Sal 107
107
Ri rajowabal ri Dios kan richin jantape'
1Kixmatioxin rik'in ri Jehová, roma rija' kan janila utz;
roma ri rajowabal kan richin q'asen.
2Tibij re', iwonojel rix ri ix kolotajineq chik;
ri ix rukolon chik pa kiq'a' ri e etzelanel iwichin;
3ri kan ix relesan chik pe pa taq ruwach'ulew, richin xixrumol;
roma xixruk'en-pe pa taq ruwach'ulew ri ek'o pa relebel-q'ij, pa qajbel-q'ij,
pa xaman y pa xokon.
4Pa rutikeribel jujun chike rije' kan e sachineq k'a pa tz'iran ruwach'ulew.
Kan man nikil ta k'a kibey y kiyon rije' xek'oje' chiri'.
Kan man jun k'a tinamit nikil chiri' richin ta xek'ase' chupan.
5Rik'in k'a wayjal y chaqi'j-chi'ij,
ri kánima kan nimayamo' yan qa.
6Jari' k'a toq rije' chupan ri kiq'axo'n xesik'in rik'in ri Jehová.
Y rija' kan xerukol k'a chupan ri tijoj-poqonal ri'.
7Xeruyuqej k'a chupan jun ch'ajch'oj bey,
richin chi xe'apon pa jun tinamit akuchi utz yek'oje-wi.
8Rije' k'o chi nikimatioxij chire ri Jehová,
roma ri rajowabal man k'isel ta,
y roma ri nima'q taq banobel ri nuben kik'in ri winaqi'.
9Roma rija' nuya' kiya' ri nichaqi'j kichi',
y kan nuya' kiway ri yewayjan.
10Ek'o chik ch'aqa' winaqi' ri ek'o pa q'equ'm;
e ximon rik'in cadena y nikitej janila poqon.
11Kere' xban chike roma kan xkipaba-ki' chuwech ri Jehová,
roma xketzelaj ri pixa' ri ruya'on rija'.
12Roma ri' ri Jehová xeruya' pa kowilej taq samaj,
xetzaqilan k'a, y kan man jun xto'on kichin.
13Jak'a toq xesik'in rik'in ri Jehová chupan ri kiq'axo'n,
ri Jehová kan xerukol k'a chupan ri tijoj-poqonal ri nikik'owisaj.
14Xerelesaj k'a chupan ri q'equ'm y chuwech ri rumach'ach'il ri kamik ri koyoben.
Y xuwulaj k'a ri ximonri'il ri akuchi e tz'apen-wi.
15Rije' k'o chi nikimatioxij chire ri Jehová, roma ri rajowabal man k'isel ta,
y roma ri nima'q taq banobel ri nuben kik'in ri winaqi'.
16Rija' xuwulaj ri ruchi' taq jay ri e banon rik'in q'enq'oj-pueq;
y xuk'ajij k'a ri ch'ich' ri niq'e'e' chirij.
17Ri man jun ketaman xek'oje' pa tijoj-poqonal, roma ri kiyakatajinenri'il,
y roma ri etzelal ri nikiben.
18Rije' kan man xkirayij ta k'a xewa-xe'uk'ya',
y xa kan xe'apon k'a chuwi' kamik.
19Jak'a rije' kan xesik'in chire ri Jehová chupan ri kiq'axo'n.
Ri Jehová kan xerukol k'a chupan ri tijoj-poqonal ri nikik'owisaj.
20Kan xaxe toq rija' xch'on, rije' kan xek'achoj.
Kan xerujech'ej k'a chuwech ri kamik.
21Rije' k'o chi nikimatioxij chire ri Jehová,
roma ri rajowabal man k'isel ta,
y roma ri nima'q taq banobel ri nuben kik'in ri winaqi'.
22Chuqa' tisuju' sipanik richin matioxinik chire.
y kan titzijoj k'a rik'in kikoten ronojel ri nuben rija'.
