Neh 9
9
Ri winaqi' xkiq'alajirisaj ri kimak
1Y xkimol k'a ki' konojel ri nuwinaq, y chijun q'ij man jun kiway xkitej, xkikusaj kitziaq richin bis, y xkiya' poqolaj pa kijolon richin xkik'ut chi janila yebison. Y re' xbanatej chupan ri q'ij juwineq kaji' richin ri ik' wuqu'. 2Y rije' kich'aron chik ki' kik'in ri winaqi' ri xa man e qawinaq ta. Y e pa'el chiri' xkiq'alajirisaj ri kimak, y xkejqalej ri itzel taq kibanobal rije' y ri kite-kitata'. 3Y e pa'el k'a chiri' pa kik'ojelibal, y oxi' hora xsik'ix chikiwech ri wuj richin ri rupixa' ri Jehová, y chirij re' oxi' chik hora xkiq'alajirisaj ri kimak y xkiya' ruq'ij ri Jehová ri qa-Dios. 4Y ri jun tzobaj ri e levita xepa'e-q'anej pa jotol chire ri grada richin ri palibel. Y jare' ri kibi': Josué, Binuy, Cadmiel, Sebanías, Binui, Serebías, Baní y Quenaní. Rije' kan rik'in k'a kuchuq'a' xech'on richin xkiya' ruq'ij ri Jehová. 5K'ari' ri jun chik tzobaj levita; ri Josué, ri Cadmiel, ri Binuy, ri Hasabnías, ri Serebías, ri Hodías, ri Sebanías y ri Petahías, xech'on kik'in ri winaqi' y xkibij chike: Kixyakatej y tiqaya' ruq'ij ri Jehová ri qa-Dios ri kan k'o-pe y xtik'oje' ri tibe-q'ij tibe-seq, xecha'.
Y jari' toq ri winaqi' xkibij chire ri Jehová: 6Xaxe rat Jehová ri atk'o pa qawi', y man jun chik achi'el rat. Ja rat ri xabanon ri kaj ri tz'etel y ri man tz'etel ta, y xe'aben ri ch'umila', ri ruwach'ulew y ronojel ri ek'o chuwech. Keri' chuqa' xe'aben ri palou y ronojel ri ek'o chupan. Ja rat ri yaya'on ri k'aslen chike konojel ri ek'o, y roma ri' konojel ri ek'o chikaj nikiya' aq'ij. 7Rat Jehová ri qa-Dios, xacha' ri Abram, y rat xatelesan-pe pa tinamit Ur, richin ri ruwach'ulew Caldea, y xabij Abraham chire. 8Y xatz'et k'a, chi rija' kan xukuquba' ruk'u'x awik'in. Chuqa' kan xajikiba-atzij chire chi naya' chike ri rijatzul rija', ri ruwach'ulew kichin ri cananeo, ri hitita, ri amorreo, ri ferezeo, ri jebuseo y ri gergeseo. Y kan keri' k'a xaben roma rat kan naben ri nabij.
9-10Y rat kan xatz'et k'a ri tijoj-poqonal ri xkiq'axaj ri qate-qatata' pan Egipto. Y xaben nima'q taq banobel richin retal y nima'q meyel taq banobel chikikojol ri rey richin ri Egipto y ri aj-raqen, y konojel ri winaqi'. Re' xaben roma kan awetaman ri kinimirisanen y ri ketzelal ri xkiben chike ri qate-qatata'. Y roma ronojel ri xaben, kan xetamatej chijun ruwach'ulew, y roma ri' niqanataj ri abi'. Chuqa' xawak'axaj ri raqoj-chi'ij ri xkiben chiri' chuchi' ri Kaqa-Palou. 11Chuqa' xach'er k'a ri ya' ri' chikiwech rije' richin pa chaqi'j xe'ik'o-wi. Jak'a ri e oqotey kichin xaben chi xejiq' pa ruk'u'x ri ya' achi'el jun abej. 12Y toq xebiyin pa tz'iran ruwach'ulew ri paq'ij xe'ayuqej rik'in ri sutz' pa'el chikaj, y ri chi'aq'a' re sutz' re' xe'asaqirisaj ri akuchi k'o chi xebe-wi.
