Sal 68
68
Ri bix richin toq xech'akon ri israelita*f66*
1Ri Dios kan xtiyakatej y ri e etzelanel richin xa xtikitaluj-el-ki';
ri man ye'ajowan ta richin, xa xke'animej chuwech.
2Achi'el nutaluj-el-ri' ri sib, keri' nikitaluj-el-ki',
achi'el niya'er-qa ri cera chuwech ri q'aq',
keri' xkek'is-el ri banoy etzelal chuwech ri Dios.
3Jak'a ri choj kik'aslen kan xkekikot;
kan xkenimaq'ijun k'a chuwech ri Dios y xketzopiyaj roma kikoten.
4Roma ri' kan tibixaj k'a rubi' ri Dios, kan tiya' k'a bix chire;
tinimirisaj k'a rubi' ri nibiyaj pa ruwi' ri sutz'.
Jehová jari' ri rubi'.
¡Kan kixkikot k'a chuwech rija'!
5Ri Dios kan tata'aj k'a chike ri meba'i' y to'onel kichin ri malkani'
Kan k'a chupan k'a ri rachoch yeruto-wi-pe.
6Kan nuben chi ri e malin kan, kan ye'ok ach'alalri'il kik'in ch'aqa' chik,
kan nuben chuqa' chike ri e ximil chi kan yekolotej;
jak'a ri man nikinimaj ta tzij, nuben chike chi xkek'oje' chupan jun ruwach'ulew chaqi'j-chaqi'j.
7Nimalej Dios, toq rat xatik'o-pe chuwech ri atinamit,
toq xaq'axaj ri tz'iran ruwach'ulew,
8ri ruwach'ulew kan xsilon y kan xqaqa k'a pe ri job chila' chikaj;
roma rat atk'o chiri', ri juyu' Sinaí kan xsilon,
xsilon k'a chawech rat ri at qa-Dios roj israelita.
9Nimalej Dios, rat xaben chi xpe janila chi job;
ri atinamit ri nimayamo' yan qa xaben chire chi xk'oje' chik el ruchuq'a'.
10Ri qawinaq kan chiri' k'a pa tz'iran ruwach'ulew xek'oje-wi.
Rik'in ri awutzil xaya' ri k'atzinel chike ri man jun k'o kik'in.
11Ri ajaw kan nich'on k'a pe,
y ri ixoqi' kan xkitaluj k'a ri utzilej rutzijol.
12Nikibij k'a: ¡Xe'animej, xe'animej ri e rey kichin ri e etzelanel qichin!, yecha'.
Y ri ixoqi' chiri' pa kachoch xkitaluj k'a chikiwech ri k'o rejqalen ri xkik'en-pe pa labal
13Xkitaluj k'a kiwachibel paloma ri ya'on saqipueq chirij,
ri kixik' ya'on q'anapueq chirij,
¿Rix achi'a' ri xixk'oje' kan kik'in ri iwawej, achike roma man xixbe ta pa labal?
14Toq ri Dios xerutaluj-el konojel ri rey chiri' pa juyu' Salmón,
ri juyu' ri', kan achi'el xa ta xqaqa chuma-tew pa ruwi' nitzu'un.
15¡Juyu' richin Basán, ri kan richin ri Dios!
¡kan janila k'a nim ri ijotolen!
16¿Achike k'a roma nich'upun ik'u'x rix nima'q taq juyu'
chirij ri juyu' ri rucha'on ri Dios richin chi chiri' niq'aton-wi-tzij?
Kan qitzij wi chi chiri' xtik'oje-wi rija' richin jantape'.
17Ri carruaje ri e richin ri Dios, kan man e ajlatel ta.
Chikikojol k'a ri' xpe-wi ri Dios toq xel-pe pa Sinaí,
richin xpe chupan ri rachoch.
18Toq xjote-q'anej pa rachoch, rija' kan e k'iy e etzelanel richin xeruk'uaj pa ximonri'il.
