Job 10
10
Ri Job nubisoj-qa ri rubanik
1¡Yin kan xik'o yan nuk'u'x chupan re k'aslen re'!
Roma ri' kan xtinya' k'a q'ij chire ri nujiloj;
kan xtinq'alajirisaj k'a ri ruk'eyul ri nuk'aslen.
2Yin kan xtinbij k'a chire ri Dios:
Man taben chuwe chi kan in aj-mak;
taq'alajirisaj k'a chinuwech achike roma toq achapon ch'a'oj chuwij.
3¿Kan ruk'amon kami chawe rat naben chi nutej poqon jun wineq,
y kan nimulun ak'u'x chirij ri kan ja rat ri at banayon richin,
y naya' ruchuq'a' ri kirayibel ri itzel taq winaqi'?
4¿Kan niq'ax kami chawech rat toq natzu' ri nikiben ri winaqi'?
¿Yatikir kami yak'oje' pa ruk'exel jun achin richin niq'ax chawech achike roma toq keri' nuben?
5¿Ri ak'aslen rat kan achi'el kami ri q'ij richin ri ruk'aslen jun wineq,
o ri ajuna' rat achi'el kami rujuna' ri wineq ri xa niken?
6Y roma ri' rat kan nakanola' ri man ja ta ninben,
y nakururej rukanoxik ri numak.
7Stape' rat kan jebel awetaman chi yin kan man in aj-mak ta,
man rik'in ri' kan pan aq'a' ink'o-wi,
y man jun ri xtitikir xtikolon wichin.
8Kan ja k'a ri aq'a' rat ri xbanon ri achike nubanik;
kan ja rat ri xabanon ri in achike yin.
Y wakami yakatajineq awoyowal chuwij.
¿Kan nawajo' k'a yinak'is jumul?
9Toqaqa chi'ak'u'x, chi rat jun k'olaj ch'abeq ri xakusaj, richin xaben re achike nubanik,
y wakami xa nawajo' chik naben poqolaj chuwe.
10Ja rat ri xabanon chi xa rik'in jun tz'uj xinok-q'anej wineq,
achi'el toq nuch'oyij-ri' ri leche y niban queso chire.
11Xinawiq rik'in nutz'umal y nutijul,
y chuqa' xaya' nuboch'il nubaqil.
12Ja rat k'a xaya'on ri nuk'aslen y xak'ut ajowabel chinuwech,
y rik'in ri awajowabal naloq'oq'ej ri nuk'aslen.
13K'a wakami k'a niq'ax chinuwech chi yakel pan awánima;
kan xinwetamaj k'a chi kan k'o chuqa' chupan ri anojibal.
14Rat kan in atzuliben k'a, q'alaj ri' wi yimakun,
y ri ninmakuj chawech kan xtaya' rutojbalil.
15Wi xa itzel rubanik ri nuk'aslen, xa toq'ex nuwech,
y stape' ta kan choj rubanik ri nuk'aslen,
man yitikir ta ninben chi nim nina' q'anej-wi',
roma xa janipe' na kitzaqon nuk'ix
y kan jantape' nuq'axan-pe q'axomal.
16Roma wi yin nim ninna-q'anej-wi', rat xa yinawoqotala'
achi'el nuben jun kanonel rik'in jun koj.
Y rik'in ri keri' niq'alajin ri nima'q taq banobel ri ye'abanala' rat.
17Kan q'ij, q'ij najalala' ri tejtobenik ri napaba' chinuwech.
Q'ij, q'ij más nim ri awoyowal chuwij yin.
Rat naben chuwe achi'el nikiben ri banoy taq oyowal,
toq chi tzobaj chi tzobaj yeyakatej chirij jun tinamit.
18¿Achike roma xaya' q'ij chuwe richin xinalex?
Yin xinrayij chi xa más ta utz xiken,
richin chi man ta ek'o ri xe'etaman nuwech.
19Xa ta keri', chi kan xaxe ta xinalex xibemuq kan,
kan junan ta rik'in ri man jun bey ri xinalex.
20Ri q'ij richin ri nuk'aslen xa juba' ok;
katane' k'a chuwij y kinaya' kan, richin chi yikikot ta el juba',
21roma toq xkibe, man xkitzolin ta chik pe.
Xa xkibe k'a ri akuchi xaxe ruq'equmal ri rumujal ri kamik k'o.
22Ri chiri' kan nik'o chik ruwi' ri rubanik ri q'equ'm.
Kan q'equ'm-q'equ'm, kan nik'o ruwi' ri q'equ'm ri'.
Xa junan rik'in toq k'o saqil kan seq k'a ri',
jak'a ri chiri' ri q'equ'm kan q'equ'm jumul, xcha' ri Job.
Currently Selected:
Job 10: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
