Sal 88
88
Ruch'owen jun ri k'o chik chuwi' kamik*f90*
1Nimalej Jehová, ja rat ri at nukolonel,
chi paq'ij chi chaq'a' yisik'in awik'in richin yinato'.
2¡Kan ta xtapon ri nuch'owen chawech rat!
¡tabana' utzil taya' axikin chire ri nuch'abel!
3Roma yin kan xik'o yan nuk'u'x chire re q'axo'n re ninq'axaj,
ri nuk'aslen xa kan naqaj chik k'o chire ri kamik.
4Yin xa kan ruk'amon chik chi yinajilex chikikojol ri kaminaqi'.
Xa kan in lawalik chik k'a jumul.
5Ninna' yin chi kan achi'el in malin chik kan chikikojol ri kaminaqi',
achi'el ri xekamisex rik'in espada, ri ek'o chik pa jul muqbel kamineq.
In achi'el ri kan man ye'oqaqa ta chik chi'ak'u'x,
y xe'elesex yan el pan aq'a'.
6In aya'on k'a chupan jun jul ri kan janila nej qajineq,
chupan q'equ'm ri kan nej beneq-wi.
7Ri awoyowal kan janila nim qajineq pa nuwi',
yin kan maneq chik k'a wuchuq'a' roma ri awoyowal.
8Kan xe'ajech'ej k'a el chuwe yin ri winaqi' ri más ketaman nuwech;
xaben k'a chuwe chi itzel chik yinkitz'et;
wakami kan in tz'apel k'a pa jay, y man yitikir ta yinel-el.
9Ri runaq'-nuwech kan xeq'equmatej yan k'a roma ri q'axo'n.
Kan ronojel k'a q'ij at woyon, nimalej Jehová;
kan chawech k'a rat nuyakon-q'anej ri nuq'a' richin yich'on awik'in.
10Rat man ye'aben ta meyel taq banobel chikikojol ri kaminaqi';
ri kaminaqi' man xkeyakatej ta chik pe richin nikiya' aq'ij.
11Ri awajowabal man jun bey xtinatex chupan ri jul muqbel kamineq;
chupan ri jul ri' man ninatex ta chik chi rat man yojamalij ta kan.
12Chiri' akuchi janila q'equ'm kan man jun bey nitz'etetej ri meyel taq abanobal;
ni man ninatex ta ri ruchojmilal ri naben rat, chupan ri jul akuchi ri xa nimestex ronojel.
13Jak'a yin kan awik'in k'a rat nimalej Jehová in ch'owineq-wi,
ronojel k'a nimaq'a' napon-q'anej ri nuch'owen chawech rat.
14¿Achike k'a roma yinawixowaj yin?
¿Achike roma man yinatzu' ta pe?
15Kan ja yan ri pa nuk'ajolil in k'ayewatajineq-pe y kan in apowineq chuwi' kamik,
janila k'a k'iy mul abanon chuwe chi nintej poqon y wakami man ninkoch' ta chik.
16K'iy k'a mul yakatajineq awoyowal chuwij,
y kan yijitz'atej roma xibinri'il.
17Kan achi'el nuben ri ya' ri nibusku'l, keri' xuben ri awoyowal chuwij,
y wakami kan ink'o pa latz'.
18Xe'ach'er k'a el chuwe yin ri kan ketaman nuwech,
y ri wachibil wakami, xa kan ja ri q'equ'm.
Currently Selected:
Sal 88: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
