Job 5
5
1Wakami k'a Job, kan kasik'in k'a richin nak'utuj to'onik;
rik'in juba' roma ri kan nakanoj ri achike nito'on awichin,
k'o ta jun ángel ri nik'uluban-pe ri ach'abel ri chila' chikaj.
2Kan qitzij na wi chi ri chi'anin niyakatej royowal jari' ri nikamisan-el richin,
y ri k'o rayinik rik'in jari' chuqa' ri nikamisan-el richin.
3Yin nutz'eton k'a chi ri k'o rayinik rik'in, kan rujikiban-qa-ri' chupan ri rachoch,
y xa jari' toq ri Dios nuya-pe ruk'ayewal pa ruwi' ri rachoch.
4Roma ri' ri ralk'ual kan man jun xtito'on kichin;
kan xkeya'ox k'a pa tijoj-poqonal ri chiri' chuchi' ri tinamit,
y kan man jun k'a xtikolon kichin.
5Y ri ruwech ri kitiko'n, ja ri winaqi' ri k'o kiwayjal ri xkek'ison,
y stape' chukojol k'ix k'o-wi xtikelesaj-el richin nikik'uaj.
Ri winaqi' ri k'o rayinik kik'in xtikik'uaj k'a el;
y ri winaqi' ri nik'at kánima chirij ri beyomel xtikik'uaj-el ronojel.
6Kan man ja ta k'a ri ulew richin tiko'n ri niya'on-pe ri tijoj-poqonal
ni ri ruwach'ulew man nuwachij ta pe ri ruk'ayewal ri nipe chirij jun wineq.
7Ri wineq kan nalex k'a chuwech re ruwach'ulew richin chi nutej poqon
kan junan k'a rik'in ri rubix q'aq' ri kan k'o chi niyakatej pa kaq'iq'.
Ri Elifaz nuq'alajirisaj ri ruch'obonik
8Xa ta yin yik'owisan ronojel ri'.
Yin kan ninkanoj ta ri Dios,
y kan ninya' ta pa ruq'a' rija' ronojel ri poqonal ri nink'owisaj.
9Kan pa ruq'a' ta ri Dios ninjech-wi, roma rija' kan yeruben nima'q taq banobel ri man yeq'ax ta chiqawech,
y kan meyel taq banobel ri yeruben, y man e ajlatel ta.
10Ja rija' ri niya'on-pe ri job pa ruwi' ri ruwach'ulew.
Nuteq k'a pe ri ya' pa ruwi' ri ulew ri yetikonej chuwech.
11Ri winaqi' ri xa man jun ok kejqalen, rija' nuya-q'anej kiq'ij,
y ri yebison kan nukuquba' kik'u'x.
12Rija' nuyoj ri kinojin nikiben ri itzel taq achi'a',
nuben chike chi man jun yetikir nikiben chire ri kich'obon.
13Rija' kan nuben k'a chike ri aj-na'oj chi yetzaq chupan ri yekinojij,
y ri kinojin richin nikiben xa man nichojmir ta chikiwech.
14Y stape' jebel rubanon ri rusaqil ri q'ij, chikiwech rije' xa q'equ'm;
rije' yemaqeq yebiyin ri pa nik'aj-q'ij, achi'el xa ta chi'aq'a'.
15Kere' rubanik nuben ri Dios richin yerukol ri nikitej poqon koma ri achi'a' ri'.
Kan yerukol ri meba' taq winaqi' pa kiq'a' ri beyoma'.
16Rik'in ri keri' ri winaqi' ri maneq ok kejqalen xa xtitzolin chik pe ri oyobenri'il chupan ri kik'aslen,
y ri man pa ruchojmilal ta e banon-pe xa xkechame'.
Ri kikoten xaxe ri Dios niya'on
17Jebel ruwa-ruq'ij ri wineq ri nijich'ex roma ri Dios;
roma ri', rat Job, kan tak'ulu' ri tijoj-poqonal ri nuya' ri Dios chawe,
ri Dios ri k'o ronojel uchuq'a' pa ruq'a'.
18Roma rija' nisokon, y nupis chuqa' ri sokotajik;
rija' nich'ayon rik'in tijoj-poqonal y nuya' ri raq'omal.
19Ronojel mul xkarukol chuwech ri ruk'ayewal,
y man xtuya' ta q'ij chi ri etzelal xtapon awik'in.
20Toq k'o wayjal man xtuya' ta q'ij richin chi yaken,
y toq k'o labal xkaruto' chuwech ri kamik.
21Rija' xtuya' jun atobal richin chi ri itzel nich'on chawij, man jun nuben chawe;
y man xtaxibij ta awi' toq xkatapon chuwech jun wululen.
22Y man xkaniman ta chire toq xtipe jun wayjal o jun tijoj-poqonal,
y man xtaxibij ta awi' chikiwech ri k'uxunela' taq chikopi'.
23Ri abej ri ek'o pan awulew xa xke'ok awachibil;
y ri k'uxunela' taq chikopi' kan xke'ok chuqa' awachibil.
24Kan k'o k'a uxlanen awik'in chupan ri awachoch ri banon rik'in tzieq,
y toq xtanik'oj achike kibanon ri awawej, xa konojel e tz'aqet.
25Tatz'eta' na pe chi ri awijatzul kan pa ruk'iyal ri xkek'oje';
ri awijatzul ri' kan xkek'iyer achi'el nuben ri q'ayis ri pa juyu'.
26K'iy k'a juna' xkak'ase' y kan k'a k'o na awuchuq'a' toq xkaken;
achi'el toq ri trigo q'en-q'en rubanon richin niq'at.
27Roj kan qatz'eton-wi-pe, chi kan keri'.
Kan tawak'axaj k'a y re' k'o xtuk'en-pe chawe, xcha'.
Currently Selected:
Job 5: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
