Neh 8
8
1Xqamol k'a qi' qonojel chupan ri tinamit Jerusalem akuchi niban-wi ri molojri'il ri akuchi ye'el-ye'ok-wi ri erey taq ya'. Y xkibij k'a chire ri Esdras ri aj-tz'ib chi tuk'ama-pe ri wuj richin ri pixa' ri ruya'on kan ri Moisés. 2Y chupan ri nabey q'ij chire ri ik' wuqu', ri sacerdote Esdras, xuk'en k'a pe ri pixa' ri', y xusik'ij chikiwech ri achi'a', ri ixoqi' y ri ak'uala' ri niq'ax chik chikiwech, ri kan kimolon-ki' chiri'. 3Y rija' xusik'ij k'a ri wuj chiri' chikiwech ri winaqi'. Nimaq'a' yan k'a xuchop y xtane' k'a pa nik'aj-q'ij. Y konojel k'a ri winaqi' ri' kan xkiya' k'a kixikin chire ri wuj richin ri rupixa' ri Jehová. 4Y toq ri Esdras xusik'ij ri wuj, k'o k'a pa ruwi' jun palibel ri banon rik'in che'. Y pa rijkiq'a' rija' ek'o k'a ri Matatías, ri Sema, ri Anías, ri Urías, ri Hilquías y ri Maaseías. Ri pa ruxokon ek'o k'a ri Pedaías, ri Misael, ri Malquías, ri Hasum, ri Hasbadana, ri Zacarías y ri Mesulam.
5Toq ri Esdras xujeq ri wuj konojel k'a ri winaqi' xkitz'et roma rija' k'o-q'anej pa ruwi' ri palibel, y kan jari' konojel ri winaqi' xepa'e-q'anej. 6Y rija' kan xunimirisaj k'a rubi' ri Jehová ri nimalej Dios y konojel k'a ri winaqi' xkiyakala' ri kiq'a' chikaj, y xkibij: ¡Ja' keri'! ¡Kan keri' wi!, xecha'. Y k'a ri' rije' xkixuk-xkimej-ki' richin xkiya' ruq'ij ri Jehová.
7Rokik ri winaqi' e pa'el pa kik'ojelibal, ri e levita xkibij ri achike nel chi tzij ri pixa'. Y ja kibi' re' ri xeq'axan chikiwech: Ri Josué, ri Baní, ri Serebías, ri Jamín, ri Acub, ri Sabetai, ri Hodías, ri Maaseías, ri Quelitá, ri Azarías, ri Jozabad, ri Hanán y ri Pelaías. 8Re achi'a' re' xkisik'ij jebel ri wuj richin ri rupixa' ri Dios, y kan xkiq'axaj chikiwech ri winaqi' achike nel chi tzij. 9Konojel k'a ri winaqi' toq xkak'axaj ri nubij ri pixa' janila k'a xe'oq'. Yin Nehemías, ri sacerdote Esdras y ri e levita ri yojq'axan chikiwech ri winaqi', xqabij k'a chike: Man jun k'a chiwe rix tibison, ni man jun toq', roma re q'ij re' kan ch'aron-wi chire ri Jehová ri qa-Dios, xojcha'.
10Y xeri' yin xinbij chike: Kixbiyin y tibetija' ti'ij y tibequmu' vino y tisipaj juba' chike ri man jun k'o kik'in richin nikitej, roma re q'ij re' kan ch'aron chire ri Jehová. Man jun tibison, xa kan kixkikot k'a chi'iwonojel, roma ri kikoten ri nuya' ri Jehová jari' ri quchuq'a', xicha'.
11Y chuqa' ri e levita kan xkikuqubala' kik'u'x ri winaqi' y xkibij chike: Man chik kixoq' roma re q'ij re' kan ch'aron chire ri Dios, y man ruk'amon ta chi rix yixoq', xecha'. 12Xeri' konojel ri winaqi' xebe y xewa-xe'uk'ya', chuqa' xesipan kik'in ri man jun k'o kik'in. Y kan xenimaq'ijun rik'in nimalej kikoten, roma xq'ax chikiwech ri tijonik ri xya'ox chike.
Nimaq'ij richin ri taq jay ri e banon rik'in ruq'a-che'
13Y ri jun chik q'ij xkimol chik ki' ri winaqi' ri' y chuqa' ri e sacerdote y ri ch'aqa' chik e levita. Rije' xkimol-ki' rik'in ri Esdras richin chi niq'ax más chikiwech ri pixa'. 14Y rije' xq'ax k'a chikiwech ri tz'ibatel chi k'o chi yek'oje' pa taq kachoch ri e banon rik'in ruq'a-che' chupan ri ik' ri'. 15Y jari' xya'ox k'a rutzijol chike konojel ri winaqi' ri ek'o pa taq tinamit y pa Jerusalem y kere' k'a xbix chike: Kixbiyin pa taq juyu' y tik'ama-pe ruq'a' taq che' richin ri olivo, ri e tikon y ri man e tikon ta, y ruq'a' q'echa', ruq'a' palma y ronojel ruq'a' taq che' ri k'o k'iy ruxaq, richin yeban taq jay chire achi'el ri tz'ibatel kan, xcha'.
16Xebe k'a ri winaqi' pa taq juyu' y xekik'amala' pe ri ruq'a' taq che' y xekiben k'a ri taq kachoch chikijujunal pa ruwi-q'anej ri kachoch, chuwa taq jay, chuwech rachoch ri Dios y akuchi nikimol-wi-ki' richin ye'el-ye'ok-wi ri erey taq ya' y akuchi k'o-wi ri bey ri nibe pan Efraín. 17Y qonojel ri xojtzolin-pe pa Babilonia xqaben ri taq qachoch rik'in ruq'a-che', y chiri' xojk'oje-wi. Y kan janila k'a xojkikot roma xqaben rik'in ronojel qak'u'x, roma kan pa ruq'ijul kan ri Josué ruk'ajol ri Nun, ri qawinaq man jun bey kibanon-pe re nimaq'ij re'. 18Y ronojel k'a q'ij ri Esdras xusik'ij k'a ri wuj richin ri pixa', k'a toq xapon na ri ruwaq q'ij xqaben jun nimalej molojri'il achi'el nubij ri pixa'.
Currently Selected:
Neh 8: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