23Ri yebe pa ruwi' ri palou chupan ri ki-barco.
Ri e loq'onela' y ri e k'ayinela' ri xaxe pa ruwi' ya' yebiyaj-wi,
24rije' kan xkitz'et ri nimalej rusamaj ri Jehová;
xkitz'et k'a ri meyel taq banobel chupan ri palou.
25Ri Jehová xuben chi xyakatej jun nimalej kaq'iq',
kan xuben chi nibolqo't ri ya' pa ruwi' ri palou,
26ri ya' ri' kan xeruk'eq k'a ri winaqi' chikaj, k'ari' yeruqasaj k'a chuxe' ri ya';
jari' toq ri kánima rije' kan xmayamo-qa.
27Kan xek'ark'ot y xebe-kela' xebe-kela' xkiben, achi'el nikiben ri q'abarela'.
Ronojel k'a ri ketamabal xa kan man jun nik'atzin-wi.
28Jari' toq xech'on rik'in ri Jehová chupan ri kiq'axo'n.
Y rija' kan xerukol k'a chupan ri tijoj-poqonal.
29Ri nimalej kaq'iq'-job y koqolajay kan xujel k'a rik'in ch'uch'ujil.
Ri ya' ri nibolqo't pa ruwi' kan xsile-qa.
30Chirij ri' ri winaqi' kan yekikot roma kan xsiliso-qa ri ya'.
Keri' ri Jehová xeruk'uaj chuchi' ri ya' akuchi kich'obon richin ye'apon-wi.
31Tiya' matioxinik chire ri Jehová, roma ri rajowabal,
y roma ri meyel taq banobel ri nuben kik'in ri winaqi'.
32Tinimirisaj ruq'ij chupan ri molojri'il kichin ri winaqi'.
Y chupan ri molojri'il kichin ri rijita'q taq achi'a' ri k'o kiq'ij, tinimirisaj ruq'ij ri Jehová.
33Ri Jehová nuben chi ri raqen taq ya' ye'ok achi'el tz'iran ruwach'ulew,
y ri alaxibel taq ya' nuben chi yechaqi'j.
34Ri qasanbel taq ulew kan nuben chire chi man yewachin ta chik.
Kere' nuben chire roma ri kimak ri winaqi' ri ek'o chuwech.
35Chirij re' ri Jehová xuben chire ri tz'iran ruwach'ulew chi xok choy.
Ri chaqi'j ruwach'ulew xuben chire chi xok tz'ukubel taq ya'.
36Chiri' k'a xeruya-wi ri winaqi' ri yewayjan.
Y rije' kan nikipaba' k'a q'anej tinamit richin yek'ase' chupan.
37Chiri' nikitikila-qa ruwech ri ulew, nikitik-qa uva.
Y ri kitiko'n kan janila niwachin.
38Ri Jehová kan xerurtisaj y kan janila xewinaqir;
ri kawej kan janila chuqa' xek'iyer.
39Chirij ri', re winaqi' re' xa yek'is-qa roma ri tijoj-poqonal,
roma ri wululen y ri janila chi q'axo'n ri nipe chikij,
40jari' toq ri Dios kan xkeretzelaj k'a ri winaqi' ri yebanon ri itzel chike,
y kan xtuben k'a chike chi nisach kik'u'x.
41Roma rija' kan nuyek k'a pa jotol ri wineq ri man jun k'o rik'in.
Nuben k'a chi yek'iyer ri rijatzul, kan achi'el k'a tzobaj taq karne'l nuben chike.
42Ronojel k'a re' xtikitz'et ri choj kik'aslen, y kan xkekikot.
Jak'a konojel ri e banoy etzelal kan xtikitz'apej ri kichi'.
43Ri kan aj-na'oj k'o chi nik'oje' k'a chuk'u'x ronojel re',
niq'ax k'a chuwech ri nimalej rajowabal ri Jehová.
Currently Selected:
Sal 107: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
