Sal 55
55
Jun ri tzeqeliben roma niban itzel chire*f53*
1Nu-Dios yin, tabana' utzil tawak'axaj ri nuch'owen.
Man tawewaj-awi' chinuwech.
2Tabana' utzil kinawak'axaj y tak'uluba-pe ri nuch'abel,
roma yin rik'in ronojel wánima yich'on awik'in, chupan ri tijoj-poqonal.
3Ri wánima kan ruxibin-ri', roma ri kich'abel ri e etzelanel wichin.
Kan in kiya'on pa ruk'ayewal ri itzel taq winaqi'.
Kan in kinojisan k'a rik'in q'axo'n.
Rik'in k'a janila koyowal in kitzeqeliben.
4Kan janila k'a niq'axon ri wánima,
yin ninna' chi ri kamik niqaqa yan pa nuwi'.
5Kan janila k'a nuxibin-wi' y kan yik'ark'ot.
Kan man jun chik yitikir ninben roma ri xibinri'il.
6Roma ri' xinch'ob chi k'ate' ta k'o nuxik', achi'el ruxik' ri ti paloma,
richin ta chi yibe nej y yinuxlan ta.
7Kan ta keri', yin yinanimej ta el y nej ta yibe-wi.
Y kan k'a pa tz'iran ruwach'ulew ta yibek'oje-wi.
8Kan chi'anin ta k'a ninto-wi' chuwech ri nimalej kaq'iq'.
Kan yinanimej ta k'a chuwech ri kaq'iq'-job.
9Tabana' utzil ajaw, ke'awulaj ri e etzelanel wichin y tasacha' kik'u'x rik'in ri kich'abel,
roma nutz'eton chi kan ruyon etzelal y kamik ri nibanatej chupan ri tinamit.
10Ri etzelal kan chaq nisutiyaj k'a chirij ri tinamit chi paq'ij chi chaq'a'.
Chupan ri tinamit kan xaxe k'a ri itzel taq banobel y ri itzel taq ch'obonik k'o.
11Ruyon k'a itzel taq banobel ri k'o chikikojol,
ri pa taq nima'q ruwech bey richin molojri'il kan ruyon q'oloj y eleq' ri yebanatej.
12Xa ta ja ri etzelanel wichin ri xya'on nuk'ix, kan ta xinkoch'.
O wi ja ta ri netzelan wichin, kan ta xinwewaj-wi' chuwech.
13Jak'a xa man keri' ta, roma xa kan ja ri jun ri k'o más naqaj chuwe yin ri xyakatej chuwij,
jun ri kan xubananej chi kan xok wachibil.
14Ri kan junan k'a xqayala' chiqawech ri qakikoten y ri k'o chi xqaben.
Kan junan k'a qawech xojbe chupan ri rachoch ri Dios.
15Re winaqi' kere' kan chaq k'ate' ta k'a xtiqaqa ri kamik pa kiwi'.
Kan k'a e k'es ta k'a xke'apon chupan ri jul richin muqbel,
roma rije' xa kan xaxe k'a ri etzelal ri k'o chikikojol.
16Jak'a yin kan rik'in k'a ri nu-Dios ri xkitzijon-wi.
Y rija' kan xkirukol-wi.
17Yin kan xkich'on k'a rik'in rija' ri tiqaq'ij, nimaq'a' o pa taq nik'aj-q'ij.
Rija' kan xtrak'axaj k'a ri nuch'abel.
18Rija' kan xtukol ri nuk'aslen, stape' chupan ri oyowal ri yakatajineq chuwij,
y stape' kan janila e k'iy ri e yakatajineq chuwij,
19Ri Dios ri ruq'aton-pe-tzij jantape', xkirak'axaj yin y xtuqasaj kiq'ij ri e etzelanel wichin.
Roma rije' man nikijel ta ri rubeyal ri kik'aslen y maneq rukiy ri Dios chikiwech.
20Ri wachibil xa kan xyakatej k'a chuwij, stape' junan qawech rubanon-pe.
Y xa kan man xutaqej ta k'a ri rujikibel-tzij ri rubanon wik'in.
21Ri ruch'abel kan jebel k'a nuben chire,
Jak'a ri ránima xa nojineq chi oyowal.
Ri ruch'abel kan e ch'uch'uj, más chuwech ri aceite ri niya'ox chirij jun sokotajik.
Jak'a ri ch'abel ri' xa e achi'el jun espada ri nikamisan.
22Taya' pa ruq'a' ri Jehová ronojel ri ruk'ayewal ri k'aslen,
y rija' xtuben chawe chi kow xkak'oje';
roma rija' man xtuya' ta q'ij chi ri choj ruk'aslen xtitzaq jumul.
23Nu-Dios yin, rat xtaben chi ri winaqi' ri nikiben itzel taq banobel xkeken chi'anin.
Xtaben k'a chi ri winaqi' ri kan xaxe ri kamik nikajo' nikiben y e q'olonel, man xkek'ase' ta k'a k'iy juna'.
Jak'a yin kan awik'in rat ninkuquba' nuk'u'x jantape'.
Currently Selected:
Sal 55: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
