Sal 105
105
Ri rubanobal ri Jehová pa kiwi' ri israelita
1Tiya' ruq'ij ri Jehová y tiya' rutzijol ri utzilej rubi'.
Titaluj rutzijol ri rubanobal ri Jehová chupan ronojel ruwach'ulew.
2Kan tiya' k'a ri bix chire; tibixaj ri rubi'.
Kixtzijon pa ruwi' ri meyel taq rubanobal.
3Kan kixkikot k'a rik'in ri loq'olej rubi'.
Ri yekanon richin ri Jehová, kan kekikot k'a.
4Kan ja ri Jehová tikanoj y tikanoj ri ruchuq'a'.
Kan jantape' k'a titzu' ruwech rija'.
5Toqaqa chiqak'u'x ri meyel taq banobel ri rubanon rija'.
Toqaqa chiqak'u'x ri pixa' ri eleneq pa ruchi'.
6Tibana' keri' rix ri ix rijatzul kan ri Abraham ri rusamajel,
rix ri ix ralk'ual kan ri Jacob, y kan ix rucha'on.
7Ja ri Jehová ri qa-Dios roj.
Ja rija' niq'aton-tzij pa ruwi' chijun ri ruwach'ulew.
8Rija' kan jantape' noqaqa chuk'u'x ri jikibel-tzij ri rubanon.
Noqaqa chuk'u'x ri ruch'abel ri rubin pa kiwi' ri chi sol chi sol winaqi'.
9Re', jare' ri jikibel-tzij ri xuben rik'in ri Abraham,
ri ya'on tzij ri xuben rik'in ri Isaac.
10Kan xujikiba' chik k'a chire ri Jacob, y kan xuben chire chi achi'el pixa'.
Jare' ri jikibel-tzij richin q'asen ri xuben,
11xubij k'a chire chi xtuya' ri ruwach'ulew Canaán richin xtrichinaj kan.
12Pa rutikeribel, ri qati't-qamama' xa k'a e juba' ok,
y xa chaq q'axel xek'oje' chupan ri ruwach'ulew ri'.
13Yebe-kela' yebe-kela' xkiben pa taq ruwach'ulew.
Yeq'axlan pa taq tinamit richin jalajoj ajawaren.
14Man rik'in ri' ri Jehová kan man xuya' ta q'ij richin xban ta poqon chike.
Koma k'a rije' xuya' rutojbalil-mak pa kiwi' ri rey kichin ch'aqa' chik ruwach'ulew.
15Y xubij chike chi man jun tikiben chike ri qati't-qamama' ri e rucha'on rija',
chi man jun tikiben chike ri e q'alajirisey ruch'abel.
16Ri Dios xuben k'a chi xpe wayjal pa ruwi' ri ruwach'ulew Canaán,
Xrelesaj k'a ri wey y ronojel ri achoq ik'in nikilij-ki'.
17Jak'a richin xerukol xuteq k'a jun achin nabey chikiwech rije' pa ruwach'ulew Egipto.
Ri achin ri' ja ri José ri xk'ayix-el richin xbe'ok samajel yuqul pa samaj.
18Xkiya' k'a pa cárcel y xkijitz' ri raqen rik'in ch'ich'.
Chuqa' xkixim ruqul rik'in cadena.
19Xtejtobex k'a roma ri Dios,
k'a toq xapon na richin nibanatej ri ch'abel ri rubin ri José.
20K'ari' ri rey xuteq k'a rubixik chi telesex-pe pa cárcel richin xrisq'opej-el.
Ri ajaw richin ri ruwach'ulew ri' xuya' k'a q'ij chire richin xkolotej-el.
21Xuben k'a chire richin xok aj-raqen pa ruwi' ri rachoch.
Kan xok k'a q'atoy-tzij pa ruwi' ronojel ri ajawaren.
22Ja ri José xk'utu chikiwech ri tata'al ri k'atzinel richin xkiben.
Xerutijoj k'a ri achi'a' ri k'o kiq'ij richin xe'ok aj-na'oj.
23Keri' toq ri qawinaq israelita xe'ok-apo pa ruwach'ulew Egipto.
Keri' ri aj pa rachoch ri Jacob xek'oje' chupan ri ruwach'ulew ri'.
24Ri Dios kan xuben k'a chi ri qawinaq kan janila xek'iyer.
