Sal 37
37
Kuqubabel-k'u'x rik'in ri Dios*f36*
1Man tipe awoyowal koma ri aj-maki',
ni man tich'upu-ak'u'x chikij roma ri mak ri nikiben.
2Roma rije' xa e q'axel, e achi'el ri q'ayis ri xa nitzak'ix-el,
y achi'el ri rex q'ayis ri xa nichaqi'j-qa.
3Takuquba' ak'u'x rik'in ri Jehová, y tabana' ri utz.
Man tamalij kan y xk'ase' chupan ri ruwach'ulew.
4Kakikot rik'in ri Jehová,
y ja rija' xtiya'on chawe ri rurayibel ri awánima.
5Tajacha' ri ak'aslen pa ruq'a' ri Jehová,
y takuquba' ak'u'x rik'in rija', y rija' xkaruto'.
6Xtuq'alajirisaj k'a ri ruchojmilal ri ak'aslen,
achi'el ri saqil richin ri q'ij, nusaqirisaj ri q'equ'm.
7Man tipe awoyowal toq ri banoy etzelal nibe pa jotol,
y toq utz nel chuwech ronojel ri nuch'ob,
Xa kan katuxlan rik'in ri Jehová,
y tawoyobej pa ruq'a' rija' ronojel.
8Taya' kan ri oyowal, y man taya' q'ij chi nich'akon chawij.
Man katoyower, roma re' xa más nuyek-q'anej ruwi' ri oyowal.
9Roma ri e banoy etzelal kan xke'elesex-el chuwech re ruwach'ulew,
jak'a ri kikuquban kik'u'x rik'in ri Jehová kan xkek'ase' chiri'.
10Roma juba' apo chik, ri banoy etzelal kan man xtik'oje' ta chik.
Stape' xtikanox, man xtilitej ta.
11Jak'a ri xtikiqasaj-ki', kan xtikichinaj k'a ri ruwach'ulew,
y kan xkekikot k'a rik'in uxlanibel-k'u'x.
12Ri banoy etzelal nuch'ob richin nuben itzel chire ri choj ruk'aslen,
y kan nuqach'ach'ej rey chirij.
13Jak'a ri Dios kan nitze'en chikij,
roma retaman chi xa napon jun q'ij richin nikik'ul rutojbalil.
14Ri e banoy etzelal kan nikelesaj k'a ri ki-espada
y nikichojmirisaj ri rute-ch'ab richin yek'aqon,
richin chi yekitzeq ri ek'o pa meba'il y ri man jun k'o kik'in,
y richin yekikamisaj ri choj kik'aslen.
15Jak'a ri ki-espada xa chikij chik rije' xtuch'ik-wi-ri',
y chijun k'a ri rute-ch'ab kan xkeq'aj.
16Más utz ri ti juba' ok k'o rik'in ri choj ruk'aslen,
ke chuwech ri janila chi beyomel k'o rik'in y xa aj-mak.
17Roma ri kuchuq'a' ri e banoy taq etzelal xa kan xtelesex k'a chike.
Jak'a ri choj kik'aslen, kan ja ri Jehová ri nito'on kichin.
18Ri Jehová kan e ruchajin k'a ri choj kik'aslen.
Ri kichinan rije' kan man k'isel ta, xa richin q'asen.
19Ri choj kik'aslen, stape' k'o ruk'ayewal, kan man xkek'oje' ta pa k'ayew.
Stape' xtipe jun nimalej wayjal chikij, rije' kan man xkewayjan ta.
20Jak'a ri e banoy etzelal kan xkek'is k'a.
Ri e etzelanel richin ri Jehová, kan xkek'is k'a,
kan xkek'is achi'el toq nik'is ri sib.
21Ri banoy etzelal k'o ri nuqej, y man nutzolij ta chik;
jak'a ri choj ruk'aslen kan k'o joyowanik rik'in y nuya'.
22Ri e urtisan roma rija' xtikichinaj ri ruwach'ulew.
Jak'a ri ruya'on etzelanik pa kiwi', kan xkek'is k'a konojel.
23Ja ri Dios nik'utu chuwech ri wineq ri choj bey,
y nuyuqej chupan ri k'aslen ri niqa' chuwech rija'.
24Y stape' nupajk'ij raqen, man nitzaq ta kan jumul.
Roma ja ri Jehová ri chapayon chiruq'a'.
25Yin wakami xirijix yan,
y chupan chijun ri nuk'aslen, man jun bey nutz'eton chi ri wineq choj ruk'aslen malin ta kan roma ri Dios,
ni man jun bey nutz'eton chi ri ralk'ual, ye'ok ta molonel.
26Ri choj ruk'aslen jantape' k'o joyowanik rik'in, y nuya' ri niqaj chire.
Y koma ri ralk'ual nikil urtisanik ch'aqa' chik winaqi'.
27Tach'ara' awi' chire ri etzelal, y tabana' ri utz,
richin xkak'ase' jantape' chuwech re ruwach'ulew.
28Roma ri Jehová kan niqa' chuwech ri ruchojmilal ri k'aslen.
Y roma ri' man yerumalij ta kan, wi rije' man nikimalij ta kan rija'.
Kan jantape' k'a ruya'on ri ruq'a' pa kiwi',
jak'a ri kijatzul ri e banoy etzelal kan xkeruk'is k'a.
29Ri choj kik'aslen chuwech ri Jehová, xtikichinaj ri ruwach'ulew.
Y kan xkek'ase' k'a chiri' richin jantape'.
30Ri choj ruk'aslen kan nich'on rik'in na'oj.
Kan nich'on k'a rik'in ruchojmilal.
31Ri rupixa' ri Dios kan jari' ri ruyakon pa ránima.
Roma ri' kan man jun bey nijilijo'.
32Ri banoy etzelal kan chaq nuq'elebej ri choj ruk'aslen,
y nukanoj rubanik richin nukamisaj.
33Jak'a ri Jehová kan man xtuya' ta q'ij chi ri choj ruk'aslen nitzaq pa ruq'a' ri banoy etzelal.
Y man xtrejqalej ta mak toq xtuk'uex-el chuwech ri q'atoy-tzij.
34Takuquba' ak'u'x rik'in ri Jehová y tanimaj ri rutzij.
Y rija' kan xkarunimirisaj, y xtuya' chawe ri ruwach'ulew richin nawichinaj kan.
Y kan xtatz'et toq xkek'is-el ri e banoy taq etzelal.
35Yin kan xintz'et k'a jun wineq ri banoy etzelal kan janila xunimirisaj-ri'.
Xnimer k'a achi'el jun nimalej che', ri kan rex-rex nitzu'un.
36Jak'a rija' xa xken, y wakami kan man jun chik.
Stape' xinkanoj, xa man xq'alajin ta chik.
37Tatz'eta' ri wineq ri choj ruk'aslen, ri man jun itzel banobel nuben.
Re wineq re' xtik'ase' rik'in uxlanibel-k'u'x.
38Jak'a ri man nikinimaj ta tzij kan xkek'is k'a el jumul;
ri koyoben-apo rije' ja ri tojbel-mak.
39Jak'a ri kikolotajik ri choj kik'aslen kan rik'in ri Jehová peteneq-wi.
Ja rija' ri kuchuq'a' chupan ri ruk'ayewal.
40Ri Jehová yeruto' y yerukol chikiwech ri banoy etzelal,
roma kan nikikuquba' kik'u'x rik'in.
Currently Selected:
Sal 37: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
