Neh 6
6
Ch'obonik richin nikixibij ri Nehemías
1Toq xk'achoj rupabaxik ri tz'aq, y man jun chik teq'etik xk'oje' kan, stape' man jani keqapaba-q'anej ri ruchi', jari' toq xkak'axaj ri Sambalat, ri Tobías, ri Guésem y konojel ri e etzelanel qichin. 2Y ri Sambalat y ri Guésem xkiteq rubixik chuwe y xkibij chi yin yinapon kik'in pa jun chike ri kokoj tinamit ri k'o chiri' pa taq'aj kojol juyu' rubini'an Onó. Re' xkiben roma xkich'ob richin nikiben jun itzel chuwe. 3Jak'a yin xenteq-el uk'uey rutzijol, y xinbij-el chike: Yin yitajin chire jun nimalej samaj, y roma ri' man yitikir ta yibe-qa. Wi yibe iwik'in rix jujik nipa'e' kan ri samaj, xicha-el chike. 4Kaji' mul xkiteq-pe rubixik chuwe, y yin chi kaji' mul junan rubixik xinteq-qa chike.
5Pa ro' mul ri Sambalat xuteq-pe jun chike ri rusamajela' wik'in, y ruk'amon-pe jun wuj ri man tz'apen ta pe. 6Y chupan re wuj re', kere' k'a nubij: Xak'axex chikikojol ri winaqi' richin ri ruwach'ulew, y kan keri' chuqa' nubij ri Guésem, chi rat y ri awinaq nich'ob chi yixyakatej chirij ri rey richin ri ruwach'ulew Persia, y roma ri' nipaba-q'anej ri tz'aq. Y chuqa' xak'axatej chi rat nawajo' yatok ki-rey. 7Keri' chuqa' nikibij, chi xe'akanoj yan ri q'alajirisey ruch'abel ri Dios richin keri' rije' xkeya'on rutzijol chi ja rat ri at rey chiri' pa Jerusalem y pa ruwi' ri Judá. Y re ch'abel re', xtrak'axaj ri rey Artajerjes. Y roma ri', qojch'obon y qojtzijon junan pa ruwi' re', xcha-el ri Sambalat.
8Y yin xinteq-el rubixik chire, chi ronojel ri nubij man qitzij ta, y re' xa ja rija' ri ninojin. 9Rik'in ronojel ri nikibij xkajo' ta chi xojkixibij. Rije' xkich'ob chi roj niqamalij kan ri samaj, richin keri' man nik'is ta rubanik. Jak'a yin xink'utuj chire ri Dios chi tuya' wuchuq'a'.
10Chirij re' xibe k'a chirachoch ri Semaías ruk'ajol ri Delaías y rumam kan ri Mehetabel, roma rija' rutz'apen-ri' pa rachoch. Y toq xich'on rik'in rija' xubij chuwe: Tiqewaj-qi' chupan ri rachoch ri Dios y qatz'apej ri ruchi', roma ri ye'etzelan awichin xkepe richin yatokikamisaj kan; y ja chaq'a' re' xkepe, xcha' chuwe.
11Y yin kere' xinbij: Jun achin achi'el yin ¿ruk'amon kami chi nanimej? ¿Utz kami chi yin ninkol-el-wi' pa rachoch ri Dios richin ninkol ri nuk'aslen? ¡Ni! Yin man xkinok ta pa rachoch ri Dios, xicha'. 12Y xq'ax chinuwech chi xa man rik'in ta ri Dios peteneq-wi ronojel ri nubij, xa ja ri Tobías y ri Sambalat xkitoj ri jun achin ri', richin xkitz'uk ri tzij ri'. 13Kan xkitoj ri Semaías richin keri' xinxibij ta wi' y ximakun ta chuwech ri Dios, richin keri' xech'on ta itzel ri nuwinaq chuwij, y chuqa' xkajo' xkiqasaj nuq'ij.
14Roma ri' xich'on rik'in ri nu-Dios y xinbij: Rat nu-Dios toqaqa k'a chi'ak'u'x ronojel ri xkiben chuwe ri Tobías y ri Sambalat. Y chuqa' ri jun ixoq Noadías y ri ch'aqa' chik, roma nikibij chi e q'alajirisey ri ach'abel, jak'a xa man qitzij ta. Rije' xkiben ronojel re' richin xkajo' xinkixibij, xicha'.
15Ri tz'aq xk'achoj k'a pa kawineq kablajuj q'ij, chupan ri q'ij juwineq wo'o' richin ri ik' Elul. 16Y toq xkak'axaj konojel ri e etzelanel qichin y ri ch'aqa' chik winaqi' richin ri ruwach'ulew ri ek'o chiqanaqaj roj, xkixibij-ki' y xek'ixbitej, roma xketamaj chi ja ri qa-Dios xbanon re samaj re'.
17Y chuqa' chupan ri q'ij ri' ri achi'a' ri k'o más kiq'ij chiri' pa Judá, k'o wuj xkitaqala' chikiwech. 18Roma rije' junan kiwech kik'in e k'iy chike ri aj-Judá richin xkito' ri Tobías, roma rija' ijaxel richin ri Secanías ruk'ajol ri Árah. Y ri Johanán ri ruk'ajol ri Tobías k'ulan rik'in ri rumi'al ri Mesulam ruk'ajol kan ri Berequías. 19Keri' chuqa' nikitzijoj chinuwech ri utz taq rubanobal ri Tobías, y chire rija' xkiq'axaj ri nuch'abel yin, rija' nutaqala-pe wuj richin chi yiruxibij yin.
Currently Selected:
Neh 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
