Sal 62
62
Kan xaxe ri Dios ri qatobal*f60*
1Kan xaxe k'a rik'in ri Dios nuxlan ri wánima.
Kan rik'in k'a rija' nipe-wi ri nukolotajik.
2Kan xaxe k'a rija' ri nutobal y ri nukolotajik.
Rik'in rija' ninto-wi-wi' y kan man xkijilijo' ta k'a.
3Jak'a rix ri ix etzelanel wichin, ¿k'a janipe' k'a xkixtane' richin chaq yiniyoq'oya'?
¿Kan jantape' ta k'a xtiwajo' yinitzeq, achi'el jun qejoj o jun tz'aq ri xa niwuluwu' yan qa?
4Kan chaq niyala' k'a chiwech richin yinitzeq y niqasaj nuq'ij;
Kan yixkikot k'a rik'in ri tz'ukuj-tzij;
Rik'in ri ichi' ye'ibila' utzilej taq ch'abel,
jak'a pan iwánima xa ruyon etzelal k'o.
5Kan xaxe k'a rik'in ri Dios ninwil-wi uxlanen.
Yin kan pa ruq'a' rija' woyoben-wi ronojel.
6Kan xaxe k'a rik'in rija' ninto-wi-wi' y ja rija' ri nikolon wichin.
Ja rija' ri nutobal y roma ri' kan man xkijilijo' ta k'a.
7Kan rik'in ri Dios k'o-wi ri nukolotajik y ri nuruwaq'ijaj;
rik'in rija' k'o-wi ri nutobal ri akuchi ninto-wi-wi' yin.
8Chi'iwonojel rix winaqi', jantape' tikuquba' ik'u'x rik'in.
Titzijoj chire ronojel ri k'o pan iwánima,
roma rija' kan jari' ri qatobal.
9Kan qitzij wi, chi ri wineq xa q'axel achi'el ri kaq'iq',
Stape' beyom o k'o ta pa meba'il, xa kan maneq rejqalen.
Wi ta ye'etex pa jun etabel konojel, kan yek'ulun chi xa man jun kejqalen.
10Man tikuquba' ik'u'x rik'in ri banoj kamik, ni man ninimirisaj-iwi' roma ri iweleq'.
Wi nik'iyer-q'anej ri ibeyomel, man tikuquba' ik'u'x rik'in.
11Ri Dios xuq'alajirisaj chi rija' janila ruchuq'a'.
Y yin kan wak'axan k'a, chi rik'in ri Dios nipe-wi ronojel uchuq'a'.
12Ajaw, rat kan at joyowanel,
kan qitzij wi chi rat xtaya' rajel ruk'exel ri rusamaj ri wineq.
Currently Selected:
Sal 62: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
