Pro 20
20
Man tiben ri xa man utz ta
1Ri vino nuben chire ri wineq chi maneq ruk'ix y ri ruya'al manzana ch'amirineq nuben chire chi nuben oyowal;
y ri winaqi' ri yeqaqa pa kiq'a' ri q'abarisanel taq ya' ri', kan maneq k'a utzilej na'oj kik'in.
2Kan achi'el nureq ruchi' ri koj, kan keri' niq'ajan toq nureq ruchi' ri rey toq royowal;
y ri wineq ri nibanon chire ri rey chi niyakatej royowal, rik'in juba' xa nuya-ri' pa kamik.
3Ri wineq ri kan man niqa' ta chuwech nuben oyowal, ri yetz'eton richin kan nikiya-wi ruq'ij roma ri';
jak'a ri winaqi' ri xa maneq kina'oj, kan niqa' chikiwech nikiben oyowal.
4Ri wineq q'or kan roma nuchop-el ri q'ij richin tew, kan man nibe ta chusamajixik ri rulew;
y k'a toq nutz'et na chi ri ch'aqa' nikik'ol ruwech ri kitiko'n, keri' chuqa' nrajo' nuben rija', y xa man jun niberuk'ama-wi-pe.
5Ri ch'obonik ri ek'o pa ránima ri wineq, xa achi'el jun ya' ri janila nim rupan;
jak'a ri wineq ri k'o retamabal, kan nitikir nuben chike chi yebek'ulun-pe chuwa saqil.
6Kan ek'o-wi k'a achi'a' ri nikiq'alajirisaj chi rije' kan janila jebel kina'oj;
jak'a jun wineq ri kan nuben-wi ri nubij, kan man jun xtilitej.
Ri wineq nik'atzin chi nuben ri utz
7Ri chojmilej wineq, kan tz'aqet-wi ri ruk'aslen ruk'uan,
kan jebel k'a ruwa-kiq'ij ri ak'uala' ri yeralk'ualaj kan y yek'oje' kan chirij rija'.
8Toq ri rey nitz'etetej chi tz'uyul ri chiri' pa rutz'uyubal, chiri' pa q'atbel-tzij,
xaxe rik'in yerutzu-pe, kan chi'anin nretamaj ri achike ri aj-mak.
9¿Kan nitikir kami nubij ri wineq? Yin kan nuchajin-wi' y roma ri' ri wánima kan ch'ajch'oj.
¿Y kan nitikir ta kami chuqa' nubij? Yin kan in ch'ajch'oj y man jun mak k'o ri pa nuk'aslen.
10Toq ri wineq ri kan k'o etabel rik'in richin niloq'on y kan k'o etabel rik'in richin nik'ayin,
chi ka'i' etabel ri' man yeqa' ta chuwech ri Jehová.
11Jun ala' kan chi'anin netamex ruwech, xaxe rik'in nitz'et ri achike niqa' chuwech nuben;
kan chi'anin-wi nitz'etetej roma ri utz y ri ch'ajch'oj ri yeruben.
12Ri rusamaj ri ruxikin ri wineq, richin nak'ex y ri rusamaj ri runaq' taq ruwech, richin nitzu'un;
chi ak'axabel y chi tzubel, kan ja wi ri Jehová banayon kichin.
13Man xaxe waran tawajo', roma wi keri' xtaben, xa xtik'is-qa ri k'o awik'in;
xa tawelesaj ri awaran richin yasamej y kan q'ij-q'ij xkawa' jebel.
14Toq ri wineq loq'onel napon richin niloq'on, nubij: Jotol-jotol ri rajel nak'utuj chire;
y toq xloq'on yan el y beneq chik, nubij-qa pa ránima, xino'on richin xinben-pe re loq'oj re'.
15Ri q'anapueq k'o xabakuchi, y chuqa' keri' ri jebelej taq abej;
jak'a ri man kan ta nilitej y jari' ri más rejqalen, ja ri ruchi' ri wineq ri nich'on rik'in na'oj.
