Job 9
9
Ri Job nuk'uluba-apo ri ruch'abel ri Bildad
1Xeri' ri Job xubij chire ri Bildad:
2Ri xabij rat kan qitzij na wi, y yin kan wetaman-wi chi keri'.
¿Achike kami rubanik nak'ut chuwech ri Dios chi maneq amak?
3Xa ta yin yich'ojin-apo chuwech rija',
ni xa ta jun bey yitikir ta nink'uluba-apo ri ruch'abel,
chire ronojel ri nubij chuwe.
4Ri Dios janila nim rik'in ri ruchuq'a' y ri retamabal.
¿Achike ta k'a ri nupaba-ri' chuwech rija',
y kan man jun k'ayew nuna' kan pa ránima?
5Rija' yerelesaj-el ri juyu' pa taq kik'ojelibal y yeruyikikej;
y rije' man ketaman ta achike roma keri' nuben chike.
6Rija' nuben chire ri ruwach'ulew richin nisilon,
kan nusiloj ri ruxe' ri chapayon richin.
7Wi rija' nrajo' chi man nel ta pe ri q'ij, kan man nel ta pe.
Chuqa' wi nrajo' nuben chike ri ch'umila' chi man yech'ich'an ta,
man yech'ich'an ta.
8Xaxe ruyon rija' xtikir xbanon chi xrik'itej ri kaj.
Xaxe chuqa' rija' ri nitikir nibanon chi nisile-qa ri nibolqo't ri ruwi' ri ya'.
9Rija' xbanon ri tzobaj ch'umila' kibini'an Osa Mayor,
ri kibini'an Orión, ri kibini'an Pléyades,
y ri jun tzobaj ch'umila' ri ek'o más pa xokon chire re ruwach'ulew.
10Rija' kan yeruben nima'q taq samaj ri kan man nich'obotej ta chuwech jun wineq,
y meyel taq samaj ri kan man ajlatel ta.
11Stape' rija' xtiq'ax-el chinuxikin, ri runaq' nuwech man tikirel ta chi xtutz'et el;
xtiq'ax-el y yin kan man xtinnabej ta.
12Wi rija' k'o ri nrajo' numajij-el; ¿k'o kami jun ri nitikir niq'aton richin?
¿K'o kami jun ri nitikir nibin chire chi achike roma kere' nuben?
13Ri Dios toq nipe royowal, man xtutzolij ta ri' chirij;
y kan konojel k'a ri yeto'on richin ri banoy etzelal, kan kexukuk xkeqaqa chiraqen.
14¿K'atama' chik ok yin chi xkich'ojin ta apo chire?
Yin xa maneq ri na'oj wik'in richin ninpaba-apo-wi' chuwech.
15Stape' yin kan choj ta ri nuk'aslen chuwech ri Dios,
kan man yitikir ta nink'uluba-q'anej ri ruch'abel.
Pa ruk'exel ri' xa nink'utuj utzil chire ri Dios ri nuto'onel chi tujoyowaj nuwech.
16Y wi rija' kan nuk'uluba-pe ri nuch'abel toq yin yich'on-q'anej rik'in,
stape' keri', kan k'a man jani ninimaj ta chi yirak'axaj.
17Roma ri rubanon wik'in yin, stape' xa man jun ok ri numak,
kan in ruya'on pa ruk'ayewal;
y q'ij-q'ij kan más nim nuben chire ri nusokotajik.
18Kan k'ayew ri rubanon chuwe, kan man yiruya' ta kan juba'.
Rija' nuben chuwe chi ruyon q'axo'n ri ninq'axaj.
19¿Yitikir kami ninkusaj ri wuchuq'a' chirij rija'?
Roma rija' k'o ronojel uchuq'a' pa ruq'a'.
¿Yitikir kami ninyek ch'a'oj chirij?
Man tikirel ta, roma man jun ri nitikir ta nuben chire rija' chi napon chuwech ri q'atoy-tzij.
20Yin kan choj-wi ri nuk'aslen, y xa roma ja yin ri yibin,
rik'in juba' chuwech ri Dios man keri' ta.
Ri nuk'aslen kan ch'ajch'oj k'a,
jak'a ri Dios rik'in juba' xa itzel nutz'et ri nuk'aslen.
21Jak'a yin ninna' chi ri nuk'aslen kan ch'ajch'oj-wi,
man rik'in ri' xa man jun chik nuk'atzinej-wi, roma xa yiken yan.
22Xa junan k'a nuya', roma ri' yin ninbij:
Ri Dios nrelesaj ruk'aslen ri choj y nrelesaj chuqa' ruk'aslen ri aj-mak.
23Roma toq nok'ulun jun ruk'ayewal y nuk'en-pe kamik pa kiwi' konojel,
ri Dios xaxe k'a yerutzu' ri ch'ajch'oj kik'aslen, ri ek'o chupan ri ruk'ayewal.
24Toq ri winaqi' pa jun ruwach'ulew ri k'o chuxe' rutzij jun q'atoy-tzij, ri yeruya' pa tijoj-poqonal,
ri Dios nuben chike ri achi'a' ri e chojmirisey ri yebanatej chi man jun nikitz'et.
¿Achike ta k'a nibanon chike chi man jun nikitz'et?
Wi man ja ta ri Dios nibanon, ¿achike ta k'a ri nibano?
25Ri q'ij richin ri nuk'aslen xa kan anineq beneq achi'el jun aninel;
anineq beneq y man jun kikoten ninwil.
26Ri q'ij kan chi'anin niq'ax achi'el nijilil ri canoa pa ruwi' ri ya'.
Kan achi'el chuqa' nuben ri kot toq nijumin niqaqa-pe chirij ri chikop ri nrajo' nuchop.
27Y stape' yin ninbij-qa: Tik'oje' na kan re q'axo'n re',
tinjala' na ri rubanik ri yitzu'un y xtink'ut chi yikikot.
28Xa man yitikir ta roma xa chi'anin nitzolin-pe wik'in ri nuq'axo'n;
roma stape' xtinben keri', ri Dios man xtuben ta chuwe chi maneq numak.
29Wi rija' kan rubanon chuwe chi in aj-mak,
¿K'o kami nuk'atzinej-wi re yikos richin ninto-wi' chuwech?
30Yin kan man xkich'ajch'ojir ta k'a,
stape' ninkusaj ri ya' richin ri tew ch'ubneq chik,
y stape' xtinch'ej nuq'a' rik'in chaj.
31Chuwech rija' xa pa ch'abeq chik ink'o-wi,
y roma ri' ri nutziaq achi'el xa ta nikixibij-ki' chinuwech.
32Roma ri Dios man jun achin ta achi'el yin, richin ninchop-wi rik'in,
y junan ta xqojapon rik'in ri q'atoy-tzij richin jun ch'ojikil.
33Kan maneq k'a jun ri nik'oje' ta chiqakojol y nubij ta ri k'o chi niqaben,
y kan ta k'o uchuq'a' pa ruq'a' richin nuq'et-tzij pa qawi' chi oj ka'i'.
34Ri jun ri' nuben ta chire ri Dios chi nrelesaj ta ri ruk'ayewal pa nuwi',
y man ta chik xtinna' ri xibinri'il ri nuya' chuwe.
35K'ari' yin xkitikir xkich'on y man ninxibij ta wi chuwech rija'.
Jak'a re wakami k'a man jani yitikir yich'on keri' chire.
Currently Selected:
Job 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
