Sal 145
145
Bix roma ri rutzil ri Dios*f128*
1Xtinnimirisaj k'a aq'ij, nu-Dios, nu-rey.
Xtinya' aq'ij jantape', tibe-q'ij tibe-seq.
2Ronojel q'ij xtinnimirisaj ri abi'.
Kan xtinbixaj ri abi' jantape', tibe-q'ij tibe-seq.
3Kan nimalej aq'ij rat Jehová.
Kan ruk'amon richin niya'ox ronojel bix chawe.
Ri animirinen rat kan man nuq'i' ta ri qach'obonik roj.
4Ri chi sol chi sol winaqi' ri yeq'ax, kan xtikinimaq'ijuj ri nima'q taq abanobal rat Jehová.
Kan xtikitaluj k'a rutzijol ri meyel taq abanobal.
5Xtikitzijoj k'a ri runimirinen ri ak'ojlemal rat Jehová;
kan xtikiquqa' ri meyel taq abanobal ri xe'aben.
6Xtitzijox k'a ri samaj ri xaben rik'in uchuq'a' ri kan nak'en rukiy.
Y yin kan xtintaluj k'a rutzijol ri animirinen.
7Xtitalux k'a rutzijol ri nimalej awutzil rat.
Kan rik'in kikoten xtibixex k'a ri ruchojmilal ri naben.
8Rat Jehová, kan at koch'onel y joyowanel;
kan malon k'a nipe awoyowal,
y kan janila nim ri ajoyowanik.
9Rat Jehová kan janila k'a at jebel kik'in konojel.
Ri ajoyowanik kan aya'on k'a pa ruwi' ronojel ri abanon.
10Jehová, ronojel ri samaj ri e abanon, kan tikiya' k'a aq'ij.
Konojel ri e awalk'ual rat, kan tikinimirisaj k'a aq'ij.
11Ja ta ri ruk'ojlemal ri awajawaren ri xtitzijox.
Xtiban ta k'a ch'owen pa ruwi' ri awuchuq'a',
12richin chi tiketamaj ri ch'aqa' chik winaqi' ri nima'q taq abanobal rat,
y richin tiketamaj ri runimirinen y ri ruk'ojlemal ri awajawaren.
13Ri awajawaren kan richin k'a tibe-q'ij tibe-seq.
Ri aq'atbel-tzij rat Jehová kan kichin k'a konojel sol winaqi'.
14Rat Jehová kan ye'atemej k'a ri yetzaq yan qa;
kan ye'ayek k'a ri e k'ayewatajineq.
15Jehová, konojel kan at kitzuliben richin ye'atzuq,
roma rat kan naya' k'a ri kiway pa ruq'ijul.
16Najeq ri aq'a',
y ye'anojisaj rik'in urtisanik konojel.
17Rat Jehová kan choj k'a naben rik'in ronojel.
Kan janila k'a awutzil pa ruwi' ronojel ri abanon.
18Kan naqaj atk'o chike konojel ri ye'ajowan awichin,
roma rik'in ronojel kánima at koyoben.
19Kan naya' k'a ri rurayibel ri kánima ri k'o akiy chikiwech.
Nawak'axaj k'a ri kijiloj, y kan ye'akol.
20Rat Jehová kan ye'achajij konojel ri ye'ajowan awichin.
Jak'a ri e banoy taq etzelal kan ye'ak'is-el chuwech re ruwach'ulew.
21Yin kan xaxe k'a bix awichin rat ri xtinbixaj.
Kan konojel k'a tikinimirisaj ri loq'olej abi' rat Jehová, richin tibe-q'ij tibe-seq.
Currently Selected:
Sal 145: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
