Sal 71
71
Ch'owen rik'in ri Dios richin jun ri kan beneq chik rujuna'
1Jehová, kan awik'in k'a rat nuto'on-wi-wi',
man k'a taya' q'ij richin yin yik'ixbitej.
2Kinato' y kinakolo' rik'in ri achojmilal;
kan kinawak'axaj k'a y kinakolo'.
3Kinawewaj, achi'el xa ta ninwewaj-wi' chirij jun nimalej abej.
Rat kan abin k'a chi kan yinakol, roma kan ja rat ri at nutobal yin.
4Nu-Dios yin, kinakolo' k'a pa kiq'a' ri man yatkitzeqelibej ta rat,
pa kiq'a' ri e banoy taq etzelal y kan janila e mal.
5Roma kan ja rat ajaw Jehová ri at woyoben,
rat ri at nukuqubabel-k'u'x kan ja toq in ak'ual y k'a re wakami.
6Ja rat xato'on wichin toq k'a man jani kinalex,
kan ja rat k'a xabanon richin chi yin xinalex.
Roma ri' kan jantape' k'a xtinya' aq'ij.
7E k'iy ri kan yinkimey;
jak'a yin kan awik'in rat ninto-wi-wi'.
8Kan xaxe ta k'a ri bix chawe rat ri xtel-pe pa nuchi',
kan chijun q'ij ta k'a xtinya' aq'ij ak'ojlen.
9Man kinawixowaj chupan ri nurijixinen;
Man kinamalij re maneq chik wuchuq'a'.
10Roma ri e etzelanel wichin yech'on chuwij,
ri yeq'eleben wichin kan xkiya' chikiwech chi nikelesaj ri nuk'aslen,
11y nikibij: Ri Dios xa xumalij yan kan;
tiqoqotaj y tiqachapa', roma xa man jun xtikolon pa qaq'a', yecha'.
12Nu-Dios yin, tabana' utzil man kinaya' kan nej chawe rat.
Nu-Dios yin, chi'anin katanpe richin yinato'.
13Kek'ixbitej y kek'is jumul konojel ri e etzelanel wichin;
kan tikaqer k'a kipalej roma k'ix y xtisach kik'u'x ri nikajo' chi yin yik'oje' pa k'ayew.
14Jak'a yin kan jantape' ninkuquba' nuk'u'x awik'in.
Kan xtinya' k'a aq'ij richin jantape'.
15Yin kan chijun q'ij k'a xtintzijoj ri ruchojmilal ri naben rat.
Xtintzijoj k'a ri rubanik richin xojakol,
stape' man yitikir ta ninbij ronojel, roma man e ajlatel ta.
16Xtintaluj k'a rutzijol ri nima'q taq banobel ri xaben rat Jehová ri at qajaw.
Kan xtinnataj k'a jantape' ri ruchojmilal ri kan xaxe rat yabano.
17Nimalej Dios, kan k'a pa nuk'ajolil k'a aya'on ri tijonik chuwe;
y k'a re wakami, yin kan nuq'alajirisan-pe ri meyel taq abanobal.
18Stape' chupan re nurijixinen y kere' seq chik nujolon,
tabana' utzil nu-Dios, man kinamalij kan.
Roma kan k'a k'o chi nintzijoj ri awuchuq'a' rat,
chike ri k'a e ak'uala' na y ri man jani ke'alex.
19Nimalej Dios, ri ruchojmilal ri naben kan napon k'a chila' chikaj.
¡Kan abanon k'a nima'q taq banobel!
¿Achike ta chik k'a jun k'o achi'el rat?
20Rat xabanon chuwe chi xinq'axaj bis y ruk'ayewal,
Jak'a kan xtaya' chik ri nuk'aslen y xkinayek chik el chuxe' ri ulew.
21Xtanimirisaj k'a nuq'ij,
y kan xtakuquba' chik k'a nuk'u'x.
22Kan xtinya' k'a aq'ij rik'in q'ojom,
nu-Dios yin, roma man in amalin ta kan, xtinbixaj ri abanobal rik'in ri arpa,
kan ja rat k'a ri at loq'olej qa-Dios.
23Rik'in k'a kikoten xtinya' aq'ij.
Chuqa' xkikikot roma xinakol.
24Yin kan chijun q'ij xaxe k'a ri ruchojmilal ri naben rat, ri xtinbij.
Roma ri xkajo' chi xinkiya' ta pa k'ayew xa xek'ixbitej y xsach kik'u'x.
Currently Selected:
Sal 71: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
