Pro 6
6
Pixabanik chike ri nikiju' kan ki' chuxe' jun k'as
1Rix walk'ual alaboni', wi kan xipaba-iwi' chuwech jun k'as ri xuben jun iwachibil,
xa kan achi'el k'a chi xik'ayij-iwi' chire jun wineq ri xa man iwetaman ta ruwech.
2Rix kan xixxime' k'a kan roma ri ch'abel ri xibij kan,
kan xixqaqa k'a kan pa ruq'a' ri wineq ri', roma ri ch'abel ri xe'el pan ichi'.
3Wakami k'a, rix walk'ual alaboni', kan kere' k'a tibana' richin nikol-iwi' chuwech ri k'as ri',
roma re wakami kan pa kiq'a' ri iwachibil ixk'o-wi,
kan kixapon kik'in, kan kixkamela'an chikiwech,
tinataj ri k'as chike stape' man niqa' ta chikiwech.
4Kan tibana' chi tiwelesaj iwaran,
kan man tiya' q'ij chi ri ruchi' ri runaq' taq iwech yetz'apetej-qa roma ri waran.
5Xa kan titija' k'a iq'ij nikol-iwi' chuwech ri k'as, achi'el nukol-ri' ri masat chuwech ri kanonel,
kan tikolo-iwi' achi'el nuben ri aj-xik' chikop chuwech ri pikbel richin ri chapoy-chikop.
Pixabanik chike ri e q'ori'
6Rat ri k'o aq'oral richin yasamej, tatzu' ri nikiben ri taq sanika',
tatzu' ri nikiben jantape' chupan ri kik'aslen y tak'ama ana'oj chiri'.
7Rije' kan man jun ri k'o chikikojol ri nibin ta chike ri achike k'o chi nikiben,
kan man jun ri nitz'eton ta kichin y ri niya'on ta ri ruchojmilal chike richin yesamej.
8Man rik'in ri' rije', ri pa saq'ij nikiyek kan ri xtik'atzin chike,
kan nikimol kan ruchi' ri kiway, pa ruq'ijul toq yek'ol kiwech ri tiko'n.
9¿Y rat q'or kan jantape' k'a xkakotz'e' kan chiri' y man jun naben?
¿K'a jampe' k'a xkayakatej-pe y yatane' richin yawer?
10Roma rat, juba' yawer, juba' amoyin ri runaq' taq awech,
y juba' chik xa aq'eten aq'a' y xa man jun naben.
11Y toq xtanabej kan jari' k'a xtok'ulun ri meba'il awik'in,
achi'el toq nok'ulun jun wineq ri pan awachoch, ri nej peteneq-wi;
kan k'o k'a xkebek'atzin-pe chawe, y xkepe chawij achi'el achi'a' richin pan oyowal.
Ri rubanik jun wineq ri kan itzel ruk'aslen
12Jun wineq ri kan man jun utz ri pa ruk'aslen, ri kan itzel wineq,
kan ruyon ch'abel richin q'oloj ri ye'el pa ruchi'.
13Ri ruchi' ri runaq' taq ruwech, kan yerukusaj richin nroyoj jun wineq chubanik etzelal,
yerukusaj ri raqen richin nuben retal chire jun chik wineq
yerukusaj ri ruwi' taq ruq'a' chubanik etzelal,
14xaxe ri etzelal ri nrajo' nuben chike ri winaqi',
xaxe ri etzelal ri yeruch'obola' chikij ri winaqi',
y xaxe ri etzelal nutikila' chikikojol ri winaqi'.
15Y roma k'a ri rubanobal kan itzel wi, toq k'a xtuna' niqaqa ri wululen chirij
y kan man jun chik banel richin chi nikolotej ta, xa xtik'is roma ri ruk'ayewal ri xtiqaqa pa ruwi'.
Ri banobel ri nretzelaj ri Jehová
16Ri Jehová kan yeretzelaj k'a waqi' banobel richin ri wineq ri ruyon itzel k'o pa ruk'aslen,
y toq kan napon-q'anej k'a pa wuqu', kan más nretzelaj y nuya' q'axo'n chire ri ránima.
