Sal 74
74
Ch'owen richin nikolotej ri tinamit.*f71*
1Nimalej Dios, ¿achike roma oj amalin kan jumul?
¿Achike roma kan yakatajineq awoyowal chiqij roj ri oj achi'el akarne'l richin ri aqejoj?
2Toqaqa chi'ak'u'x ri tzobaj winaqi' ri xacha' rat ri ojer kan,
ri xakol-pe, richin chi xojok awichin rat,
Toqaqa chi'ak'u'x ri juyu' Sión ri akuchi xak'oje-wi.
3Katanpe richin no'atz'eta' re jantape' wulatejineq.
To'atz'eta' ronojel ri itzel ri xkiben ri e etzelanel qichin rik'in ri awachoch.
4Ri e etzelanel awichin rat kan yesik'in k'a chupan ri awachoch,
Kan kiya'on k'a retal richin nikik'ut chi xech'akon.
5-6Rije' kan rik'in k'a ikej xekiwulaj ri wiqobel ri ek'o chupan ri awachoch.
Kan e achi'el k'a ri e choyoy che' chupan ri k'echelaj.
7Kan xkiya' k'a ruq'aq'al ri awachoch;
xkiqasaj ruq'ij ri awachoch ri akuchi ninimirisex-wi ri abi',
y xkiben chire chi man jun rejqalen.
8Kan xkiya' k'a chikiwech richin yojkik'is jumul.
Xekiporoj k'a ronojel jay ri akuchi niqamol-wi-qi' richin niqaya' aq'ij.
9Kan man jun chik xk'oje' kan chire ri xek'atzin chupan ri awachoch.
Kan xek'is k'a ri e q'alajirisey ach'abel.
Ni ta re chiqakojol roj kan man jun k'a etamayon k'a janipe' nibetane' ronojel re'.
10Nimalej Dios, ¿k'a janipe' kami xtitane' chiqij ri yojya'on pa q'axo'n?
¿Chaq xtuyoq' ta k'a ri abi' ri etzelanel awichin richin q'asen?
11¿Achike roma man jun naben chike?
¿Achike roma chaq aq'eten aq'a' chiri', y man jun naben chike?
12Qa-Dios roj, kan ja rat ri at qa-rey ojer-pe ri'.
Ja rat ri xaya'on-pe ri ch'akonik pa ruwi' ri qaruwach'ulew.
13Xach'er k'a rupan ri palou rik'in ri awuchuq'a'.
Kan xapaxij k'a kijolon ri nima'q taq chikopi' ri ek'o chupan ri ya'*f72*.
14Xapitz' k'a ri rujolon ri nimalej chikop,
y xaben k'a chire chi xok kiway ri chikopi' ri ek'o pa tz'iran ruwach'ulew.
15Xe'ajeq k'a ri ralaxbel taq ya' y ri ch'uti'n raqen taq ya',
y xachaqirisaj k'a rupan ri nima'q taq raqen-ya'.
16Ja rat xabanon ri q'ij y ri aq'a',
rat xe'ajikiba' ri ik' y ri q'ij.
17Ja rat xaya'on ri ruk'ulba't ri ruwach'ulew.
Ri saq'ij y ri job ja rat xachojmirisan.
18Toqaqa k'a chi'ak'u'x chi ri e etzelanel kan kiya'on ak'ix rat Jehová.
Chuqa' ri e nakaneq taq winaqi' xa yatkiyoq' k'a rat.
19Roj ri oj achi'el jun ti paloma man qojajech pa kiq'a' ri itzel taq winaqi'.
Man qojamestaj kan roj y qojato' pa kiq'a' rije'.
20Toqaqa chi'ak'u'x ri jikibel-tzij ri abanon qik'in,
roma pa taq latz' bey ek'o ri kamisanela'.
21Man taya' q'ij chi yek'ixbitej ri winaqi' ri yetz'ilox.
Kan ta k'a xtikiya' aq'ij ri e k'ayewatajineq y ri kan man jun ok k'o kik'in.
22Kayakatej k'a nu-Dios, y tato-awi'.
toqaqa chi'ak'u'x chi ri e nakaneq jantape' yatkiyoq'.
23Man tamestaj-qa chi ri e etzelanel awichin jantape' yesik'in chawij,
y ri kiyakatajinenri'il man yetane' ta chire.
Currently Selected:
Sal 74: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
