Sal 22
22
1Nu-Dios yin, nu-Dios yin, ¿achike roma xinamalij kan?
¿Achike roma k'a janila nej atk'o-wi richin nawak'axaj ri nuraqoj-chi'ij y yinakol ta?
2Nu-Dios yin, ri paq'ij yich'on awik'in y kan man nak'uluba' ta pe ri nuch'abel.
Chuqa' yich'on awik'in ri chaq'a' y man wilon ta uxlanen.
Ri israelita yech'on rik'in ri Dios
3Jak'a rat kan at loq'olej-wi;
Y roj israelita niqaya' aq'ij.
4Ri qati't-qamama' kan xkikuquba' kik'u'x awik'in.
Roma ri' kan xe'akol.
5Xkik'utuj k'a kito'ik chawe rat y kan xe'akol k'a;
Xkikuquba' kik'u'x awik'in y man xek'ixbitej ta.
Ri David nich'on kik'in ri ruwinaq
6Jak'a yin xa kan man in wineq ta chik chikiwech ri ch'aqa' chik.
Xa kan in achi'el chik k'a jun jut chikiwech.
Y kan in ketzelan k'a ri winaqi' richin ri tinamit.
7Konojel k'a ri yetz'eton wichin, kan yetze'en chuwij;
Nikiyumumula' kichi', nikisilola' ri kijolon y nikibij:
8¡Rija' rukuquban ruk'u'x rik'in ri Dios.
Wakami kan tikol k'a roma rija', roma kan qajineq chuwech!, yecha'.
Ri David nich'on rik'in ri Dios
9Jehová, rat xabanon chuwe richin xinalex rik'in ri nte'.
Kan k'a yitz'uman na, toq kan ja yan ri' xinachajij.
10Kan k'a man jani k'a yinalex, kan ja yan ri' in achajin chik.
Kan ja yan toq ri nte' xyawej kan chuwij, ja yan ri' rat at nu-Dios.
11Roma ri' man kinaya' kan nuyon,
roma ri e etzelanel wichin kan naqaj ek'o chuwe yin.
Y kan man jun k'a ri achike ta xtito'on wichin.
Ri David nich'on pa kiwi' ri e etzelanel richin
12Ri winaqi' ri itzel nikina' chuwe kan kisutin k'a wij
achi'el nikiben ri achija' taq wákix.
Kan e achi'el k'a ri wákix ri e richin ri ruwach'ulew Basán.
13Kan yesik'in k'a chuwij, achi'el nikiben ri koj.
Y kan nikik'eq k'a ki' chuwij.
14Ri wuchuq'a' kan xk'is yan k'a qa,
achi'el nik'is ri ya' toq nitix pan ulew.
Ronojel k'a ri nubaqil kan xe'el yan pa kik'ojelibal.
Kan maneq chik oyobenri'il chuwe yin.
Xa xk'is yan qa achi'el nik'is ri cera toq nimeq'e'.
15Ri pa nuchi' kan chaqi'j-chaqi'j k'a, kan achi'el ri poqolaj.
Ri waq' kan xutz'om k'ari' ri pa nuja'j,
roma ri' kan nintz'et k'a ruwech ri nukamik.
16Ri e banoy taq etzelal e yakatajineq chuwij,
achi'el jun tzobaj tz'i' ri janila e k'a'el.
Kan kisutin k'a wij richin nikiwech' ri nuq'a' y ri waqen.
17Yin kan nintz'et chik qa ronojel ri nubaqil.
Y roma ri' ri winaqi' kan chaq in kitzuliben y yinkiyojobej.
18Ri nutziaq kan xkich'arala' k'a chikiwech,
y kan xkibanala' k'a sakinik pa ruwi'.
Ri David nich'on rik'in ri Dios
19Rat Jehová tabana' utzil man kinaya' kan,
Katanpe chi'anin richin yinato' y naya' wuchuq'a'.
20Takolo' ri wánima chuwech ri kamik.
Chuwech ri kuchuq'a' ri itzel taq tz'i', takolo' ri nuk'aslen.
21Kinakolo' pa ruchi' ri koj;
chuqa' kinakolo' chuwech ri ruk'a' ri juyubel achij wákix.
Ri David nich'on rik'in ri Dios y kik'in ri ruwinaq
22Keri' yin kan xtintzijoj k'a ri abi' chike ri wach'alal.
Xtinya' k'a aq'ij pa taq qamolojri'il.
23Rix nuwinaq ri k'o rukiy ri Jehová chiwech, kan tiya' k'a ruq'ij.
24Roma rija' kan man nupoqonaj ta k'a richin nuto' ri jun ri k'o pa q'axo'n.
Kan man nrewaj ta k'a ri' chuwech ri k'o pa tijoj-poqonal.
Y xa kan nrak'axaj k'a toq nuk'utuj to'onik.
25Jehová, yin kan xtinbixaj k'a ri abi' chikikojol ri wach'alal.
Ri nusujun chawe, kan xtinben chikiwech ri nikiya' aq'ij.
26Ri kiqasan-ki' chawech kan xtikitej k'a ri kiway y kan xtinoj k'a kipan.
Ri yekanon awichin, kan xtikiya' k'a aq'ij y xkek'ase' k'a richin jantape'.
Konojel yech'on rik'in ri Dios
27Konojel k'a ri winaqi' ri e richin chijun ruwach'ulew, xkepe y xtikiya' aq'ij.
Chi achijlonela', ixjayilonela' y alk'ualaxela', xtikiya' aq'ij.
28Roma kan awichin rat Jehová ri ajawaren.
Kan ja rat k'a ri xkaq'aton-tzij pa ruwi' chijun ri ruwach'ulew.
29Konojel ri e beyoma' kan xkexuke' chawech y xtikiya' aq'ij,
roma konojel re winaqi' re' xa kan xke'ok chik poqolaj,
y kiyon rije' kan man yetikir ta nikiya-qa kik'aslen.
30Chuqa' ri jun chik sol winaqi' kan xtikiya' aq'ij rat Jehová,
kan xtikitzijoj k'a ri abanobal rat, chike ri e kijatzul chik rije'.
31Xtikitzijoj k'a chike ri man jani ke'alex,
ri ruchojmilal y ri meyel taq abanobal.
Currently Selected:
Sal 22: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
