Job 7
7
Ri Job nubij ri achike nuna' chirij ri Dios
1Ri ruk'aslen ri wineq chuwech re chuwach'ulew xa kan janila k'ayew.
junan rik'in ri ruk'aslen jun achin ri nitijox richin nibe pan oyowal;
y kan junan chuqa' ruk'aslen rik'in jun aj-chiq'ij samajel ri k'o chi kow nisamej.
2Ri wineq xa achi'el ri loq'on samajel ri janila nurayij jun muj;
y xa achi'el chuqa' ri aj-chiq'ij samajel ri kan royoben chi nuk'ul ri rajel,
roma xa roma ri' nisamej.
3Ri k'ayewalej taq ik' ri e nuq'axan-pe xkiben chuwe chi numalin chik nuk'u'x,
y ri chi'aq'a' ri e nuq'axalon-pe xa kibanon chuwe chi in jun achin ri man jun wejqalen.
4Toq yin yibekotz'e', ninch'ob: K'ate' ta niseqer yan.
Jak'a toq yiyakatej ri ruka'n q'ij, rik'in bis ninq'axaj chijun q'ij kan k'a toq niqaqa na qa ri q'ij.
5Ri nuch'akul kan q'ayineq chik chijun y k'o k'a ruwech rubanon,
ri nutz'umal xa kan yach' chik rubanon roma ri ruya'al ri nuyabil y kan nilojlo-el.
6Ri q'ij richin ri nuk'aslen xa juba' chik ok;
xa anineq xinapon chuwech ri nukamik,
achi'el toq nik'aq-ok ri ruway ri kem y nitzolix chik jun bey;
y xa niq'ate' toq nik'is ri betz' chirij ri ti che'.
Ri Job nuk'utuj chire ri Dios chi man tumestaj
7Nu-Dios yin, toqaqa k'a chi'ak'u'x chi ri nuk'aslen xa achi'el kaq'iq' ri niq'ax;
y kan man jun bey chik xtintz'et ri rutzil ri k'aslen.
8K'o k'a jun q'ij toq ri e etamayon nuwech man xkinkitz'et ta chik;
y rat nu-Dios kan in atzuliben k'a toq yin xkiken-qa.
9Ri k'aslen xa achi'el ri sutz' ri xa chi'anin nik'is-el y nibe;
keri' k'a nuben ri niken-el y xa pa jul nibek'is-wi;
10Ri niken-el man jun bey chik xtitzolin chirachoch,
y konojel ri xe'etaman ruwech man jun bey chik xtikitz'et, xa xtikimestaj.
Ri Job man jun nikuquban ruk'u'x
11Roma ri', nu-Dios, kan man xkitane' ta k'a richin yich'on;
xa kan xtinq'alajirisaj k'a ri q'axo'n ri k'o pa wánima.
Kan rik'in k'a bis xkich'on awik'in roma ri nuk'aslen keri' nuben chuwe.
12Yin xa man in junan ta rik'in ri palou
y rik'in ri nimalej chikop richin ya', richin kan yixibin;
jak'a rat xa aya'on kan jun chajinel wichin richin chi man jun ch'a'oj ninben.
13Toq yin ninch'ob chi ri pa nuwarabel ninwil uxlanen,
y ri nuwaran xtuben chuwe richin yich'uch'u' juba' chire ri nuq'axo'n,
14xa jari' toq rat kan naya' wachik' ri kan nuya' xibinri'il chuwe.
Kan naben chuwe chi yepa'e' ri rusumal taq nuwi' rik'in ri k'o yek'utumej chinuwech.
15Más ta utz nipitz' chinuqul y yiken;
más utz ri kamik ke chuwech re k'aslen re nuk'uluman wakami.
16Yin kan ninwetzelaj k'a re nuk'aslen;
kan man ninrayij ta yik'ase' q'asen rik'in jun k'aslen kere'.
Kinaya' k'a kan, roma xa man k'iy ta chik q'ij xkik'ase'.
17Nimalej Jehová: ¿Achike ta k'a wejqalen yin ri xa in jun achin, richin yinaquqa-pe?
¿In achike ta k'a yin richin yinak'uxla'aj-pe?
18Y kan aya'on-pe awech chuwij; in atz'elwachin-pe ronojel nimaq'a'.
Chuqa' kan yinatejtobej k'iy bey pa jun q'ij.
19Man tikirel ta kami chi nawelesaj ta juba' ri atzubal pa nuwi',
xaxe ta richin yinuxlan juba' chire ri atzubal.
Roma yin kan nina' chi man naya' ta q'ij chuwe richin ninbeq' juba' nuchub.
20Wi yin k'o ta numak nubanon chawech, xa ja yin k'ari'.
¿Kan xkarumej kami ri numak yin, rat ri yatikir nanik'oj ri k'o pa ránima ri wineq?
¿Y achike roma ja yin in aq'ijun-pe?
¿Y achike roma in jun ejqa'n chawe rat?
21¿Achike roma man yinakuy wi ximakun chawech,
y namestaj chi kan in aj-mak-wi?
Roma yin xa xkiken-el y xkibe kan pan ulew,
y toq rat xkinakanoj, xa in maneq chik, xcha' ri Job.
Currently Selected:
Job 7: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
