Sal 108
108
Ch'owen richin jun k'utunik*f100*
1Jare' k'o ri wánima chawech y kan man xtinjel ta chik ri nuch'obonik.
Kan xtinbixaj k'a ri abi', y re' jun ruwaq'ijaj chuwe yin.
2Ninchojmirisaj k'a wi' richin yibixan y yenchojmirisaj ri q'ojom,
nimaq'a' yan yik'astej richin ninben.
3Nimalej ajaw, kan xtinya' k'a aq'ij chikikojol ri ruwach'ulew.
Xtinbixaj ri abi' chikikojol ri winaqi'.
4Ri ajoyowanik rat Jehová kan más nim chuwech ri kaj.
Ronojel ri naben kan nuq'i' ri kaj.
5Tak'utu' ri nimalej abanobal pa ruwi' ri kaj.
Tak'utu' ri ak'ojlemal pa ruwi' chijun ri ruwach'ulew.
6Richin chi yekolotej ri ye'ajowan awichin,
ke'akolo' k'a rik'in ri awijkiq'a', y tak'uluba-pe ri nuch'abel.
7Ri Dios kan kere' rubin chupan ri rachoch:
Yin kan xkikikot;
kan ninch'er chike ri nuwinaq, ri Siquem y ri taq'aj richin Sucot.
8Ri ruwach'ulew Galaad y ri Manasés kan e wichin yin.
Ri ruwach'ulew ri k'o pa xaman kan achi'el jun tobel jolomaj chuwe yin,
ri Judá ri k'o pa xokon, kan jari' ri nuya'on richin nuq'et-tzij.
9Ri Moab xa kan achi'el k'a jun ruk'ojelibal-ya' richin ninch'ej waqen.
Ri Edom kan wichin chik yin,
y kan xkikikot k'a chirij ri ruwach'ulew Filistea toq xtich'akatej, xcha' ri Dios.
10Man jun xqojuk'uan richin niqaben oyowal chikij ri tinamit sutin kij chi tz'aq.
Man jun xtuk'uan qichin richin niqaben oyowal chirij ri ruwach'ulew Edom.
11Roma rat Jehová, oj amalin kan,
y man at beneq ta chik kik'in ri aj-labal.
12Tabana' utzil, qojato' pa kiq'a' ri e etzelanel qichin,
roma ri kito'onik ri achi'a' xa kan man jun rejqalen.
13Wi rat qa-Dios atk'o qik'in, roj xtiqaben nima'q taq banobel.
Rat xke'axeq' k'a ri e etzelanel qichin.
Currently Selected:
Sal 108: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
