax k'a chiwech.
Rix ri kan man jun ina'oj, ¿k'a janipe' k'a xkixok aj-na'oj?
9Ri xbanon ri ak'axabel, ¿kan man nak'ex ta kami rija'?
Ri xbanon ri wachaj, ¿kan man nitzu'un ta kami rija'?
10Ri niya'on ri rutojbalil-mak pa kiwi' ri tinamit,
¿man nich'olin ta kami?
¿Kan man jun kami retaman ri nitijon richin jun wineq?
11Ri Jehová kan retaman k'a ri ich'obonik.
Retaman chi ri ich'obonik xa man jun rejqalen.
12Jebel ruwa-ruq'ij ri wineq ri nachojmirisaj ri ruk'aslen rat Jehová,
ri kan natijoj rik'in ri apixa' rat,
13richin chi nuxlan chupan ri q'ij richin tijoj-poqonal,
rokik ri e banoy etzelal kan nik'ot jul richin yemuq.
14Rat Jehová kan man xqojamalij ta k'a kan roj ri oj atinamit.
Kan man xqojamalaba' ta kan roj ri xojacha' richin xojok awichin.
15Rat kan xtaben k'a chi ri ruchojmilal xtapon chik chupan ri q'atbel-tzij.
Kan jari' ri xtikikanoj ri winaqi' choj kik'aslen.
16¿Achike k'a xkito'on yin chikiwech ri e banoy etzelal?
¿Achike k'a xtito'on wichin chikiwech ri itzel taq winaqi'?
17Wi rat Jehová man ta xinato',
yin xa kan xiken yan ta ri'.
18Toq yin xa kan yijilijo' yan, y xich'on awik'in,
jari' k'a toq rat Jehová xinato' chi'anin rik'in ri awajowabal ri man k'isel ta.
19Toq yin janila yiququt roma ri ruk'ayewal ri ninq'axaj,
jari' toq rat Jehová nakuquba' nuk'u'x y naya' kikoten pa wánima.
20Rat kan man yeqa' ta k'a chawech ri man pa ruchojmilal ta yeq'aton-tzij.
Ri kan nikiq'ej ruwi' ri pixa' xaxe richin man nikiq'et ta tzij pa ruchojmilal.
21Ri winaqi' ri' xa kan nikimol k'a ki' richin nikelesaj ri ruk'aslen ri utzilej wineq.
Nikiben k'a chire ri maneq rumak, chi nutoj rumak.
22Jak'a yin kan ja rat Jehová ri at nutobal.
Ja rat ri at nu-Dios richin ri nukolotajik.
23Rat Jehová kan xtaben k'a chi ri kimak ri e banoy taq etzelal kan xtikejqalej rije'.
Kan xke'ak'is k'a chupan ri kimak.
Kan jak'a rat Jehová ri at qa-Dios ri xkabanon keri' chike ri winaqi' ri'.
Currently Selected:
Sal 94: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