13Y k'ari' rat xaqaqa-pe pa ruwi' ri juyu' Sinaí richin xach'on kik'in rije' richin xaya' ronojel pixa' y ruchojmilal ri kan e choj. 14Keri' xak'ut chikiwech ri q'ij richin uxlanenri'il, y ronojel xajech pa ruq'a' ri Moisés ri asamajel. 15Xe'atzuq k'a rik'in ri wey ri xpe chila' chikaj toq rije' xenum. Xaya' k'a kiya' ri xel-pe chupan ri nimalej abej toq xchaqi'j kichi'. Xabij k'a chike chi nikichinaj ri ruwach'ulew, y rat kan xaya' k'a atzij chi ri ulew kan xok kichin.
16Jak'a ri qate-qatata' xa xkinimirisaj-ki' y kan xkikowirisaj ri kánima richin man xeniman ta chire ri apixa'. 17Rije' man xkajo' ta xatkak'axaj y man xoqaqa ta chikik'u'x ri meyel taq banobel ri xaben kik'in rije'. Y roma xkikowirisaj ri kánima, xkikanoj jun uk'uey kibey richin yetzolin chik kan pan ilinri'il chiri' pan Egipto. Jak'a rat at Dios ri nakuy ri mak, y man chi'anin ta k'a nipe awoyowal y kan janila najoyowaj kiwech y janila k'a ajowabel k'o awik'in y nim k'a ri awánima y roma ri' man xe'amalij ta kan, 18stape' toq xkiben jun ruwachibel alaj achij wákix ya'erisan pa q'aq' y xkibij chi ja ri' ri ki-dios ri xelesan-pe kichin pan Egipto. Chuqa' man xe'amalij ta kan toq rije' xkiben ch'aqa' chik itzel banobel ri kan xuben chawe richin xmulun ak'u'x.
19Rat kan janila xajoyowaj kiwech, y roma ri' man xe'amalij ta kan ri chiri' pa tz'iran ruwach'ulew. Ri rumujal ri sutz' man xeruya' ta kan chi paq'ij chi chaq'a' ri akuchi k'o chi xebe-wi. 20Kan xateq k'a pe ri utzilej a-Espíritu richin xerutijoj. Chuqa' kan beneq k'a ruwech xaya' ri kiway ri xpe chila' chikaj toq xenum, y xaya' kiya' toq xchaqi'j kichi'. 21Xe'awilij k'a kawineq juna' chupan ri tz'iran ruwach'ulew y man jun achike ta ri xk'atzin chike. Chuqa' ri kitziaq man xtziaqir ta chikij, ni man xesipoj ta ri kaqen roma ri binen.
22Xkichinaj k'a ajawaren y tinamit kichin ch'aqa' chik winaqi', richin xaya' ri kulew chikijujunal ri kijatzul. Xajech pa kiq'a' ri ruwach'ulew Hesbón ri akuchi xq'aton-wi-tzij ri Sihón, y chuqa' xajech ri Basán ri akuchi xq'aton-wi-tzij ri rey Og. 23Rat xaben k'a chi xewinaqir ri kalk'ual achi'el ri ch'umila' ri ek'o chikaj. Xe'ak'uaj k'a pa ruwach'ulew ri xasuj chike ri qati't-qamama', richin chi xkichinaj kan. 24Xe'ach'ek ri winaqi' ri ek'o pa Canaán, y kan xe'ajech ri ki-rey pa kiq'a' ri qati't-qamama', richin xkibanala' chike ri xkajo' rije'. Keri' ri qati't-qamama' xkichinaj k'a ri ruwach'ulew Canaán. 25Y rije' xekich'ek chuqa' ri tinamit ri e sutin-kij chi tz'aq y ulew richin tiko'n. Chuqa' xok kan kichin ri kachoch ri winaqi' aj chiri', jay e nojineq rik'in beyomel. Chuqa' xok kan kichin ri ralaxbel taq ya', utzilej taq qejoj ri tikon uva y che' olivo, chuwech y ronojel che' ri nuya' ruwech. Xkitej k'a ronojel ri' y janila k'a xeti'ojir. Y xekikot k'a roma ri awutzil rat.
