Neh 4
4
Ri e etzelanel nich'upun kik'u'x
1Toq ri Sambalat xrak'axaj chi roj yojtajin richin niqapaba' chik q'anej ri tz'aq, rija' janila xyakatej royowal y rik'in janila retzelal xtze'en chiqij. 2Y xch'on k'a kik'in ri e rachibil y kik'in ri aj-labal aj-Samaria y xubij: ¿Achike k'a yetajin chubanik re tzalatzeq y nakaneq taq israelita re'? ¿Nikich'ob rije' chi roma nikisuj kamelabel, xtikik'is ri samaj pa jun q'ij? ¿Nikich'ob rije' chi chukojol ri rupoqolajul y ruchajul ri xek'at yan yebe'el chik pe abej richin nikichojmirisaj ri tz'aq?, xcha'.
3Y ri Tobías ri aj-Amón k'o k'a apo chunaqaj rija', y xubij: Re tz'aq re yetajin chupabaxik rik'in abej, titz'eta' na pe toq xtipe jun ti utiw y niq'ax pa ruwi', jujik nuwulaj kan, xcha'.
4Jak'a yin Nehemías xich'on rik'in ri Dios y kere' xinbij: Tawak'axaj, rat ri at qa-Dios roj, roma man jun qejqalen niban chiqe. Roma ri' tabana' chi xtiqaqa ta k'a pa kiwi' rije' ri ketzelal, y xtimajtej ta k'a ri k'o rejqalen chuwi' kiq'a' koma ri e etzelanel kichin y xke'uk'uex k'a el pa tijoj-poqonal pa jun chik ruwach'ulew. 5Man taya' q'ij chi nik'is choj keri' ri kimak, ri xojkiyojobej y xojkiyoq' chikiwech ri winaqi' y xyakatej koyowal chiqij roj ri yojpaban-q'anej ri tz'aq, xicha'.
6Roj kan chi'anin xqapaba-q'anej nik'aj chire ri rupalen ri tz'aq, roma kan rik'in uchuq'a' xojsamej. 7Jak'a toq ri Sambalat, ri Tobías, ri achi'a' aj-Arabia, ri aj-Amón y ri aj-Asdod xkak'axaj chi ri tz'aq xa xechojmirisex yan, y chuqa' ronojel ruchi' ri tinamit nitz'apetej yan, jari' toq xyakatej janila koyowal. 8Y konojel k'a rije' xkich'ob richin yeyakatej chiqij y nokibana' oyowal qik'in y nikiwulaj jun bey chik ri Jerusalem. 9Jari' toq roj xqak'utuj chire ri qa-Dios. Y koma rije' k'o chi xeqaya' chajinela' chi paq'ij chi chaq'a' richin chi xojkichajij chikiwech ri yojetzelan. 10Y ri wachibil ri ye'eran abej xkibij chuwe chi xk'is yan qa ri kuchuq'a' y ri tz'aq wuluwik k'a janila k'iy, y man yetikir ta chik nikipaba-q'anej.
11Y ri e etzelanel qichin xkich'ob chi roj man niqak'axaj ta ni man yeqatz'et ta chi rije' nikajo' ye'ok-pe chiqakojol roj richin xqojkikamisaj y xtikiben chi re samaj re' xtitane' kan. 12Y xbanatej k'a chi ri qachibil ri ek'o chikikojol ri yojetzelan xkibij chiqe k'iy mul, chi ri e etzelanel qichin xqojkikamisaj xabakuchi yojsamej-wi. 13Roma ri' xinbij k'a chike ri ach'alalri'il chi kek'oje' chupan ri tinamit, rik'in ri ki-espada, kum y rute-ch'ab y tikichajij ri akuchi k'a e teq'el na. 14Toq xentz'et yan ronojel re', xinbij k'a chike ri e tata'al, ri e aj-raqen y chike ri ch'aqa' chik winaqi': Man tixibij-iwi' chikiwech. Toqaqa k'a chi'ik'u'x chi ri qa-Dios, rija' kan nim wi y kan k'o rukiy chikiwech konojel winaqi'. Roma ri' tiqatija' qaq'ij koma ri qami'al-qak'ajol, ri qixjayilal y konojel ri ek'o pa qachoch, xicha' chike.
15Toq ri e etzelanel qichin xketamaj chi roj qanaban chik qi', y ri qa-Dios xuwulaj chikiwech ronojel ri kich'obonik, qonojel roj xojtzolin chik richin xqaben chik q'anej jun bey ri qasamaj rik'in ri tz'aq. 16Kan chupan k'a ri q'ij ri' ri nik'aj chike ri achi'a' yesamej, y ri nik'aj chik, yechajin rik'in ri kikum, rik'in ri kitobal y rik'in ri rute-ch'ab. Y ri aj-raqen nikikuqubala' k'a kik'u'x ri winaqi' aj-Judá, 17ri yepaban-q'anej ri tz'aq, ri ye'eran ronojel ri nik'atzin, pa jujun kiq'a' kik'uan ri espada. 18Y konojel k'a ri yepaban-q'anej ri tz'aq, chikijujunal k'o ri ki-espada pa ruximibal ri kipan, y keri' yesamej. Y ri nixupun ri trompeta pa'el-apo wik'in yin. 19Y xinbij chike ri e aj-raqen, ri e tata'al y ri ch'aqa' chik richin ri tinamit: Ri samaj kan janila nim y roma ri' roj qach'aron-qi' chirij ri tz'aq, y yalan k'a nej qakojol. 20Roma ri' xabakuchi k'a ixk'o-wi toq xtiwak'axaj chi niq'ajan ri trompeta, kan timolo' k'a pe iwi' qik'in, y ri qa-Dios, ja rija' xtibanon ri oyowal pa qak'exel roj, xicha'.
21Roma ri' qonojel k'a niqachop samaj toq kan man jani nel-pe ri q'ij y yojtane' k'a toq yeq'alajin chik pe ri ch'umila'. Y ri nik'aj chike ri qachibil kik'ualon k'a ri kikum. 22Jari' chuqa' toq xinbij chike ri nuwinaq y ri kisamajela' chi ri waran tiban wawe' chupan ri tinamit, richin yechajin qik'in chaq'a', y ri paq'ij yesamej. 23Pa ruwi' k'a ronojel re', ri qatziaq kan jantape' k'a k'o chiqij, y man niqelesaj ta, xa kan xaxe k'a toq yojatin niqelesaj chiqij keri' xinben yin, ri wach'alal, ri nusamajela', y ri e chajinela'.
Currently Selected:
Neh 4: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
