Sal 69
69
Raqoj-chi'ij richin bis*f67*
1Nimalej Dios, tabana' utzil kinakolo' roma xa kan ink'o pa k'ayew,
achi'el xa ta ink'o chupan jun palou y yijiq' yan.
2Kan yik'is yan k'a qa chupan ri ch'abeq ri kan janila nim rupan,
y kan man jun chik akuchi ta utz ninya-wi ri waqen.
Kan xinapon k'a chupan ri más nim rupan ri ya',
yin ninna' chi xa kan yiruqirirej-el.
3Xikos yan janila, roma yisik'in chuk'utuxik to'onik,
ri nuqul kan niq'axon chik, y xjasjo' yan.
Ri runaq'-nuwech chuqa' nik'is yan qa ruchuq'a', roma yatinkanoj rat nu-Dios.
4Yinketzelaj y xa man jun achike ta roma;
janila k'a xek'iyer, y kan man e ajlatel ta chik,
kan más chik k'a xek'iyer ke chuwech ri rusumal-nuwi'.
Ri e etzelanel wichin kan xk'oje' k'a kuchuq'a'.
Kan nikich'ojij k'a chuwe ri xa man xinweleq'aj ta.
5Rat kan awetaman k'a ri nubanobal ri xinben, ri man xinch'ob ta;
ri numak, kan man e ewatel ta k'a chawech.
6Ajaw, tabana' chi man ta woma yin xkek'ixbitej ri kikuquban kik'u'x awik'in rat,
Jehová k'iytisanel richin ronojel.
Man ta k'a woma yin xtisach kik'u'x ri yekanon awichin rat, nimalej qa-Dios.
7Roma nukuquban nuk'u'x awik'in, ri winaqi' yinkik'ixbisaj;
roma ri' ri nupalej kan kaqarineq roma k'ix.
8Ri nuwinaq kan nikiben chuwe achi'el man in kiwinaq ta.
Ri wach'alal nikiben chuwe achi'el man in aj wawe' ta,
9roma kan janila ninwajo' ri awachoch y kan nupaxij wánima ri niban chire,
y ri itzel taq ch'abel ri yekibila' chawe richin k'ix, kan chuwij k'a yin niqaqa-wi.
10Toq yinoq' y yimewayin rik'in bis,
rije' xa yetze'en chuwij.
11Toq ninkusaj ri nutziaq richin bis,
konojel rije' nikiben chuwe chi yinok yakol kitze'en.
12Ri winaqi' ri yetz'uye' chuchi' ri tinamit, yech'on itzel chuwij,
y ri q'abarela' yinkiyojobej rik'in ri kibix.
13Jak'a yin kan awik'in rat Jehová yitzijon-wi,
kinakolo' toq rat keri' nawajo'.
Kinawak'axaj k'a roma ri awajowabal,
y tajoyowaj nuwech.
14Kinawelesaj chupan re ch'abeq y tabana' chi man ta xkik'is-qa chupan.
Kan ta k'a xkitotej chikiwech ri ye'etzelan wichin,
kan ta k'a xkitotej chuwech ri palou.
15Man taya' q'ij chi yiruqirirej-el ri ya',
ni man ta yirubeq' ri nimalej siwan,
man ta yimuqutej kan chupan ri nimalej jul.
16Tak'uluba' k'a pe ri nuch'abel Jehová,
roma ri ajoyowanik kan janila nim.
Kinatzu' k'a pe achi'el ri nimalej awutzil.
17Man tawewaj-awi' chinuwech, yin ri in asamajel,
roma ink'o pa nimalej bis;
tabana' utzil kinawak'axaj chi'anin.
18Kajel k'a pe wik'in, y kinakolo'.
Kinato' k'a chikiwech ri e etzelanel wichin.
19Rat kan atzuliben k'a ronojel ri k'ixbilal ri nink'owisaj,
ri nuq'axo'n y ri qasanri'il ri niban chuwe;
jak'a kan chawech rat ek'o-wi ri e etzelanel wichin.
20Ri q'axo'n kan rusokon k'a ri wánima y kan in k'ayewatajineq.
Kan xinwoyobej chi k'o ta jun xjoyowan nuwech y kan man jun.
Xinwajo' chi k'o ta xkuquban nuk'u'x, jak'a kan man jun.
21Chupan ri nuway xkixol kamisanel aq'om,
y toq xchaqi'j nuchi', xa xkiya' k'ayilej-vino chuwe.
22Jehová, tabana' chi ri kinimaq'ij re winaqi' re' xa xtik'atzin ta richin pikbel chike;
y ri utz nikitz'et rije', kan ta k'a xkerutzeq.
23Tabana' chi rije' xkemoyir,
chuqa' xkelukulu' ta richin man ta yetikir yepa'e'.
24Tataqa' k'a pe ri awoyowal pa kiwi' rije',
y ri awoyowal ri yakatajineq kan ta k'a xkeruq'i' rije'.
25Ri akuchi ek'o-wi-qa kan ta xtitole',
y kan ta man jun chik xtik'oje' kan chupan ri kachoch.
26Roma kan chaq xkitzeqelibej ri aya'on q'axo'n pa ruwi',
y kan xetze'en k'a chirij jun ri k'o pa ruk'ayewal.
27Toqaqa chi'ak'u'x ronojel ri kimak,
y man taya' k'a ri kolotajik chike.
28Tayojo' kibi' chupan ri wuj ri akuchi tz'ibatel-wi kibi' ri kan yek'ase' richin q'asen,
kan man tik'oje' ri kibi' chikikojol ri choj kik'aslen.
29Jak'a yin ri kan in k'ayewatajineq y janila q'axo'n wik'in,
kan kinato' richin xkikolotej chuwech re'.
30Yin kan xtinnimirisaj ri abi' rik'in ri nubix;
xtintzijoj ri awuchuq'a' rik'in matioxinik pa wánima.
31Re' kan xtak'awomaj k'a rat Jehová más ke chuwech ri sipanik rik'in bóyix.
Kan más niqa' chawech re', chuwech jun alaj achij wákix.
32Toq xtikitz'et re' ri e poqonatajineq kan xkekikot.
Konojel ri winaqi' ri nikikanoj ri Dios, kan xtikikot ri kánima.
33Ri Jehová kan yerak'axaj ri man jun k'o kik'in,
y kan man yerixowaj ta ri ek'o pa ximonri'il.
34Kan tiya' k'a ruq'ij ri Dios chi'iwonojel rix ri ixk'o chuwech ri kaj y ri ruwach'ulew.
Keri' chuqa' ri ixk'o pa nimalej taq palou.
35Ri Dios kan xtukol k'a ri tinamit Sión,
y xkeruyek chik k'a q'anej ri ch'aqa' chik tinamit richin Judá.
Chiri' k'a xkek'oje' chik ri winaqi' y ri ruwach'ulew kan xtok chik kichin.
36Ri e kijatzul ri e rusamajela' ri Dios, kan xtikichinaj k'a ri ruwach'ulew.
Konojel ri ye'ajowan richin ri Dios kan xkek'oje' k'a chiri'.
Currently Selected:
Sal 69: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
