Sal 84
84
Rayibel pa ruwi' ri rachoch ri Dios*f84*
1¡Jehová k'iytisanel richin ronojel,
ri awachoch kan janila jebel!
2Ri wánima kan nurayibej chi nik'oje' ta pa ruwa-jay chire ri awachoch.
Rik'in ronojel wánima, ninya' aq'ij rat k'aslik Dios.
Ninbixaj rik'in kikoten.
3Chupan ri tz'aq richin ri awachoch rat Jehová nu-Dios yin,
kan jajun ri ti tz'unun y ri ti buqul-sib nikiben kisok chiri'.
Rije' yekichajij ri taq kal chunaqaj ri aporobal,
Jehová k'iytisanel richin ronojel.
4Jebel ruwa-kiq'ij ri ek'o pan awachoch,
ri kan jantape' nikiya' aq'ij.
5Jebel ruwa-kiq'ij ri kan nikil kuchuq'a' awik'in rat,
roma kan rik'in ronojel kánima yebe pa juyu' Sión.
6Stape' ri bey niq'ax chupan ri taq'aj richin Oq'ej,*f85* akuchi janila chaqi'j,
jak'a rat kan naben chi yetz'ukutej-pe ralaxbel taq ya' chiri'.
Chuqa' nateq-pe pa ruwi', ri nabey taq job pa ruk'iyal.
7Y ri kuchuq'a' kan nik'iyer rokik yeq'ax chupan ri bey ri'.
Y pa ruk'isibel chire ri kibinen, yatkitz'et rat chiri' pa juyu' Sión.
8Jehová Dios k'iytisanel richin ronojel,
tabana' utzil tawak'axaj ri nuch'owen.
Kinawak'axaj k'a nimalej qa-Dios roj israelita.
9Tabana' utzil tatzu' rat ri at qatobal,
taya' urtisanik pa ruwi' ri qa-rey.
10Kan más k'a rejqalen ri jun q'ij ri yik'oje' chupan ri awachoch,
ke chuwech yik'oje' 1,000 q'ij juk'an chik.
Más utz chi stape' xa chuchi-ok ri awachoch yipa'e-wi,
ke chuwech yik'ase' pa rachoch jun wineq ri banoy etzelal.
11Roma rat Jehová Dios, kan ja rat yasaqirisan ri qabey, y yojachajij;
kan naya' ri utzil y ruwaq'ijaj chike ri yebiyin choj chawech rat,
y kan man nawelesaj ta k'a ri awutzil pa kiwi'.
12Jehová k'iytisanel richin ronojel,
jebel ruwa-kiq'ij ri winaqi' ri kikuquban kik'u'x awik'in.
Currently Selected:
Sal 84: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
