Neh 5
5
Ruk'ayewal chikikojol-qa ri winaqi'
1Chupan k'a ri q'ij ri', ri achi'a' richin ri tinamit y ri kixjayilal xkiben jun nimalej ch'ojinik chikij ch'aqa' qawinaq. 2Y ek'o k'a ri nikibij chi e k'iy kimi'al-kik'ajol ek'o, y roma ri' nik'atzin chi nikil kiway, richin keri' man yeken ta roma wayjal. 3Y ek'o ch'aqa' chik nikibij chi roma maneq chik kiway, roma ri' k'o chi xkiyuqubala' kan ri ruwujil ri kulew akuchi kitikon-wi uva y chuqa' ri ruwujil ri kachoch. 4Y ri ch'aqa' chik nikibij: Roma kan k'o chi niqatoj chire ri rey pa ruwi' ri qulew ri akuchi qatikon-wi uva y ri ch'aqa' chik qulew, k'o chi xqak'utula' méro pa qajik richin keri' k'o qik'in ri k'o chi niqatoj chire ri rey. 5Wakami qonojel k'a roj israelita, ri qalk'ual y ri qamam xa oj junan; xa junan ri qati't-qamama'. Man rik'in ri' ri qalk'ual xe'ok pan ilinri'il kik'in ch'aqa' chik qawinaq. Kan banatajineq chik k'a, chi ek'o chike ri qami'al e ximon chik pa samaj. Roj man jun yojtikir niqaben richin yeqakol roma ri qulew y ri qatiko'n richin uva xa kan kichin chik k'a ri qawinaq, xecha'.
6Y toq wak'axan chik k'a ri kisujunik ri nuwinaq, xyakatej janila woyowal chikij ri e banayon keri' chike, 7Y xinch'ob na k'a jebel y k'ari' xench'olij ri e tata'al y ri aj-raqen, roma ri nikiben kik'in ri qawinaq chi janila k'iy ral ri méro ri nikik'utuj chike. Roma ri' xenwoyoj pa jun nimalej molojri'il richin yojch'on pa ruwi' re ruk'ayewal re'. 8Y xinbij chike: Roj kan qatijon-pe qaq'ij richin e qakolon-pe ri qawinaq ri xek'ayitej-el chike ri ch'aqa' chik winaqi' richin jun chik ruwach'ulew. Y wakami, xa ja chik rix ri yixloq'on-qa kichin ¿Kan nich'ob rix chi ja roj k'o chi yojkolo chik kichin?, xicha'. Y rije' man xeq'ajan ta, kan man jun ch'abel xetikir xkibij.
9Y xinbij jun bey chik chike: Ri yixtajin chubanik rix man utz ta. K'o chi niqaya' ruk'ojlen ri qa-Dios, richin keri' man yetze'en ta chiqij ri winaqi' richin jun chik ruwach'ulew. 10Roma yin, ri e wach'alal y ri nusamajela' kan qaya'on méro pa qajik y jalajoj ruwech ixin pa jalik chike ri qawinaq xaxe richin yeqato', man richin ta yojch'akon. ¡Wakami k'a rix kan tikuyu' ri kik'as ri qawinaq! 11Y nink'utuj utzil chiwe chi titzolij ri kulew, ri kiqejoj ri kitikon uva y olivo chuwech y chuqa' ri kachoch. Y chuqa' xtitzolij ri ral ronojel ri ik'ulun chuwi-kiq'a', chuwech ri méro, ri jalajoj ruwech ixin, ri vino y ri aceite, xicha'. 12Rije' xkibij k'a chi xtikitzolij ronojel ri', y man jun xtikich'ojij chike. Chuqa' xkibij chi xtikiben achi'el ri xinbij. K'ari' yin xenwoyoj ri sacerdote, y chikiwech rije' xinben chi xkiya' ri xkisuj. 13Pa ruwi' ronojel re' yin xintotaj ri nutziaq y xinbij: Kere' k'a xtuben ri Dios chiwe y xkixrelesaj-el pan iwachoch y pan isamaj, y xtrelesaj-el ronojel ri k'o iwik'in k'a wakami wi man xtiben ta ri xisuj, xicha'. Konojel k'a winaqi' ri ek'o chiri' xkibij chi kan keri' xtibanatej. Y rije' xkiya' ruq'ij ri Jehová.
Ri rutzil ri Nehemías pa kiwi' ri ruwinaq
14Toq ri rey Artajerjes xutz'aqatisaj juwineq juna' richin nuq'et-tzij pa ruwi' ri ruwach'ulew Persia, jari' toq xiruya' kan aj-raqen pa ruwi' ri Judá, k'a toq xapon na ri juna' juwineq kablajuj chire ri ruq'atbal-tzij rija'. Chupan k'a ri kablajuj juna' ri', kan man jun k'a xqak'ul pa ruq'a' ri rey richin ta xqaq'axaj-qi', yin y ri wachibil y stape' kan in q'atoy-tzij. 15Jak'a ri e nabey aj-raqen chinuwech yin xekiya' kan pa k'ayew ri tinamit, roma kan q'ij-q'ij xkik'utuj waqlajuj onza saqipueq, y pa ruwi' ri' xkik'utuj kiway y ki-vino. Keri' chuqa' ri kisamajela' kan k'ayew xkiben chike ri qawinaq. Jak'a yin man keri' ta xinben, roma chinuwech yin, ri nu-Dios kan yalan-wi nim y janila rejqalen. 16Chuqa' yin xinben juba' chire re samaj re' richin niqapaba' ri tz'aq richin ri tinamit y konojel ri yesamej wik'in xek'oje' chupan ri samaj ri'. Y man jun k'a ulew xqak'en kan chikiwech.
17Y ek'o-pe wik'in 150 achi'a' ri e nuwinaq, achi'a' aj-samaj richin ri rey y ri ch'aqa' chik winaqi' ri ek'o chiqanaqaj y jari' ri xewa' wik'in. 18Y ri k'o chi ninya-apo ronojel q'ij richin nitij, jun bóyix, waqi' taq karne'l ri e cha'on; y ka'i-oxi' ek'. Jari' ri niqatej, y k'a pa taq lajuj q'ij xkik'en-pe más vino pa ruk'iyal. Rik'in ronojel re' man jun bey xink'utuj ri nuway roma ta in q'atoy-tzij, roma ri ek'o chiri' pa tinamit xa kan e ilin. 19Roma ri' yin xich'on rik'in ri nu-Dios y kere' xinbij chire: Nata' Dios, kinoqaqa k'a chi'ak'u'x, roma ronojel ri xinben pa ruwi' re tinamit re' kan utz ta k'a xuben chawech rat, xicha'.
Currently Selected:
Neh 5: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
