Sal 79
79
Bis roma xwulex ri tinamit Jerusalem*f78*
1Nimalej Dios, ri winaqi' ri man yatkitzeqelibej ta xepe wawe' chupan re aruwach'ulew.
Xepe y xkiqasaj ruq'ij ri awachoch.
Y kan xkiwulaj kan jumul ri tinamit Jerusalem.
2Ri kich'akul ri asamajela' xkiya' chikiwech ri aj-xik' taq chikopi' richin xok kiway.
Kan chikiwech k'a ri k'uxunela' taq chikopi' xkiya-wi ri kich'akul rije'.
3Xkiben k'a chi ri kikik'el xbiyin chuchi' ri Jerusalem, achi'el nibiyin ri ya',
y kan man jun chik k'a ri xmuqun ta kichin.
4Kan yojkiyojobej ri ek'o chiqanaqaj.
Ri ch'aqa' chik ruwach'ulew yetze'en chiqij.
5Jehová, ¿kan jantape' ta k'a xtik'oje' ri awoyowal pa qawi'?
¿K'a janipe' xtitane' ri awoyowal richin nik'a'on achi'el nuben ri q'aq'?
6Taya' k'a ri awoyowal pa kiwi' ri winaqi' ri man yatkitzeqelibej ta,
pa kiwi' ri ruwach'ulew ri man yatkinataj ta.
7Roma rije' kan xekik'is k'a ri qawinaq israelita,
y kan xekiwulaj kan ri kachoch.
8Man tanataj pa qawi' roj ri itzel taq kibanobal ri qati't-qamama'.
Tabana' utzil taya-pe chi'anin ri ajoyowanik pa qawi',
roma roj kan man niqakoch' ta chik re niqak'owisaj.
9Nimalej Dios ri at qakolotajik roj.
Tabana' utzil qojato' roma ri ruk'ojlemal ri abi'.
Qojakolo' y takuyu' ri qamak roma ri nimalej abi'.
10Roma ri winaqi' ri man yatkitzeqelibej ta nikibij-pe:
¿Akuchi k'a k'o-wi ri i-Dios?, yecha'.
Niqajo' chi rat naya' ruk'ayewal pa kiwi' ri winaqi' ri',
roma xkiben chi xbiyin kikik'el ri qawinaq ri e asamajela'.
11Tabana' utzil tawak'axaj ri kijiloj ri ek'o pa ximonri'il.
Rik'in ri nimalej awuchuq'a', ke'ato' richin man ye'apon ta pa kamik.
12Nimalej Jehová, taya' pa kiwi' ri winaqi' ri ek'o chiqanaqaj wuqu' mul rutojbalil.
Taya' rutojbalil roma xatkiyojobej.
13K'ari' roj, ri oj atinamit rat, ri oj achi'el akarne'l richin ri aqejoj,
kan jantape' k'a xtiqaya' aq'ij.
Y chi wiq chi tanaj xtiqanimirisaj ri aq'ij.
Currently Selected:
Sal 79: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
