Sal 86
86
Bix richin to'onik*f87*
1Jehová, tabana' utzil taya' axikin chuwe y kinawak'axaj,
yin kan in poqonatajineq, y k'o k'atzinel chuwe.
2Tabana' chuwe chi man jani yiken,
roma yin kan man at numalin ta kan.
Kinakolo' k'a roma nukuquban nuk'u'x awik'in.
3Tajoyowaj nuwech yin, nimalej Jehová, roma yin kan chijun q'ij k'a yatinwoyoj.
4Tabana' chi yikikot yin ri in asamajel,
y ri nuch'owen kan choj ta nibe-q'anej awik'in rat.
5Roma rat ajaw kan janila at utz y at kuyunel,
ri awajowabal man jun bey nik'is kik'in ri yekanon awichin.
6Nimalej Jehová, tabana' utzil tawak'axaj ri nuch'owen,
kan tik'oje' chi'ak'u'x ri nuk'utunik ri ninben chawe.
7Chupan ri q'ij richin q'axo'n, kan yich'on awik'in,
roma wetaman chi rat kan nak'uluba-pe ri nuch'abel.
8Nimalej ajaw, ¡kan man jun chik k'a k'o achi'el rat chikikojol ri ch'aqa' chik dios!
Ri asamaj rat kan man jun chik achoq ik'in ta xtijunamex-wi.
9Konojel tzobaj winaqi' ri xe'aben,
xkepe chawech y xtikiya' aq'ij rat ajaw.
¡Kan xtikinimirisaj k'a ri abi'!
10Roma rat kan janila at nim,
y kan ye'abanala' nima'q taq banobel.
¡Kan xaxe rat ri at Dios!
11Nimalej Jehová, tabana' utzil tak'utu' chinuwech ri abey,
y yin kan man xtinmalij ta kan ri bey ri';
tajikiba' ri wánima richin chi nik'oje' akiy chinuwech.
12Kan rik'in ronojel wánima xtinbixaj ri abi' Jehová, nu-Dios yin.
Kan xtinnimirisaj k'a aq'ij tibe-q'ij tibe-seq.
13Roma ri ajoyowanik rat kan janila nim pa nuwi' yin,
kan in akolon chuwech ri muqbel kamineq.
14Ri winaqi' ri kan janila e nima'q nikina-ki' kan e yakatajineq k'a chuwij,
ri e itzel taq winaqi' kan kiya'on k'a chikiwech chi yinkikamisaj;
rije' kan man yatkik'ulubej ta rat chire ri nikiben.
15Jak'a rat ajaw kan at Dios joyowanel y koch'onel,
man chi'anin ta k'a nipe awoyowal y ri awajowabal kan man jun bey xtik'is
y rat man jun bey yojamalij kan.
16Kinatzu' y tajoyowaj nuwech,
taya' wuchuq'a' y kinakolo' yin ri in asamajel;
yin ri in ral kan ri xok chuqa' asamajel.
17Taya' k'a jun retal ri awutzil pa nuwi',
tikitz'eta' ri e etzelanel wichin y kek'ixbitej,
roma rat Jehová kan xinato' y xakuquba' nuk'u'x.
Currently Selected:
Sal 86: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
