Sal 148
148
Ronojel ri rusamaj ri Dios nikiya' ruq'ij rija'
1Tinimirisex ruq'ij ri Jehová k'a chila' chikaj.
Konojel ri ek'o chila' chikaj kan tikinimirisaj ruq'ij rija'.
2Chi'iwonojel rix ri ix aj-chikajil rusamajela' ri Dios kan tiya' ruq'ij.
Chi'iwonojel ri ixk'o chikaj, kan tinimirisaj ruq'ij.
3Ri q'ij y ri ik' kan tikiya' ruq'ij ri Jehová,
keri' chuqa' ri ch'umila' ri yech'ich'an-pe chila' chikaj, tikiya' ruq'ij.
4Ri kaj chi tz'etel y man tz'etel ta tikiya' ruq'ij ri Dios,
keri' chuqa' ronojel ri sutz' ri ek'o chuxe' ri kaj.
5Konojel re' tikiya' ruq'ij ri Jehová,
roma ja rija' xbanon kichin.
6Kan xeruya' pa kik'ojelibal richin q'asen.
Xuya' kan ruchojmilal pa kiwi', ri kan man jun xtiyojo.
7Ronojel ri ruwach'ulew tikiya' ruq'ij ri Jehová,
Chuqa' konojel ri nima'q taq chikopi' ri ek'o chupan ri palou,
y ri ek'o-qa más nej chupan ri ya'.
8Konojel re' tikiya' ruq'ij ri Jehová:
Ri koyopa', ri saqboch, ri raxq'ab, ri sutz',
keri' chuqa' ri nimalej kaq'iq' ri kan nuben ri nubij ri Dios;
9chuqa' ri juyu' y ronojel ri ruwa taq juyu',
ri che' ri nikiya' kiwech y ronojel ri tiox-che';
10konojel ri chikopi' ri e richin k'echelaj y konojel ri ye'awajix,
ri taq kokoj chikopi' y ri yexik'an pa kaq'iq';
11konojel ri e rey kichin ri ruwach'ulew y konojel ri winaqi',
ri e tata'al y konojel ri aj-raqen pa kiwi' ri winaqi';
12konojel ri alaboni' y chuqa' konojel ri xtani',
ri e rijita'q taq winaqi' y chuqa' konojel ri ak'uala'.
13Konojel re' tikibixaj ri rubi' ri Jehová,
roma xa kan xaxe k'a ri rubi' rija' ri ruk'amon chi ninimirisex.
Ri ruk'ojlemal rija' kan k'o k'a pa ruwi' ri kaj y ri ruwach'ulew.
14Rija' kan ruya'on k'a nimalej uchuq'a' chire ri rutinamit,
konojel ri israelita kan tikiya' ruq'ij, roma ja rije' ri ek'o más naqaj chire rija'.
¡Kan tinimirisex k'a ruq'ij ri Jehová!
Currently Selected:
Sal 148: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
