Sal 147
147
Ri rutzil ri Dios pa ruwi' ri Jerusalem
1Tinimirisaj ruq'ij ri Jehová,
roma kan utz wi chi niya'ox ri bix chire ri qa-Dios.
Kan jebel y kan ki' toq niya'ox ruq'ij rija'.
2Ri Jehová nupaba' chik q'anej ri tinamit Jerusalem;
Kan xkeruk'en chik pe konojel ri winaqi' ri e talutajineq.
3Rija' yeraq'omaj ri niq'axon ri kánima,
kan nupis k'a ri kisokotajik.
4Kan xuch'ob janipe' ch'umila' yek'oje',
chikijujunal rije' yeroyoj rik'in ri kibi'.
5Ri qajaw roj kan k'o janila nim ruq'ij,
y kan janila uchuq'a' rik'in.
Ri runojibal kan maneq ruchi'.
6Ri Jehová nunimirisaj kiq'ij ri kiqasan-ki' chuwech.
Jak'a ri e banoy taq etzelal kan yeruqasaj k'a pan ulew.
7Kixbixan rik'in matioxinik richin niya' ruq'ij ri Jehová;
tiq'ojomaj ri arpa richin niya' ruq'ij ri qa-Dios.
8Ja rija' nibanon chi ri kaj ninoj ruwech chi sutz'.
Nunaba' k'a ri job richin nuya'aj ri ruwach'ulew.
Chuqa' nuben chi nik'iy-pe ri q'ayis pa taq juyu'.
9Rija' nitzuqun kichin ri awej;
yerutzuq chuqa' ri taq ral ri qo'ch.
10Rija' man nukuquba' ta ruk'u'x kik'in ri kiej chupan jun oyowal,
ni man nukuquba' ta ruk'u'x kik'in aj-labal.
11Ri Jehová nikikot kik'in ri winaqi' ri k'o rukiy chikiwech,
kik'in ri koyoben ri rutzil rija'.
12Tinimirisaj k'a ruq'ij ri Jehová, rix aj-Jerusalem.
Tiya' k'a ruq'ij ri Dios, rix aj-Sión;
13roma ja rija' nichajin ri tinamit ri'.
Kan nuya' k'a urtisanik pan iwi' rix.
14Ja rija' ri niya'on ri uxlanen chupan ri iruwach'ulew.
Rija' nuya' pa ruk'iyal ri trigo richin yixnoj jebel.
15Ri ruch'abel rija' kan nuteq k'a pe chuwech re ruwach'ulew;
ri nubij rija', kan chi'anin nitalutej rutzijol.
16Nuya' k'a pe k'iy raxq'ab y kan achi'el ri rupimil ri lana nuben chire.
Toq nuya-pe ri chuma-tew kan achi'el chaj nuben-pe chire.
17Nuya' k'a pe ri saqboch y kan achi'el taq abej kibanik.
¿Achike ta k'a nikoch'on ri rutewul ri saqboch ri'?
18Xaxe rik'in ri ruch'abel ri Jehová, yeya'er-qa ronojel re'.
Rik'in jun kaq'iq', yebiyin-el ronojel ri ya' ri'.
19Ri ruch'abel kan xuk'ut k'a chikiwech ri e rijatzul kan ri Jacob.
Ri jalajoj ruwech rupixa' xuk'ut chuwech ri tinamit Israel.
20Y re' kan man rubanon ta kik'in ri man nikitzeqelibej ta rija'.
Ri man ketaman ta ri rupixa'.
Kan tinimirisex k'a ruq'ij ri Jehová.
Currently Selected:
Sal 147: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
