Job 6
6
Rurayibel ri Job richin nitz'et ta ri ruq'axo'n
1Y xeri' ri Job xuk'uluba' k'a ri rutzij ri Elifaz y xubij:
2Xa ta tikirel nipaj pa jun etabel ri nuq'axo'n,
y keri' ta chuqa' niban chire ri ruk'ayewal ri qajineq pa nuwi'.
3Xa más ta yepajon ke chuwech ri sanayi' ri k'o chuchi' ri palou;
y xa roma ri' nojin man nojin ri e nubilon.
4Kan in sokotajineq k'a roma ri ch'ab ri e richin ri Dios ri k'o ronojel uchuq'a' pa ruq'a'.
Ri nuk'aslen kan nuk'ul k'a ri kamisanel aq'om ri ek'o-pe chikitza'n ri ch'ab ri'.
Kan ronojel k'a ri xibinri'il ri nuya' ri Dios kan kisutin-wij.
5¿Noq' kami pe ri bur, ri richin pa juyu', toq xa kan kojol rex q'os k'o-wi?
¿Noq' kami pe ri bóyix toq xa k'o-apo ri ruq'os chunaqaj?
6¿Man niya'ox ta kami atz'an rik'in ri xa yax?
¿Man xex ta kami ri rusaqil ri saqmolo'?
7Ri pa nuchi' man nurayij ta ronojel ri';
y wakami xa jari' ri nintej y xa ninyabij.
Ri Job nrayij rukamik
8¡Jebel ta ri' xa ta ri Dios nuya' ta chuwe ri nink'utuj chire;
jebel ta ri' xa ta kan nuya' chuwe ri woyoben-pe!
9¡Jebel ta ri' xa ta ri Dios nrajo' chi yiruk'is-el jumul;
nuyek ta ruq'a' chuwij richin yirelesaj-el jumul!
10Xa ta keri' nuben wik'in nukuquba' ta nuk'u'x.
Nuya' ta kikoten chuwe chupan re nimalej xibinri'il re';
y man ta itzel yan xich'on chirij ri Loq'olej Dios ri yoyon nuk'aslen.
11¿K'o kami akuchi nipe-wi más wuchuq'a' richin ninwoyobej-apo?
¿K'o kami ri nutzuliben-apo richin k'a ninwajo' na yik'ase'?
12¿Ri rukowil ri nuk'aslen achi'el kami rukowil ri abej?
Y ri rukowil ri nuch'akul, ¿achi'el kami ri rukowil ri q'enq'oj-pueq?
13Yin xa maneq chik wuchuq'a' richin yirukol;
xa maneq chik uchuq'a' wik'in, xa xk'is yan ronojel.
Ri Job numalij ruk'u'x koma ri rachibil
14Y ri Job chuqa' xubij:
Ri k'o pa tijoj-poqonal kan k'atzinel nikuqubex ruk'u'x koma ri rachibil;
stape' maneq chik rukiy ri Dios chuwech.
15Jak'a rix wach'alal xa xixpiskolin chuwij.
Xa ix achi'el ri ya' ri nibiyin ri richin job;
xa ix achi'el taq raqen-ya' ri man yeyaloj ta.
16Xa ix achi'el ri tz'ilolej ya' richin ri tew ri ch'ubneq chik;
ri ya' ri' xa jari' ri tew ri ch'ubneq-pe y man q'alaj ta chik.
17Y toq napon k'a ri q'ij richin saq'ij, jari' toq niyakatej-el.
Kan jak'a toq nimeq'e', jari' toq nik'is-el.
18Yin in junan k'a kik'in ri ula'i' kik'uan ki-camello,
ri kimolon-el-ki' e beneq.
Nikijel ri kibey richin chi nikil ta kiya',
y xa roma ri' yebe más chupan ri tz'iran ruwach'ulew.
19Ri ula'i' ri yepe chuqa' ri pa Temán kan ja ri ya' ri nikikanoj.
Y ri aj-Sabá kan kikuquban kik'u'x kik'in rije' chi nikil ya',
y xa man keri' ta nibanatej.
20Jak'a ri aj-Sabá nisach kik'u'x toq ri aj-Temán man nikil ta ya',
y xa kan kikuquban kik'u'x kik'in.
toq rije' ye'apon kik'in ri aj-Temán, k'ayew nikina'
roma man xkil ta ri nikajo'.
21Y rix ri ixk'o wik'in wakami xa ix junan kik'in ri aj-Sabá.
Xa ixibin-iwi' yinitzu-pe, y niwajo' yiniya' kan nuyon.
22Jak'a yin k'a man jun ri nuk'utun ta chiwe.
Man nuk'utun ta méro chiwe;
ni man nuk'utun ta chiwe ri ibeyomel chi'ijujunal.
23Man nuk'utun ta chuqa' chiwe, chi kinikolo' pa ruq'a' ri etzelanel wichin,
ni man nuk'utun ta chiwe chi kinito' pa ruq'a' ri in yoyon pa tijoj-poqonal.
24Kan tik'utu' k'a chinuwech achike man utz ta nubanon,
y kan man jun xtinbij.
Tik'utu' k'a chinuwech achike mak in qajineq-wi.
25Ri ch'abel ri pa rubeyal yebix-wi kan nujel k'aslen.
Jak'a ri ch'abel ri nikusaj rix, xa yiruya' pa q'axo'n.
26Rix xa nich'ob niwetzelaj ri ruch'abel jun ri xa k'o pa q'axo'n,
roma chiwech rix ri ch'abel utz tuk'uaj-el kaq'iq'.
27Rix kan in iwichin ibanon chuwe roma man yitikir ta ninto-wi',
chuqa' xixpiskolin chuwij yin ri in iwachibil.
28Ri ixk'o wik'in wakami kan titzu' k'a ri nuq'axo'n,
tijoyowaj nuwech;
y kan xtiwetamaj chi kan man nintz'uk ta tzij chiwech.
29Tijunamatej chik iwech wik'in yin roma yin kan in choj-wi.
Tijunamatej k'a iwech wik'in yin,
roma yin kan in choj achi'el ri rubanon kan.
30¿K'o kami mak chupan ri nuch'abel ri nubin-qa chiwe?
¿Nich'ob rix chi yin man wetaman ta ri rukojol ri utz y ri itzel?
Currently Selected:
Job 6: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
