Sal 106
106
Ri kiyakatajinenri'il ri israelita
1Kan tinimirisaj ruq'ij ri Jehová.
Tiya' ruq'ij ri Jehová, roma rija' kan janila jebel,
roma ri rajowabal kan richin q'asen.
2Ri nima'q taq rubanobal ri Jehová man jun nitikir nitzijon roma man e ajlatel ta.
¿Achike ta k'a xtitzijon ri ruruwaq'ijaj rija'?
3Jebel ruwa-kiq'ij ri nikitaqej ri ruchojmilal.
y ri jantape' nikiq'et-tzij pa ruchojmilal.
4Kinoqaqa k'a chi'ak'u'x, nimalej nu-Dios
toq xke'akol ri ch'aqa' chik chike ri nuwinaq.
Katanpe wik'in richin yinakol toq xke'ato' rije',
5richin kan xtintz'et k'a ri utzilej k'aslen kik'in ri ch'aqa' chik ri e acha'on;
y richin yikikot kik'in ri kan e awichin rat.
6Roj kan yojmakun k'a achi'el xemakun ri qati't-qamama'.
Kan xeqabanala' k'a ri itzel taq banobel.
Xeqabanala' k'a banobel ri man e utz ta.
7Ri qati't-qamama' toq k'a ek'o na pan Egipto, kan man xq'ax ta chikiwech ri meyel taq abanobal rat Jehová,
kan man xoqaqa ta chikik'u'x ri janila chi joyowanik ri xaya' pa kiwi'.
Y xa kan xkipaba' k'a ki' chawech chiri' chuchi' ri Kaqa-Palou.
8Man rik'in ri' ri Jehová kan xerukol roma ri rajowabal
richin chi xtitz'etetej ri ruchuq'a' rija'.
9Xuch'olij ri Kaqa-Palou y xuchaqirisaj rupan.
K'ari' xuben chike ri qati't-qamama' chi xeq'ax chupan ri siwan ya' ri',
achi'el xa ta pa tz'iran ruwach'ulew e beneq-wi.
10Ri chiri' xerukol k'a pa kiq'a' ri e etzelanel kichin.
Xerelesaj k'a el chikiwech ri e yakatajineq chikij.
11Ri ya' kan xumuq k'a kij ri e etzelanel kichin.
Kan man jun k'a chike rije' ri xk'ase' ta kan.
12K'ari' rije' xkikuquba' kik'u'x rik'in ri ruch'abel.
K'ari' xkibixaj ri rubi'.
13Man rik'in ri', xa kan chi'anin k'a xkimestaj-qa ri nimalej rubanobal ri Jehová.
Man xkinimaj ta k'a ri rupixa' rija'.
14Xa kan xkijech k'a ki' chubanik ri itzel taq rayibel ri chiri' pa tz'iran ruwach'ulew.
Xa kan xkitejtobej k'a ri Dios ri chiri'.
15Ri Dios kan xuya' k'a chike ri xkik'utuj chire,
jak'a chirij ri' xuteq k'a ruk'ayewal pa kiwi' rije'.
16Xch'upun kik'u'x chirij ri Moisés chiri' akuchi ek'o-wi-qa,
keri' chuqa' xkiben chire ri Aarón, ri kan cha'on roma ri Jehová.
17Roma ri' xjaqatej ri ruwach'ulew y xubeq' ri Datán,
chuqa' xerubeq' ri Abiram y konojel ri rachibil.
18Xpe k'a ri ruxaq q'aq' chila' chikaj pa kiwi' ri winaqi' ri'.
Ri q'aq' ri' kan xeruporoj k'a konojel ri itzel taq winaqi' ri'.
19Ri qati't-qamama' xkiben k'a ruwachibel jun alaj achij wákix chiri' pan Horeb.
Kan xkiya' k'a ruq'ij ri wachibel ri xa ya'erisan pa q'aq'.
20Keri', xa xkijel k'a ri ruk'ojlemal ri Jehová,
xkijel rik'in ruwachibel jun wákix ri xa q'ayis nutej.
21Xkimestaj k'a kan ri Dios ri nikolon kichin,
ri xbanon nima'q taq banobel pan Egipto,
22stape' rija' xbanon meyel taq banobel chupan ri ruwach'ulew richin ri Cam;
banobel ri man jun bey e tz'eton chiri' pa Kaqa-Palou.
23Ri Jehová kan xrajo' chi xeruk'is ta konojel ri qati't-qamama'.
Jak'a ri Moisés ri rucha'on rija', kan xch'on k'a pa kiwi' rije',
richin chi xuqasaj ruwi' ri royowal, richin man xerukamisaj ta.