26Jak'a ri qati't-qamama' xa xeyakatej chawij, y kan man xkitaqej ta k'a ri apixa'. Toq xe'ateq e q'alajirisey ri ach'abel richin xkibij chike chi titzolej-pe kik'u'x awik'in, xa xekikamisaj. Kan janila k'a nima'q taq mak xekibanala' y re' kan xuben chawe richin xmulun ak'u'x. 27Roma ri' xe'ajech pa kiq'a' ri e etzelanel kichin, richin xeya'ox pa tijoj-poqonal. Jak'a toq rije' xesik'in awik'in, rat kan k'a chila' chikaj xawak'axaj-pe ri raqoj-chi'ij ri'. Y roma k'a janila xajoyowaj kiwech, xe'ateq k'a pe koloy kichin, richin chi xekikol pa kiq'a' ri etzelanel kichin.
28Y toq k'o chik uxlanibel-k'u'x kik'in, jun bey chik xkiben ri etzelal chawech rat. Y roma ri' xe'amalij kan, y xaya' q'ij richin xeqaqa pa kiq'a' ri e etzelanel kichin y kan xekich'ek. Jak'a toq rije' xesik'in chik jun bey awik'in, rat kan k'a chila' chikaj xawak'axaj-pe ri raqoj-chi'ij, roma rat kan jantape' xajoyowaj kiwech y k'iy k'a mul xe'akol.
29Rat xabij k'a chike richin tikitaqej jun bey chik ri apixa'. Jak'a rije' xa janila k'a xkinimirisaj-ki' y man xeniman ta. Y xkiq'ej k'a ruwi' ri ruchojmilal ri nuya' k'aslen, chike ri yetaqen. Y rije' xa xatkimalij kan, xkikowirisaj-ki' y man xeniman ta chawe. 30Man rik'in ri' xe'akoch' k'iy juna'. Y ri Utzilej Espíritu xerukusaj ri e q'alajirisey ri ach'abel, richin chi xubij chike chi titzolej-pe kik'u'x awik'in. Jak'a rije' man xkajo' ta xkak'axaj. Y roma ri' xe'ajech pa kiq'a' ch'aqa' chik winaqi' ri ek'o chikinaqaj. 31Jak'a man rik'in ri', rat xajoyowaj kiwech y man xe'ak'is ta, y chuqa' man xe'amalij ta kan, roma rat at jun Dios ri k'o koch'onik y joyowanik awik'in.
32Roma ri' nimalej qa-Dios, ri k'o ronojel uchuq'a' awik'in y kan xaxe chawech rat ruk'amon chi yojbaybot. Rat ri xajikiba-atzij chiqawech y kan xaben ri xabij. Man ta ti ko'ol ok chawech re tijoj-poqonal re niqaq'axaj roj, ri e qa-rey, ri e qatata'al, ri e qa-sacerdote, ri e q'alajirisey ri ach'abel, ri e qawinaq y ri qate-qatata'. Ri qawinaq kan xkitej-pe poqon kan ja toq xepe ri aj-Asiria, k'a chupan re q'ij re'. 33Ri abanon rat kan pa ruchojmilal-wi chupan ronojel ri qak'uluwachin. Roj xa xatqamalij kan y xojmakun chawech, jak'a rat man jun bey oj aya'on kan y kan abanon-pe qik'in achi'el ri asujun-pe chiqe. 34Ri qa-rey, ri e qatata'al, ri e qa-sacerdote y ri qate-qatata' man xkinimaj ta ri apixa', ni man xkak'axaj ta ri ruchojmilal. 35Man xatkisamajij ta, stape' rije' xekikot rik'in ri utzilej taq ulew richin tiko'n ri xaya' chike.
36Rat xaya' re ruwach'ulew re' chike ri qati't-qamama', richin chi rije' xkitej ta ri ruwech ri tiko'n y chuqa' ronojel ri utz ri k'o wawe'. Jak'a re wakami tatzu' chi roj xa oj ximil. 37Re ruwach'ulew re' jebel niwachin, jak'a re wakami man qichin ta chik roj. Xa kichin chik ri rey ri xe'aya' pa qawi' roma ri qamak, y roma ri' rije' nikiben chiqe ri nikajo' y chuqa' kik'in ri taq qawej, y roma ri' ojk'o pa jun nimalej bis, xcha' ri Esdras.
Ri winaqi' xkiya' kitzij richin nikitaqej ri rupixa' ri Dios
38Y roma k'a ronojel re xbanatej, roj xqaben jun jikibel-tzij richin niqataqej ri rupixa' ri Dios. Roma ri' niqatz'ibaj y niqaya' kan re jun retal re' rik'in ri qabi' chupan re wuj re'; ri e qatata'al, ri e levita y ri e sacerdote.
Currently Selected:
Neh 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