Chuqa' kan k'iy sipanik ri xuk'ul chuwi-kiq'a' ri winaqi' ri xeyakatej chirij,
y ri Jehová chiri' xtik'oje-wi richin jantape'.
19¡Nimalej ruq'ij ri ajaw, ri qakolonel!
rija' kan q'ij-q'ij yojruto' rik'in ri tijoj-poqonal ri niqaq'axaj.
20Ri Dios, ri kan qa-Dios roj, jari' ri xtikolon qichin.
Ri Jehová ri qajaw, xqojrujech'ej chuwech ri kamik.
21Kan qitzij wi chi ri Dios xch'akon chikij ri e etzelanel richin,
chikij ri man xkiya' ta kan rubanik ri mak.
22Y rija' xubij chi xkeruk'en-pe chiri' pa Basán.
Chuqa' xkeruk'en-pe pa runik'ajal ri palou,
23richin chi xtikipalibej ri kikik'el ri e etzelanel kichin,
y re kik' re' kan xtikireq' chuqa' ri tz'i'.
24Titz'eta' k'a ri rutinamit ri Dios ri pa cholajen e peteneq,
e peteneq chirij ri nimalej qa-Dios y rey richin nok-apo pa rachoch.
25Ri bixanela' e beneq k'a pa nabey,
ri q'ojomanela' e xambey kan,
pa kinik'ajal rije' e beneq xtani' kik'ualon pandereta.
26Tinimirisaj ruq'ij ri Dios chupan ri molojri'il,
Chi'iwonojel rix israelita tinimirisaj ruq'ij ri ajaw.
27Chiri' k'o-wi chuqa' ri tzobaj richin ri Benjamín, ja rija' ri k'o pa kiwi',
jak'a ri e tata'al richin ri tzobaj Judá, ek'o chupan ri kimolojri'il,
keri' chuqa' ri e tata'al richin ri tzobaj Zabulón y ri Neftalí.
28Nimalej Dios, kan tak'utu' k'a ri awuchuq'a',
tak'utu' ri awuchuq'a' ri xak'ut chiqawech roj.
29Kan k'a chupan ri nimalej awachoch ri k'o pa Jerusalem,
akuchi ri e rey richin ch'aqa' chik ruwach'ulew xtikisuj sipanik chawe.
30Ke'aq'ata' ri aj-Egipto ri e achi'el nima'q taq chikopi' chukojol ri q'ayis pop.
Ke'awoqotaj ri ch'aqa' chik ruwach'ulew, ri e achi'el tzobaj achija' y alaji' taq wákix,
ri winaqi' ri kan xaxe richin yebeyomer nikiqasaj kiq'ij ch'aqa' chik,
ke'ataluj k'a el konojel winaqi' ri xaxe oyowal ri niqa' chikiwech.
31Xkepe k'a ri e aj-raqen ri ek'o pa ruwi' ri Egipto;
Chuqa' ri e aj-raqen ri ek'o pa ruwi' ri Etiopía,
kan xtikiyek k'a ri kiq'a' chawech rat richin nikiya' aq'ij.
32¡Konojel k'a winaqi' richin chijun ruwach'ulew, kebixan richin nikiya' ruq'ij ri Dios;
kan tikinimirisaj k'a ruq'ij ri ajaw,
33tikinimirisaj ruq'ij ri nibiyajilan pa ruwi' ri kaj ri kan k'o-pe tibe-q'ij tibe-seq!
Rija' xtuben chi kan xtak'axatej ri ruch'abel ri kan k'o uchuq'a' ruk'uan.
34Kan tiqaya' k'a rejqalen ri ruchuq'a' ri Dios,
roma ja rija' niq'aton-tzij pa qawi' roj israelita.
Y ri ruchuq'a' kan niqatz'et chuwech ri kaj.
35Roj kan yojk'ark'ot roma xibinri'il toq ri Dios nel-pe chupan ri rachoch.
Jak'a rija' kan nuya' quchuq'a'.
Tiqaya' k'a ruq'ij ri nimalej qa-Dios.
Currently Selected:
Sal 68: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
