Pro 18
18
Ri rukojol ri ruk'aslen ri wineq aj-na'oj rik'in ri man aj-na'oj ta
1Ri wineq ri ruyon rija' nrajo' nik'oje', kan ja ri itzel taq rurayibel rija' ri nuben;
roma ri' rija' kan niyakatej stape' chirij ri utzilej na'oj, roma man niqa' ta chuwech ri chojmilal.
2Ri wineq ri maneq runa'oj kan man niqa' ta chuwech ronojel ri nuk'en-pe ri ch'obonik;
roma xaxe niqa' chuwech ri nich'obotej chuwech rija'.
3Toq ri mak nok k'a pa ruk'aslen jun wineq, kan nuk'en chuqa' pe k'ixbel taq banobel;
y re' kan nuqasaj ruq'ij ri wineq y nuben chire chi nuk'ul etzelanik.
4Ri nimalej taq ch'abel ri ye'el pa ruchi' ri achin aj-na'oj, junan rik'in jun ya' ri nim rupan;
y ri akuchi nalex-wi-pe ri na'oj, kan junan rik'in jun alaxibel-ya' ri nibulbu'x nel-pe.
5Kan man ruk'amon ta chi utz niban rik'in ri wineq itzel,
richin chi ri wineq choj ruk'aslen, xa jari' ri nibe kan chuxe' ri ch'a'oj.
6Roma ri ch'abel ri yerubila' ri xa maneq runa'oj, jari' ri niju'un richin pa taq oyowal;
ri ch'abel ri ye'el pa ruchi' rija', xa nuben chike ri winaqi' chi kan nikirayij nikich'ey.
7Ja ri ruchi' ri wineq ri maneq runa'oj, jari' ri nibanon chire chi nitzaq;
kan ja wi ri ruchi' rija', jari' ri nibanon chi niqaqa pa pikbel ri ruk'aslen.
8Ri ruch'abel jun wineq ri niyako tzij chirij jun chik wineq, kan ki-ki' achi'el jun munil;
ri ch'abel ri' kan napon k'a chupan ri ránima ri jun chik wineq.
9Ri wineq ri kan man jun rayibel rik'in richin chi nuben ri rusamaj,
xa junan k'a rik'in ri wineq ri kan niqa' chuwech nuwulaj ronojel.
10Kan achi'el ri Kowilej Torre, keri' chuqa' ri rubi' ri Jehová,
roma ri' ri wineq choj ruk'aslen nukuquba' ruk'u'x rik'in y napon chiri' richin nuto-ri'.
11Chuwech ri wineq beyom, ri rubeyomel kan achi'el jun tinamit ri sutin-rij chi tz'aq;
kan nuch'ob k'a chi ri rubeyomel achi'el jun tz'aq ri nej jotol chikaj, roma ri' man jun ri nitzaqo richin.
12Ri nabey ri nipe pa ránima ri wineq ja ri nunimirisaj-ri' y k'ari' noqaqa ri vululen;
jak'a toq noqaqa ri qasanri'il nabey pa ránima ri wineq, nuk'en-pe ri k'ojlemal.
13Ri wineq ri kan chi'anin nich'on yan y xa k'a man jani tik'is-apo rubixik chire ri najowex nik'utux chire;
xa nuk'ut chi maneq runa'oj y xa ruyon rija' nuya' ruk'ix.
14Ri wineq ri k'o rayibel rik'in richin nik'ase', jari' ri nibanon chire chi kan nukoch' jun yabil;
jak'a ri wineq ri xa rumalin chik ruk'u'x, man q'alaj ta wi k'o jun ri xtitikir xtito'on richin.
15Ri wineq ri kan nowineq ránima, kan xtuq'i' k'a q'anej ri na'oj;
roma ri winaqi' e aj-na'oj, kan niqa-wi chikiwech niketamaj más na'oj.
Ri ch'ojikil ri napon pa taq q'atbel-tzij
16Ri sipanik ri nuben jun wineq chire jun chik, kan nuben k'a chire chi nuch'ek-apo ruk'ojlen rik'in;
re sipanik re' kan nitikir k'a nuya-apo chikikojol ri k'o nima'q kiq'ij.
17Toq k'o jun ch'ojinik napon chuwech jun q'atoy-tzij, kan niq'alajin chi ja ri nich'on nabey jari' ri choj;
y k'a toq nich'on na ri rachpochel ri nich'ojin chuqa', k'ari' xtitz'et achike ri aj-mak.
18Ri sakinik ri niban toq k'o ch'ojinik chikikojol e ka'i', kan nuchojmirisaj-wi ri oyowal;
keri' chi e ka'i' ch'ojinela' xa nik'is ri oyowalen chikikojol.
19Wi kan k'o itzel ri abanon chire ri awach'alal, kan man xkatok ta rik'in,
roma xa nukowirisaj-ri' achi'el jun tinamit ri k'o tz'aq chirij;
y ri man junan ta awech rik'in ri awach'alal,
xa kan achi'el ri nawajo' ta yatok-apo pa jun jay ri k'o k'arak'ik ch'ich' chuchi'.
Ri nuk'ul ri wineq kan achi'el ri rubanobal
20Ronojel ri nubij ri wineq rik'in ri ruchi', kan niwachin k'a y rik'in ri' xtik'ase-el chuwech re ruwach'ulew;
kan niq'alajin k'a chi ri chapayon richin ri ruk'aslen, ja ri yerubij rik'in ri xerey.
21Ronojel ri ch'abel ri yerubij ri wineq kan k'o nuk'en-pe, nuk'en-pe kamik o nuk'en-pe k'aslen;
ri wineq achike na rukusaxik xtuben chire, wi richin utz o richin etzelal, roma chi ka'i' k'o rutojbalil.
22Ri achin ri kan nril rixjayil, janila jebel;
roma kan nril-wi k'a ri rutzil ri Jehová.
23Ri wineq ri kan man jun ok k'o rik'in, kan nikamela'an toq nuk'utuj jun utzil;
jak'a ri wineq beyom toq nrak'axaj ri', kan rik'in kowilej taq ch'abel nich'on-pe rik'in.
24Ek'o achibil ek'o rik'in ri wineq toq utz rubanon y xeri' xa yebe;
y ek'o juley chik achibil ri kan jebel kina'oj, kan más e utz chikiwech ri ach'alalri'il.
Currently Selected:
Pro 18: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