24Stape' keri', ri winaqi' xa kan xketzelaj k'a ri ruwach'ulew ri kan rayixel.
Man xkikuquba' ta kik'u'x rik'in ri ruch'abel rija'.
25Xa xkichop yexebexot pa taq kachoch.
Man xkiya' ta k'a kixikin chire ri ruch'abel ri Jehová.
26Roma ri' kan xujikiba' rutzij chi xkerukamisaj chiri' pa tz'iran ruwach'ulew.
27Xerutaluj pa ch'aqa' chik tinamit,
y chiri' xerukamisaj-wi chikikojol ri winaqi' ri'.
28Ri israelita xa xkisamajij ri dios Baal-peor.
Xkitej ri sipanik ri e sujun chik chikiwech ri dios ri maneq kik'aslen.
29Kan xkiyek k'a royowal ri Dios rik'in ri itzel taq kibanobal.
Y roma ri' kan xpe k'a ri kamik chikikojol.
30Jari' k'a toq ri Finees xyakatej,
y xpa'e' chikikojol ri ruwinaq y ri Dios, richin chi ri Dios man xeruk'is ta.
Rik'in ri' xtane' ri nima-ruk'ayewal ri'.
31Roma re banobel re' ri Finees choj xk'ulun chuwech ri Dios.
Y re' kan xk'oje' kan richin q'asen.
32Ri israelita kan xkiyek k'a royowal ri Jehová chiri' rik'in ri alaxibel-ya' Meribá.
Koma rije' xmakun ri Moisés;
33roma kan xkipaba-ki' chuwech ri Dios.
Y ri Moisés xch'on k'a y man xuch'ob ta ri xubij.
34Chuqa' ri israelita man xekik'is ta k'a ri winaqi' richin ri ruwach'ulew Canaán,
ri xubij ri Jehová chi kekik'isa' kan jumul.
35Pa ruk'exel chi xekik'is, xa xkitun-ki' kik'in.
Xa xekibanala' k'a ri kibanobal ri winaqi' ri',
36y xekisamajij ri ki-dios.
Jare' xbanon chike chi xpe wululen chikij.
37Xekisuj k'a richin kamelabel ri kik'ajol.
Ri kimi'al xekijech pa kiq'a' ri itzel taq espíritu.
38Xekikamisaj k'a ri kalk'ual ri xa man jun kimak.
Xekisuj k'a chikiwech ri wachibel ri e kibanon ri aj-Canaán.
Y roma ri' xkitz'ilobisaj k'a ri ruwach'ulew ri' rik'in ri kik'.
39Rik'in ri banobel ri' xe'ok man e ch'ajch'oj ta ri israelita.
Kan achi'el k'a jun ixoq itzel ruk'aslen, keri' xkiben rije' kik'in ri dios ri'.
40Roma ri' xyakatej royowal ri Jehová pa kiwi'.
Y kan xeretzelaj, stape' kan e richin rija'.
41Xerujech k'a pa kiq'a' winaqi' ri man nikitzeqelibej ta rija'.
Y keri' k'a ri e etzelanel kichin xek'oje' pa kiwi'.
42Xetz'ilox k'a koma ri e etzelanel kichin.
Kan xkitej k'a poqon pa kiq'a'.
43Ri Jehová kan k'iy k'a mul xerukol ri israelita,
jak'a rije' xa chaq xkipaba-ki' chuwech y man xkinimaj ta ri rupixa'.
Roma ri kimak kan xqasex kiq'ij.
44Man rik'in ri' rija' kan xrak'axaj k'a toq xesik'in-q'anej rik'in,
y rija' kan xeruto' toq ek'o pa tijoj-poqonal.
45Kan xuch'ob pa ruwi' ri jikibel-tzij ri rubanon kik'in.
Y roma ri janila chi rajowabal kan ja ri utz ri xuben kik'in.
46Xuben k'a chike ri winaqi' ri e uk'uayon-el kichin pa ximonri'il,
chi xkijoyowaj kiwech.
47Ri winaqi' israelita xkibij k'a: Jehová qa-Dios roj, qojakolo' k'a.
Qojawelesaj-el chikikojol ri winaqi' ri man yatkitzeqelibej ta rat,
Qojamolo' chik richin niqanimirisaj ri loq'olej abi',
richin chi rik'in kikoten xtiqaya' aq'ij, yecha'.
48Nimalej aq'ij Jehová ri qa-Dios;
kan keri' k'a tibe-q'ij tibe-seq.
Qonojel roj tiqabij: Kan keri' wi, tinimirisex ruq'ij ri Jehová.
Currently Selected:
Sal 106: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
