Sal 109
109
Ch'owen pa kiwi' ri e banoy etzelal*f101*
1Nu-Dios yin, ri jantape' ninya' aq'ij,
tabana' utzil man taben chi man jun nabij,
2roma ri winaqi' ri xaxe q'oloj nikiben kan janila pa kichi' chuwij.
Kan janila k'a tzij xkitz'uk chuwij.
3Ruyon k'a ch'abel richin ch'upun-k'u'x ri nikibila' chuwij.
Nikibanala' k'a oyowal wik'in y xa man jun achike ta roma.
4Yin janila utz xinben kik'in, jak'a rije' xa xe'ok etzelanel wichin.
Man rik'in ri' yin kan jantape' yich'on awik'in.
5Ja ri itzel nikiben chuwe, pa ruk'exel ri utzil ri ninben chike.
Nich'upun k'a kik'u'x chuwij pa ruk'exel ri ajowabel ri ninya' chike.
6Nu-Dios yin, tabana' k'a chire re wineq re' chi ri niq'aton-tzij pa ruwi', ja ta ri wineq ri banoy etzelal.
Kan ja ta k'a ri rachibil ri k'o pa rijkiq'a' xtiyakatej chirij.
7Toq xtiq'at-tzij pa ruwi', kan ta k'a xtiq'alajin chi kan aj-mak.
Ri ruch'abel kan xtuq'alajirisaj ta k'a chi rija' k'o rumak.
8Man ta k'a k'iy q'ij xtik'ase' chuwech re ruwach'ulew,
y ri rusamaj kan jun ta chik xtik'oje' kan pa ruk'exel.
9Ri ralk'ual kan xke'ok ta k'a kan meba'i'.
Y ri rixjayil kan xtimalkanej ta k'a kan.
10Ri ralk'ual xaxe ta k'a xkebiyajilan chuk'utuxik ri nik'atzin chike.
Stape' yek'oje' pa jun jay wuluwik, kan xke'elesex ta k'a el chiri'.
11Ri achoq ik'in rubanon-wi ruqajo'n, kan ta k'a xtumej-el chuwech ronojel ri k'o rik'in.
Ri ruwech ri rutiko'n kan ta k'a xtimaj kan koma ch'aqa' chik winaqi'.
12Man jun ta k'a xtijoyowan ruwech.
Y toq rija' xtiken, man jun ta k'a xtijoyowan kiwech ri ralk'ual.
13Xkek'is ta k'a ri rijatzul,
y chirij ri ruka'n sol ruwinaq kan ta k'a xtiyojtej jumul ri rubi'.
14Ri itzel taq kibanobal ri kite-kitata', xtoqaqa ta k'a chuk'u'x ri Jehová.
Ri kimak man ta k'a xtikuyutej.
15Ri kimak rije' kan jantape' ta xtik'oje' chuwech ri Jehová.
Rija' xtuyoj ta k'a jumul ri kibi' chuwech re ruwach'ulew.
16Roma re wineq re' kan man xoqaqa ta chuk'u'x richin xuben ta juba' utzil.
Xa xerutzeqelibej winaqi' ri e poqonatajineq, k'o nik'atzin chike y niq'axon ri kánima,
xerutzeqelibej richin xerukamisaj.
17Rija' ja ri etzelanik ri xqa' chuwech y jari' ri xqaqa pa ruwi'.
Man xqa' ta chuwech ri urtisanik, roma ri' kan man xqaqa ta urtisanik pa ruwi' rija'.
18Achi'el ri winaqi' jantape' kikusan kitziaq,
keri' nuben rija' jantape' nroyoj etzelal pa kiwi' ri winaqi'.
Kan ta k'a xtubeq' ri etzelal achi'el nuqum ruya'.
kan ta k'a ri etzelal ri' xtapon chupan ri rubaqil, achi'el ri aceite.
19Ri mak jari' ta ri xtikuchu rij achi'el xa ta rutziaq.
Chuqa' jari' ta ri xtijitz'on richin, achi'el xa ta ri ximibel rupan.
20Ja ta k'a rutojbalil re' ri xtuya' ri Jehová chike ri e etzelanel wichin,
chike ri winaqi' ri yech'on itzel chuwij.
21Jak'a rat Jehová, wajaw yin, tabana' utzil taya' ri awutzil pa nuwi', richin chi ninimirisex ri abi'.
Kinakolo' roma ri ajoyowanik rat kan janila-wi utz.
22Roma yin kan janila k'a in poqonatajineq, y k'o ri k'atzinel chuwe.
Ri wánima kan sokotajineq k'a.
23Ri nuk'aslen xa achi'el ri mach'ach'il toq nik'is-el.
Roma maneq chik wuchuq'a', ri kaq'iq' yiruxupupej achi'el nuben chire ri sak'.
24Ri pa taq nuch'ek xa kan yek'ark'ot chik, roma man jun nintej.
Janila k'a xibaqir roma maneq nuway.
25Yin xa kan xinok k'a chike ri winaqi' jun in yakol tze'en.
Rije' yinkitzu', yetze'en y nikisilola' ri kijolon chuwij.
26Tabana' k'a utzil kinato' Jehová nu-Dios yin.
Kinakolo' rik'in ri awajowabal.
27Richin chi xtiq'ax ta k'a chikiwech ri winaqi' chi kan ja rat ri yakolon wichin;
chi ja rat ri xabanon ronojel re'.
28Tikibana' k'a ri itzel taq oyonik rije', jak'a rat kan kinawurtisaj k'a yin.
Ri e yakatajineq chuwij ja ta k'a rije' ri xkek'ixbitej, y jak'a yin ri in asamajel kan ta k'a xkikikot.
29Ri e etzelanel wichin kan ta k'a xtikiya' kik'ix.
Kan ta k'a xtiqaqa ri sachibel-k'u'x chikij achi'el xa ta jun tzieq.
30Jak'a yin kan jantape' xtinnimirisaj ruq'ij ri Jehová.
Xtinya' k'a ruq'ij chikikojol ri janila chi winaqi'.
31Roma ri Jehová kan xtik'oje' k'a pa rijkiq'a' ri wineq ri man jun k'o rik'in,
richin chi nukol ri ruk'aslen chikiwech ri yech'on itzel chirij.
Currently Selected:
Sal 109: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