17Y jare' k'a ri wuqu' banobel ri más nretzelaj rija':
Ri nimirisanen;
ri tz'ukuj-tzij;
ri banoj kamik;
18ri itzel taq nojibel,
ri aqanaj ri kan anineq nibe chubanik etzelal;
19ri tz'ukuj-tzij ri yebanatej pa q'atbel taq tzij,
y ri wineq ri nitz'uku oyowal chikikojol rach'alal.
Ri k'ulan wineq utz chi nuchajij-ri'
20Rix walk'ual alaboni', kan tibana' k'a iwichin chire ri pixa' richin ri itata'
y chuqa' man tiwixowaj ri tijonik richin ri ite'.
21Kan jantape' k'a kek'oje' ri pa taq iwánima y man kesolkopitej-el,
kan ke'ixima' k'a chi'iqul, richin kan jantape' k'o chi'ik'u'x,
22Re ruchojmilal re', kan yixruyuqej chupan ri ik'aslen,
toq yixwer, kan yixruchajij k'a;
y toq yixk'astej, kan achi'el nitzijon iwik'in.
23Roma ronojel re ruchojmilal re', kan achi'el jun lámpara richin saqil,
ri tijonik kan nisaqirisan-wi chupan ri ik'aslen,
y ri ch'olinik richin etamabel, jari' ri bey richin ri k'aslen.
24Chuqa' ri pixa' y ri tijonik ri' kan xkixruchajij chuwech ri ixoq ri man utz ta ruk'aslen,
kan xkixruchajij chuwech ri buyul taq ch'abel richin jun ixoq ri man iwetaman ta ruwech.
25Kan man k'a tirayij chi iwichin ta rix ri jun jebejoj ok ixoq ri',
y kan man k'a kixqaqa pa ruq'a' rik'in ri rubanik ri yixrutzu'.
26Ri ixoq, ri itzel ruk'aslen, yerukanoj ri achi'a' richin nuch'ek ruway chikij,
jak'a ri k'ulan ixoq, yerukanoj achi'a' roma kan ja ri kik'aslen ri nrajo'.
27Jun achin, wi niberuk'ama-pe racheq-q'aq' y nuya' chuwa-ruk'u'x richin nuq'etej,
ri rutziaq rija' kan xkek'at-wi.
28Chuqa' wi jun achin nibiyin pa ruwi' racheq-q'aq',
ri q'aq' ri' kan xkerubalalej pa taq raqen.
29Y keri' ri nuk'uluwachij jun achin ri nuju' ri' rik'in jun k'ulan ixoq;
ri achin ri' kan xtrejqalej-wi k'a ri mak ri'.
30Jun wineq ri neleq' roma ninum y kan man jun ninaben richin,
kan man jun k'a ri xtich'ojin chirij.
31Jak'a wi ri wineq ri' nichapatej roma ri releq',
k'o chi nutoj ri xuben, kan k'o chi nutoj wuqu' mul más ri rajel ri xreleq'aj,
stape' kan k'o chi yeruya-el ronojel ri k'o rik'in.
32Jak'a ri achin ri nuju-ri' rik'in jun k'ulan ixoq,
xa ruyon rija' nroyoj wululen chirij, roma kan man nich'obon ta juba'.
33Y ri achin ri' xa xtikajtej y xtik'ayewatej k'a,
kan xtik'ixbitej k'a kan chupan chijun ruk'aslen y man jun bey chik xtel ri k'ix ri' rik'in.
34Jak'a ri rachijil ri k'ulan ixoq, roma janila nrajo' ri rixjayil, xtipe ch'upun-k'u'x rik'in,
y toq napon k'a ri q'ij richin nrelesaj royowal chirij ri ruk'ulel, kan man xtujoyowaj ta ruwech.
35Y roma royowal ri achijlonel, stape' k'iy ri nisujulux chire, kan man jun ri nrajo',
y stape' ta nipuaqix kan man nik'o ta ri royowal.
Currently Selected:
Pro 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
