Pro 7
7
Ch'abel ri nito'on richin man nitzeqelibex jun k'ulan ixoq
1Rix walk'ual alaboni', kan tibana' k'a ri ninbij chiwe yin
y kan kek'oje' ri pa taq iwánima, ronojel ri nupixa'.
2Kan tibana' wi k'a ri ninbij yin y re' xtuben chiwe chi xtik'oje' ik'aslen,
kan tiloq'oq'ej k'a ri tijonik ri nuya'on chiwe, achi'el niloq'oq'ej ri runaq' taq iwech.
3Ri nutijonik kan ke'iximila' ri chuwi' taq iq'a'
y kan ke'itz'ibala' chuqa' ri pa taq iwánima.
4Kan tiya' q'ij chi ri na'oj nok ta achi'el iwana',
chi ri utzilej ch'obonik nok ta achi'el jun chike ri iwach'alal.
5Y re', kan xtuben k'a chiwe chi yixrukol chuwech ri k'ulan ixoq ri yerukanola' achi'a',
kan yixrukol chuqa' chuwech ri ixoq ri jebel ok taq ch'abel ri yerubij chiwe.
6K'o k'a jun q'ij toq yin yitz'u'un-pe chukojol ri kokoj tzubel richin ri nu-ventana.
7Xentz'et k'a pe ri k'a e k'ajola' na,
y chikikojol rije' jun ri xa kan k'a man jani k'o ta runa'oj.
8Nutzuliben k'a chi ri ala' ri' niq'ax ri pa krusin-bey,
chunaqaj ri akuchi k'o-wi ri rachoch jun k'ulan ixoq.
9Ri ramaj ri' xqaqa yan k'a ri q'ij, kan nimoymot chik;
jari' nok yan pe ri aq'a' y niq'equmer-qa.
10Jari' toq ri ixoq ri' xbek'ulun-pe chuwech ri ala',
ruwiqon-ri' achi'el jun ixoq itzel ruk'aslen, y kan nowineq chubanik.
11Ri ixoq ri' kan niq'alajin k'a chi janila najowan
y jebel rubanik richin nich'on.
Kan man nukoch' ta nik'oje' pa jay, y xaxe ta pa bey nrajo' nik'oje-wi.
12Roma ri' toq man k'o ta pa bey, xa k'o chiri' akuchi nikimol-wi-ki' ri winaqi',
kan yeroyobej k'a ri achi'a' ri pa taq krusin-bey.
13Y keri' ri ixoq ri' kan xaxe k'a xutz'et ri ala' ri', jari' xuchop y xutz'ubaj ruchi',
y kan man juba' ruk'ix, xuchop k'a rubixik chire:
14Re wakami, yin kan k'o na k'a chi xinya' ri sipanik richin chi xjunamatej-nuwech rik'in ri Dios,
kan xinben yan k'a ronojel ri nusujun chire chi ninben,
15roma ri' kan xinel k'a pe richin chi nonya' jun oyonik chawe,
nurayiben chi yatintz'et, y matiox chi wakami xatinwil.
16Jari' nuchojmirisan chik kan ri warabel,
y ri pa ruwi' nuripiban k'a kan jun k'ul ri banon rik'in tzieq ri nipe pan Egipto.
17Kan e nuyalon chik k'a kan jubulej taq aq'om chirij,
jubulej taq aq'om ri e banon rik'in mirra, áloe y canela.
18Jo' k'a wik'in, kak'oje' kan wik'in re wakami, tiqak'owisaj k'a qak'u'x chi junaq'a',
y kan tiqaq'etela' y tiqatz'ubala' qachi' richin yojkikot.
19Roma ri wachijil xa maneq pa jay re wakami,
rija' nej beneq-wi y man jani nitzolej-pe.
20Rija' kan jun costal saqipueq k'a ri ruk'uan-el
y k'a ja toq xtinoj na ri ik', k'a jari' toq xtok'ulun chik pa jay, nicha' k'a ri ixoq.
21Y rik'in k'a ri ch'abel ri' xch'on rik'in ri ala' richin chi xuch'ek,
rik'in k'a ri buyul taq ruch'abel ri yerubij ri ixoq ri' xuben chire chi xunimaj rutzij.
22Y ri ala' kan xtzeqe' k'a el chirij, man retaman ta ri xtuk'uluwachij,
xa achi'el k'a jun bóyix ri yuqen-el richin chi nuk'uex k'a pa kamik,
o xa achi'el jun ri maneq runa'oj ri choj niberuq'ataba' kan ri'.
23Y ri' nunabej k'a, toq ri rusase' xkuyu yan roma jun ch'ab;
nuben k'a achi'el nuben jun tz'ikin ri choj niberuya-ri' pa pikbel,
y man retaman ta chi chiri' niberujacha' kan ri ruk'aslen.
24Wakami k'a, rix walk'ual alaboni' kan kiniwak'axaj k'a;
kan tiya' k'a ixikin chire ronojel ri nubin-qa chiwe.
25Kan man tiya' q'ij chire ri iwánima chi nitzeqelibej ri bey ri',
kan man k'a tik'uaj jun bey keri' y jantape' ix sachineq,
26roma ri ixoq ri' kan e k'iy k'a achi'a' ri e rusokon, ri xuben chike chi xetzaq,
kan janila k'a e k'iy ri e rukamisan.
27Ri bey k'a ri napon pa rachoch rija', xa bey ri nuk'uan pa q'aq',
xa choj yixruxuluba-qa k'a akuchi k'o-wi ri jay richin ri kamik.
Currently Selected:
Pro 7: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