Ri wineq kan tuch'obo' k'a ri achike yerubij
16Rat kan tak'ama' k'a kan ri rutziaq ri wineq, ri xupaba' kan ri' chuwech ruk'as jun chik;
tabana' chi k'o tuyuquba' kan ri wineq, ri xupaba' kan ri' chuwech ri ruk'as jun chik wineq.
17Ri wineq kan ki' nuna' toq nutej-qa ruway, ri xa peteneq rik'in itzel ch'akonik;
jak'a ri chua'q-kabij-apo, xa xtibenoj pa ruchi' chi wachawik sanayi'.
18Kan tak'utuj k'a ana'oj chike ri winaqi', richin chi ronojel utz ye'el chawech;
kan jebel k'a runuk'ik tabana' chire ri ach'obonik, k'ari' tanima-awi' ri pa labal chirij jun tinamit.
19Jun wineq kamuluy-tzij kan man nitikir ta nutz'apej ri ruchi';
man tawachibilaj k'a ri wineq ri'.
20Wi jun alk'ualaxel kan nroyoj itzel pa kiwi' ri rute-rutata',
re alk'ualaxel re' xa chi'anin yan k'a xtiken-el y xtok pa q'equ'm.
21Jun beyomel ri kan pa rutikeribel-pe man choj ta ruch'akik,
kan man jun bey k'a xtapon ta ri q'ij richin chi niqaqa ta urtisanik pa ruwi'.
22Rat kan man jun bey k'a tabij chire jun wineq: Nabetojo' na pa nuq'a',
xa más utz tawoyobej chi ja na ri Jehová nichojmirisan ri' y xkarukol chuwech jun ch'a'oj.
23Ri abej richin ri etabel ri xa pa rubanik chi man tz'aqet ta, ri Jehová kan nretzelaj;
y chuqa' rija' kan yeretzelaj ri etabel ri man choj ta yepajon.
24Ri Jehová kan rubanon chik k'a pe ri rubeyal ri ruk'aslen ri wineq.
Roma ri' ¿achike rubanik toq ri wineq nretamaj rubeyal ri ruk'aslen?
25Kan jun pikbel chire ri wineq toq kan k'o nusuj y xa man nuch'ob ta jebel rij ri nusuj,
y kan k'a toq k'achojineq chik na ri k'o chi nuben,
k'ari' nuch'ob rij jebel chi xa man utz ta ri xuben.
Ri nitikir nuben jun wineq
26Ri rey ri kan nowineq, kan nitikir k'a yerutaluj-el ri winaqi' ri e itzel,
y k'ari' nuteq kich'ayikil, achi'el niban chire ri trigo.
27Ri q'aq' richin saqil ri ruya'on ri Jehová chire ri achin, ja ri k'aslen ri xuk'ul-pe pa nabey;
y re saqil re' kan yeruq'alajirisaj-pe ri e yakel y e ewatel rik'in-qa rija'.
28Ri kow nichapo richin ri rey, ja toq kan jebel runa'oj y kan k'o ri qitzijri'il pa ruk'aslen.
Jari' ri nibanon chi man jun nisilon y nelesan-el ri pa rutz'uyubal.
29Ri nibanon chi ri alaboni' k'o kiq'ij, ja ri uchuq'a' ri k'o kik'in;
jak'a ri nibanon nima'q chike ri rijita'q taq winaqi', ja ri nisaqir ri rusumal taq kiwi'.
30Ri sokotajik ri yeruk'ul ri wineq pa ruk'aslen, richin yerelesaj-el ri etzelal y nich'ajch'ojir kan;
y keri' chuqa' ri kajtajik ri yeruya' ri k'aslen chire ri wineq, nuch'ajch'ojirisaj ri ránima.
Currently Selected:
Pro 20: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
