Pro 8
8
Ri utzil ri nuk'en-pe ri na'oj
1Ri na'oj kan nisik'in-wi k'a richin nusuj ri';
ri jebel ch'obonik kan rik'in k'a uchuq'a' ri noyon.
2Rija' kan nipa'e-wi k'a ri pa taq jotol richin nuq'alajirisaj-ri',
kan nipa'e-wi k'a ri pa taq cruzin-bey richin nuk'ut-ri'.
3Y chuqa' kan nik'oje' ri chikinaqaj ri okibel,
ri chiri' pa taq okibel kichin ri tinamit,
ri akuchi ye'el-ye'ok-wi ri winaqi'; ja ri chiri' k'a nuq'alajirisaj-ri' ri na'oj.
4Rija' kan kere' k'a ruq'alajirisaxik nuben:
Yin kan yixinwoyoj k'a chi'iwonojel rix winaqi',
ri nuch'abel yin kan yixroyoj rix ri ix rijatzul achin.
5Rix ri man k'iy ta iwetaman, kan tiwetamaj chi pa rubeyal niben rik'in ronojel,
rix ri man k'iy ta etamabel k'o iwik'in, kan tiwetamaj k'a yixnojin jebel.
6Kan kiniwak'axaj k'a, roma ri xkenbij chiwe kan k'o-wi kejqalen,
tiwak'axaj ri ch'abel ri xkerubij ri nuchi', roma kan ruyon pa ruchojmilal.
7Ri rusamaj ri nuchi' xaxe richin xkerubij ri qitzij;
yin kan man niqa' ta chinuwech yenbij tz'ukun taq tzij.
8Ronojel k'a ri ch'abel ri ninbij yin kan pa rubeyal k'a,
man yenbila' ta k'ixbel taq ch'abel, ni q'olonel taq ch'abel.
9Ronojel re' kan jebel-wi e q'alaj chikiwech ri winaqi' ri kan yech'obon,
y chuqa' kan e choj chikiwech ri kan k'o ketamabal.
10Kan más utz chi ja ri nutijonik yin ri nik'ul, y man ja ta ri saqipueq;
más utz chi ja ri wetamabal yin ri nicha' kan y man ja ta ri q'anapueq.
11Ri na'oj kan más rejqalen chikiwech ri wiqobel ri e banon rik'in q'anapueq y saqipueq,
y ronojel ri rayixel man tikirel ta chuqa' chi nijunamex rik'in ri na'oj.
12Yin, ri na'oj, kan junan k'a nuwech rik'in ri etamabel,
y kan yitikir ninbij chi yin in rachibil ri ch'obonik ri kan pa rubeyal.
13Toq kan k'o rukiy ri Dios chuwech ri wineq, kan nrixowaj ri man utz ta;
achi'el yin kan ninwixowaj ri nim nuna-ri', ri ruyon nuya-qa ruq'ij, ri ruyon itzel taq banobel ri yerubanala',
y ri ruyon tz'ukun taq tzij ri yeruben.
14Kan pa nuq'a' k'a yin, ri na'oj, k'o-wi ri ch'obonik y ri ruchojmilal,
kan pa nuq'a' k'a yin ri etamabel k'o-wi ri uchuq'a'.
15Kan woma k'a yin ri na'oj toq ri rey yetikir yekik'uaj ri kiwinaq,
y woma chuqa' yin toq ri q'atoy taq tzij yetikir yekibanala' utzilej taq pixa'.
16Y kan woma chuqa' yin toq ri e tata'al pa taq ruwach'ulew yetikir yeq'aton-tzij,
woma k'a yin, toq ri winaqi' k'o kik'ojlen, yeq'aton-tzij chuwech re ruwach'ulew.
17Yin yenwajo' ri ye'ajowan wichin;
y ri kan nikicha' kik'u'x richin yinkikanoj, kan chi'anin yinbekila-pe.
18Wik'in yin, rije' kan nikil k'a beyomel y kiq'ij-kik'ojlen,
wik'in yin kan utz wi k'a yek'oje' y nikil chuqa' ch'akonik.
