Sal 36
36
Ri itzel rubanobal ri wineq y ri rutzil ri Dios*f35*
1Ri etzelal kan nich'on k'a pa kánima ri e banoy etzelal.
Rije' kan man jun bey nikiquqa' chi nikixibij ta ki' chuwech ri Dios.
2Kan kiyon k'a rije' kinimirisan-ki'.
Kan nikibij chi man xke'ilitej ta chire ri kimak.
Kan man jun xtetzelan richin ri kibanobal.
3Ri ch'abel ri yekibij, kan ruyon richin mak y q'oloj.
Kan xk'is k'a kina'oj, y man nikiben ta ri utz.
4Toq yekotz'e-qa pa kich'at, kan chaq nikiquqa' ri etzelal.
Kan e beneq k'a chupan ri bey richin ri mak,
y man niketzelaj ta kan ri itzel taq banobel.
5Jak'a ri awajowabal rat Jehová kan nunojisaj ronojel.
Ri awutzil kan nuq'i' k'a chijun ri kaj.
6Ri ruchojmilal ri naben rat, nilitej xabakuchi.
Napon k'a pa ruwi' ri juyu' ri más e nima'q.
Chuqa' napon-qa, k'a akuchi ri janila nim rupan ri ya'.
Rat ye'achajij ri winaqi', y chuqa' ronojel kiwech taq chikopi'.
7Kan janila k'a jebel ri awajowabal rat, ri man k'isel ta.
Roma ri' konojel nikito-ki' chuxe' ri amujal rat.
8Kan nikuqer k'a kik'u'x chire ri ruk'iyal ri kiway ri naya-pe.
Rat naya' pa ruk'iyal ri nikiqum, kan achi'el jun raqen-ya' ri janila ruki'il.
9Roma kan awik'in rat k'o-wi ri tz'ukubel-ya' richin k'aslen;
ri asaqil rat nusaqirisaj ri qak'aslen roj.
10Tanimirisaj k'a ri awutzil pa kiwi' ri ketaman awech.
Ri ruchojmilal tabana' pa kiwi' ri choj kánima.
11Man taya' q'ij chi yech'akon chuwij ri janila nikinimirisaj-ki',
ni man yinkitzeqelibej ri e etzelanel wichin.
12Xketzaq ta k'a ri e banoy taq etzelal.
Xketzaq richin q'asen y man ta chik xketikir xkeyakatej.
Currently Selected:
Sal 36: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
