Sal 35
35
Ruk'utuxik ruto'onik ri Dios*f34*
1Jehová, tapaba-awi' chikiwech ri nikipaba-ki' chinuwech yin.
Tabana' oyowal kik'in ri yebanon oyowal wik'in yin.
2Tachapa' ri nimalej atobal y katanpe richin yinato'.
3Tachapa' ri akum,
tapaba-awi' chikiwech ri e tzeqelibeyon wichin.
Tabij chuwe chi ja rat at nukolonel.
4Tasacha' k'a kik'u'x y ke'ak'ixbisaj ri nikajo' yinkikamisaj.
Kan tikitzolij k'a ki' chikij, y tiqaqa k'ix pa kiwi' ri nikajo' nikiben etzelal chuwe.
5K'ate' ta xke'uk'uex-el, achi'el ri solot ri nuk'uaj-el ri kaq'iq',
y chi ri ángel awichin rat xkeruteq-el nej.
6Tabana' chi ri kibey kan q'equ'm y kan yejilijo' ta,
y chi ri ángel awichin rat kan xkerutzeqelibej ta k'a.
7Rije' xkiya' jun pikbel pa nubey ri xa man jun achike ta roma.
Chuqa' xkiben k'a jun jul richin chi yin yitzaq ta chupan.
8Roma ri' taya' k'a pe ri ruk'ayewal chaq k'ate' pa kiwi' rije'.
Y ri pikbel ri xkiben, ja ta rije' ri xketzaq chupan.
Y kan ta ja rije' ri xketzaq chupan ri jul ri xkiben.
9K'ari' xtikikot k'a ri wánima awik'in rat Jehová.
Y xkikikot rik'in ri akolotajik.
10K'ari' xkisik'in rik'in ronojel wuchuq'a' chi maneq chik jun Dios achi'el rat,
roma kan ye'akol ri ek'o pa ruk'ayewal, chikiwech ri kan k'o kuchuq'a'.
Y kan ye'ato' k'a ri k'o nik'atzin chike, chikiwech ri ye'eleq'an kik'in.
11Xeyakatej winaqi' chuwij ri nikitz'uk-tzij chuwij.
y nikik'utuj chuwe ri xa man wetaman ta.
12Yin ninben utz kik'in, jak'a rije' ja ri itzel nikiben chuwe.
Y re' xa nuya' bis pa wánima.
13Jak'a toq yeyawej rije', yin kan ninkusaj ri nutziaq richin bis.
Yin kan yibison k'a koma rije', y kan yimewayin.
14Kan janila k'a yibison achi'el xa ta jun wachpochel o jun wach'alal ri yawa';
yenbisoj achi'el xa ta nte' ri xken.
15Jak'a toq xpe wululen chuwij, rije' xa xetze'en chuwij.
Xkimol k'a ki' itzel taq winaqi' chuwij, y yin man xinwetamaj achike roma.
Y kan janila k'a itzel xkiben chuwe, y man yetane' ta chuwij.
16Kan janila k'a yinkiyojobej, y yetze'en chuwij.
Yinkimeruj roma yinkixowaj.
17Ajaw, ¿k'a janipe' k'a chaq xtatzu' ronojel re'?
Tabana' utzil takolo' ri wánima chikiwech ri nikajo' yinkik'is.
Xaxe jun nuk'aslen k'o, y roma ri' kinakolo' chikiwech,
roma rije' e achi'el koj ri nikajo' yinkiwech'.
18Keri' yin kan xkimatioxin k'a chawe chikiwech ri kimolon-ki'.
Xtinya' k'a aq'ij chikikojol ri janila chi tinamit.
19Man taya' q'ij chi xkekikot chuwij ri e etzelanel wichin,
y man ta xkinkimeruj roma yinketzelaj y xa man jun nubanon chike.
20Kan man jun bey yech'on ta chi utzil,
kan xaxe k'a kamulun-tzij nikiben chikij ri choj kik'aslen.
21Xkijaq'aq'ila' k'a tze'en chuwij,
y xkibij: Titzu', la xuben, kan rik'in runaq'-qawech xqatz'et, yecha'.
22Jehová, man kak'oje' kan chaq keri', roma rat kan xatz'et k'a re nikiben.
Tabana' utzil man kinaya' kan, Jehová nu-Dios yin.
23Tabana' utzil kayakatej, y kinato',
richin naben ruchojmilal pa nuwi' yin, nu-Dios y wajaw yin.
24Tabana' utzil taq'alajirisaj chi yin maneq numak.
Tabana' richin man ta xkekikot chuwij.
25Man tikibij-qa pa taq kánima: Qánima jare' ri niqajo',
y man tikibij chuqa': Xojtikir chirij.
26Xa kan ke'ak'ixbisaj y tasacha' kik'u'x konojel ri yekikot chuwij roma ink'o pa q'axo'n.
Taqasaj kiq'ij ri xkinimirisaj-ki' chinuwech yin.
27Jak'a ri nikajo' chi yin yich'akon ta, kan kebixan y kekikot;
tikibij chi rat Jehová ruk'amon ninimirisex aq'ij, roma nawajo' chi ri asamajela' nik'oje' uxlanen kik'in.
28K'ari' jantape' k'a xtintzijoj ri ruchojmilal ri naben rat,
y kan chijun q'ij k'a xtinya' aq'ij.
Currently Selected:
Sal 35: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
