Sal 66
66
Bix roma ri nima'q taq rubanobal ri Dios*f64*
1Chi'iwonojel rix winaqi', tinimirisaj rubi' ri Jehová rik'in kikoten.
2Tibixaj ri ruk'ojlen ri rubi';
kan tinimirisaj k'a ri rubi' rik'in bix.
3Kan kere' k'a tibixaj chire ri Dios: ¡Janila k'a e meyel ri abanobal!
Roma ri runimirinen ri awuchuq'a', nikiqasaj-ki' chawech ri e etzelanel awichin.
4Konojel k'a winaqi' richin re ruwach'ulew nikiya' aq'ij.
Kan yebixan k'a chawe rat y ja ri abi' ri nikibixaj, kixcha' chire.
5Kixanpe k'a, titz'eta' ronojel ri rubanon ri Dios,
ri meyel taq banobel ri xuben kik'in ri qate-qatata'.
6Xuben chi ri Kaqa-Palou, xchaqer,
y kan chikaqen k'a xeq'ax-el chupan.
Kixanpe k'a, qojkikot rik'in ri Dios.
7Rija' rik'in uchuq'a' niq'aton-tzij richin jantape';
kan e rutzuliben k'a konojel ri winaqi' richin ri ruwach'ulew,
ri nikipaba-ki' chuwech, kan man xtuya' ta q'ij chike chi xkebe pa jotol.
8Chi'iwonojel k'a rix winaqi' tinimirisaj rubi' ri Dios.
Kan tak'axex k'a ri ich'abel richin ri ibix.
9Ja rija' ri yoyon qak'aslen,
y kan nuben k'a chiqe richin man yojilijo' ta.
10Qa-Dios roj, ronojel re' xaben richin xojatejtobej;
xojach'ajch'ojirisaj achi'el toq nijosq'ix ri saqipueq.
11Xaya' k'a q'ij chi xojqaqa chupan jun pikbel;
xaya' k'a jun nimalej ejqa'n pa qawi'.
12Xaben chiqe chi ri e etzelanel qichin xojkixeq'.
Kan xaben k'a chiqe chi achi'el xa ta xojq'ax pa q'aq' y pa ya',
chirij k'a ronojel re' xaya' uxlanen pa ruk'iyal chiqe.
13Yin kan xkinok k'a chupan ri awachoch,
kan xtinporoj k'a chikop chawech,
y xtinya' k'a apo ri nusujun chawe.
14Ronojel ri xinsuj toq xik'oje' pa q'axo'n,
kan jari' ri xtinya-apo chawe.
15Kan xtinporoj k'a chawech ri taq chikopi' ri más e ti'oj,
xtinsuj richin kamelabel ri achija' taq karne'l, ri bóyix y achija' taq tzuntzun.
16Kixanpe k'a, tiwak'axaj rix ri k'o rukiy ri Dios chiwech,
y xtintzijoj chiwe ronojel ri rubanon pa nuk'aslen.
17Yin kan xich'on rik'in rija',
y xinnimirisaj k'a ri rubi'.
18Wi ta yin k'o mak pa nuk'aslen,
ri Dios man ta xirak'axaj.
19Jak'a man keri' ta; roma ri Dios kan xirak'axaj-wi;
kan xrak'axaj k'a ri nuch'owen.
20Kan tinimirisex k'a rubi' ri Dios,
roma kan man xuya' ta kan chaq keri' ri nuch'owen,
xa kan xujoyowaj k'a nuwech.
Currently Selected:
Sal 66: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