19Más k'iy utzil ri nink'en-pe yin ke chuwech ni nuk'en-pe ri q'anapueq y ri abej topacio
ri ch'akoj wik'in yin más k'iy ke chuwech ri nuya' ri saqipueq.
20Ri bey ri nuk'uan yin kan jun bey richin ruchojmilal,
chuqa' ri nubey yin kan pa rubeyal k'a.
21Yin kan ninsipaj-wi beyomel chike ri ye'ajowan wichin
yin kan ninya' k'a más beyomel chikichin.
22Yin ri na'oj kan ink'o chik k'a rik'in ri Dios ri pa rutikeribel,
kan ink'o k'a pe rik'in toq k'a man jajun samaj tuchop rubanik.
23Yin kan ink'o-wi-pe rik'in ri Dios, toq k'a man jajun k'o,
yin kan pa rutikeribel ink'o-pe;
kan ink'o chik toq kan k'a man jani k'o ta re ruwach'ulew.
24Yin kan yisamej chik k'a toq man jani ek'o ta ri siwan chupan ri nimalej taq palou,
toq kan k'a man jani ek'o ta ri kalaxbal ri nimalej taq raqen-ya'.
25Yin kan yisamej chik k'a toq k'a man jani ek'o pa kik'ojelibal ri nima'q taq juyu',
kan ink'o chik k'a nabey chikiwech ri kokoj taq juyu'.
26Chupan ri q'ij ri' ri Dios kan man jani k'a tuben re ruwach'ulew, ni ri tikonbel-ulew,
toq kan k'a man jani tuben ni jun ti k'olaj ulew richin re ruwach'ulew.
27Yin kan ink'o chik k'a chiri' toq ri Dios najin chubanik ri kaj,
toq rija' kan najin k'a chubanik ri rukojol ri kaj y ri ruwach'ulew.
28Kan ink'o chik k'a toq ri Dios yeruyala', yeruchojmirisala' ri sutz' ri chikaj,
toq rija' kan nuyala' k'a kan kuchuq'a' ri alaxibel taq ya' ri ek'o pa xulan.
29Yin kan ink'o chik k'a toq ri Dios nuya' kan rubeyal pa ruwi' ri palou,
y ri ya' ri' kan man tikirel ta k'a chi nuq'ej ri rupixa' ri Dios;
kan ink'o-wi k'a toq ri Dios xutik kan ri ruxe' re ruwach'ulew.
30Kan ink'o-wi k'a rik'in ri Dios yisamej achi'el ri nibanon-q'anej jun nimalej samaj,
y kan xuk'en k'a pe kikoten chire rija', ri samaj ri xebanatej,
y yin kan yikikot k'a ink'o-apo ri akuchi k'o-wi rija'.
31Yin kan yikikot-wi k'a rik'in ri rubanik xuben kan ri ruwach'ulew,
ri akuchi ri winaqi' kan nikiya' kikoten chuwe rik'in ri yekibanala'.
32Wakami k'a, kan kiniwak'axaj rix walk'ual alaboni',
kan jebel wi k'a ruwa-kiq'ij ri kik'uan ri nubey yin.
33Kan tiwetamaj k'a ronojel ri ix nutijon-wi, y xkixok aj-na'oj.
man timalij kan ronojel ri tijonik ri nuya'on chiwe.
34Jebel ruwa-ruq'ij ri wineq ri kan yirak'axaj;
ri kan q'ij-q'ij k'o-apo chuchi' ri wachoch,
ri kan royoben chi nril-el kikoten.
35Ri wineq ri kan yiril yin ri na'oj, kan nril-wi k'aslen,
roma kan nril-wi ri utzil ri nuya' ri Dios.
36Jak'a ri wineq ri xa man yirukanoj ta y xa yirujech'ej kan, nroyoj k'a ruk'ayewal pa ruwi',
roma ri wineq ri man najowan ta wichin, xa kan nrajo' wi ri kamik,
keri' k'a ri ch'abel ri nubij ri na'oj.
Currently Selected:
Pro 8: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
