Sal 80
80
Jun k'utunik richin rutzil ri Dios*f79*
1Tawak'axaj ri qach'owen, rat nimalej Jehová ri yachajin ri tinamit Israel.
Qojachajij k'a, achi'el nuben jun yuq'unel kik'in ri taq rukarne'l.
Rat ri atk'o pa kiwi' ri kiwachibel ri querubín,*f80*
2Tak'utu' ri awuchuq'a' chikiwech ri aj-Efraín, ri aj-Benjamín y ri aj-Manasés,
katanpe richin yojakol.
3Nimalej Dios tabana' utzil, tabana' chik qik'in achi'el ri abanon-pe.
Taya' ri awutzil pa qawi', y qojakolo'.
4Jehová, Dios k'iytisanel richin ronojel,
¿K'a janipe' k'a nik'o-qa ri awoyowal chirij ri qach'owen?
5Xaben chiqe chi ri qoq'ej achi'el xa ta jari' ri qaway,
ri ruya'al runaq' taq qawech achi'el xa ta qaya' ri niqaqum pa ruk'iyal.
6Xaya' q'ij chi yojkiyojobej ri winaqi' ri ek'o chiqanaqaj,
ri e etzelanel qichin kan yetze'en chiqij.
7Nimalej Dios k'iytisanel richin ronojel,
tabana' utzil tabana' chik qik'in achi'el ri abanon-pe.
Taya' ri awutzil pa qawi' richin yojakol.
8Rat xe'awelesaj-pe ri qati't-qamama' pan Egipto y xe'ak'en-pe wawe';
K'ari' xe'awelesaj-el ri winaqi' ri kan ek'o wawe', richin xe'ajikiba' kan.
9Xachojmirisaj ri akuchi xek'oje-wi, y xe'ajikiba' jebel;
rije' kan xek'iyer k'a chuwech ri ruwach'ulew k'a re wakami.
10Y keri' kan xkinojisaj-q'anej ruwech chijun ri ruwach'ulew,
y xe'apon k'a akuchi e tikil-wi ri tiox-che' ri ek'o pa Líbano.
11Ek'o chuqa' xebek'oje' k'a chuchi' ri palou,
y xe'apon k'a chuchi' ri raqen-ya' Éufrates.
12¿Achike roma xaya' q'ij chi ri e etzelanel qichin xe'ok-pe,
y wakami xa nuk'uex-el ronojel ri k'o qik'in?
13Rije' xa e achi'el juyubel aq ri xa nikikich rupan ri qaruwach'ulew;
e achi'el ri k'uxunela' taq chikopi' ri xa xe'ok chupan richin xkik'is-el ronojel.
14Nimalej Dios k'iytisanel richin ronojel, katzolej chik k'a pe wakami.
Katzu'un k'a pe chila' chikaj richin tach'obo' rij, y katanpe richin yojakol.
15Katanpe richin yojakol roj ri kan oj achi'el tiko'n ri ja rat xatiko-qa,
ri kan xajikiba' chi kan awichin rat.
16Ri qaruwach'ulew xa kan xya'ox k'a ruq'aq'al, y tolan chik rubanon,
roma ri' rik'in ri awoyowal ke'ak'isa' ri winaqi' ri xeya'on ruq'aq'al.
17Jak'a kan taya' ri awutzil pa qawi' roj, roj ri xojajikiba' rik'in ri awijkiq'a',
roma ja rat xatikeriban-q'anej qichin.
18Roj kan man xtiqach'er ta chik kan qi' awik'in rat;
taya' chik qak'aslen, y roj kan jantape' xqojch'on awik'in.
19Nimalej Dios tabana' utzil, tabana' chik qik'in achi'el ri abanon-pe.
Taya' ri awutzil pa qawi', y qojakolo'.
Currently Selected:
Sal 80: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
