Sal 64
64
Ch'owen chire ri Dios richin ruk'utuxik to'onik*f62*
1Nu-Dios yin, tabana' utzil tawak'axaj ri nusujunik.
Tachapa' ri nuk'aslen roma kan ninxibij-wi' chikiwech ri e etzelanel wichin.
2Kinawewaj chuwech ri ch'obonik ri nikiben pan ewel ri e banoy taq etzelal,
chikiwech ri itzel taq winaqi' ri kimolon-ki'.
3Ri kaq' re winaqi' re' kan achi'el ri espada ri kan ya-ya' rey,
y kan nikik'aqala' poqon taq ch'abel ri kan yesokon, achi'el nik'aq ri ch'ab,
4richin nikibila' ch'abel pan ewel chirij jun wineq ri choj ruk'aslen.
Chaq k'ate' nikik'eq poqon taq ch'abel y man nikixibij ta ki'.
5Kan kipaban k'a ki' chupan ri itzel taq kich'obonik,
nikiyala' pikbel,
k'ari' nikibij-qa ¿achike ta k'a nitz'eton ri niqaben?, yecha-qa.
6Nikinojila' k'a q'anej ri etzelal,
y kan jebel ruch'obik nikiben chire.
Kan qitzij na wi chi rije' kan janila e nowineq rik'in ri kich'obonik.
7Jak'a ri Dios kan xkerusok k'a rik'in ri ruch'ab rija'.
Y kan chaq k'ate' k'a xtiqaqa pa kiwi' jun nima-ruk'ayewal.
8Kan ja ri kaq' rije' ri nibanon chike richin yetzaq.
Ri xketz'eton kichin kan xketze'en chikij.
9K'ari' xtik'oje' rukiy ri Dios chikiwech,
kan xtikich'ob k'a rij ri rusamaj ri rubanon ri Dios,
y k'ari' xtikitzijoj ronojel re banobel re'.
10Ri winaqi' choj kik'aslen kan xkekikot rik'in ri Jehová,
kan xtikikuquba' k'a kik'u'x rik'in rija', konojel ri ch'ajch'oj kánima.
Currently Selected:
Sal 64: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
