Popular Bible Verses from Pro 20

Share

Rat kan man jun bey k'a tabij chire jun wineq: Nabetojo' na pa nuq'a', xa más utz tawoyobej chi ja na ri Jehová nichojmirisan ri' y xkarukol chuwech jun ch'a'oj.

Ri Jehová kan rubanon chik k'a pe ri rubeyal ri ruk'aslen ri wineq. Roma ri' ¿achike rubanik toq ri wineq nretamaj rubeyal ri ruk'aslen?

Ri q'aq' richin saqil ri ruya'on ri Jehová chire ri achin, ja ri k'aslen ri xuk'ul-pe pa nabey; y re saqil re' kan yeruq'alajirisaj-pe ri e yakel y e ewatel rik'in-qa rija'.

Ri ch'obonik ri ek'o pa ránima ri wineq, xa achi'el jun ya' ri janila nim rupan; jak'a ri wineq ri k'o retamabal, kan nitikir nuben chike chi yebek'ulun-pe chuwa saqil.

Jun wineq kamuluy-tzij kan man nitikir ta nutz'apej ri ruchi'; man tawachibilaj k'a ri wineq ri'.

Ri wineq ri kan man niqa' ta chuwech nuben oyowal, ri yetz'eton richin kan nikiya-wi ruq'ij roma ri'; jak'a ri winaqi' ri xa maneq kina'oj, kan niqa' chikiwech nikiben oyowal.

Ri chojmilej wineq, kan tz'aqet-wi ri ruk'aslen ruk'uan, kan jebel k'a ruwa-kiq'ij ri ak'uala' ri yeralk'ualaj kan y yek'oje' kan chirij rija'.