Xuben k'a chike chi más kuchuq'a' chikiwech ri e etzelanel kichin.
25Xuben k'a chike ri aj-Egipto richin itzel xekitz'et.
Y xuben chi xpe itzel taq ch'obonik chikij.
26K'ari' kik'in rije' xuteq k'a ri Moisés, ri rusamajel.
Xuteq chuqa' ri Aarón ri kan xucha'.
27Rije' xkiben meyel taq banobel chikiwech ri aj chiri'.
Kan xkik'ut k'a ri banobel ri man jun bey e tz'eton, chiri' pan Egipto.
28Xuteq k'a pe jun nimalej q'equ'm pa ruwi' chijun ri ruwach'ulew,
jak'a ri aj chiri' xa kan man xkinimaj ta rutzij ri Jehová.
29Ronojel ri ya' ri ek'o chiri', xuben chire chi xok kik'.
Roma ri' k'a xeken ronojel ri taq ker ri ek'o chupan ri ya' ri'.
30Ri Jehová xuben chuqa' chi xebek'iyer-pe xkalet.
Re xkalet re' kan xe'okiyaj k'a pa taq kich'at ri q'atoy taq tzij.
31Xaxe rik'in ri ruch'abel ri Dios, xepe k'a ri pa taq tzobaj amolo'.
Kan xepe k'a chuqa' xenen chupan chijun ruwach'ulew Egipto.
32Pa ruk'exel job, xuya' k'a pe saqboch pa kiwi'.
Ruxaq q'aq' xuteq-pe pa ruwi' ri ruwach'ulew ri'.
33Re' kan xuk'is k'a ri kitiko'n richin uva y ri che' richin wíkix.
Kan xeruq'ajala' k'a ronojel ri che' richin ri ajawaren ri'.
34Xaxe xch'on ri Jehová, kan jari' xepe sak' pa ruk'iyal.
Kan janila k'a chi chikopi' ri xek'oje' chirij ri tiko'n, kan man e ajlatel ta chik.
35Kan xkik'is k'a ronojel ri q'ayis ri k'o chuwech ri ruwach'ulew ri'.
Kan xkitej k'a ronojel ri nuwachij ri ulew ri'.
36K'ari' xerukamisaj-el konojel ri e nabey taq al alaboni'.
Xeruk'uaj k'a konojel ri e nabey richin ri kuchuq'a'.
37Chirij ri' ri Jehová xerelesaj k'a el chiri',
y xyalox-el saqipueq y q'anapueq chike.
Kan man jun k'a chikikojol rije', ri maneq ta ruchuq'a' richin xebe.
38Ri aj-Egipto xekikot k'a toq xe'el-pe chikikojol.
Y ri kikiy ri qati't-qamama' xa kan qajineq chik k'a pa kiwi' rije'.
39Ri Jehová xurik' k'a jun sutz' pa kiwi' ri qati't-qamama' richin xok kimujal.
Rik'in k'a jun nimalej ruxaq q'aq' xerusaqirisaj ri chi'aq'a'.
40Xkik'utuj ti'ij chire ri Jehová y rija' xuben chi xepe saqkorowach richin xekitej.
Kan xerutzuq k'a rik'in ri aj-chikajil-wey.
41Xujeq k'a ri nimalej abej,
y kan xuben chi xbebulbu'x-pe ri ya' chupan.
Kan xbiyin k'a el chupan ri chaqi'j ruwach'ulew achi'el jun raqen-ya'.
42Keri' xuben ri Jehová roma ri ya'on tzij ri rubanon;
ri ruch'abel ri rubin kan chire ri Abraham, ri rusamajel.
43Xrelesaj k'a pe ri rutinamit rik'in kikoten.
Y rik'in k'a raqoj-chi'ij richin kikoten xe'el-pe chiri' ri e rucha'on rija'.
44K'ari' xuya' k'a chike ri kiruwach'ulew ri ch'aqa' chik winaqi'.
Ri kisamajin-qa ri winaqi' richin ch'aqa' chik tinamit jari' ri xkichinaj kan.
45Ronojel re', xuya' chike richin chi tikitaqej ri rupixa',
y richin chi tikibana' ronojel ri rubin rija' chike.
Kan tiqanimirisaj k'a ruq'ij ri Dios.
Currently Selected:
Sal 105: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
