Job 4
4
Ri nabey ruch'owen ri Elifaz
1K'ari' ri Elifaz aj-Temán xch'on-apo chire ri Job y xubij:
2Yin ninch'ob chi man utz ta xtana' ri yich'on-apo awik'in.
Jak'a xa man ruk'amon ta chi ri ch'abel ri nuk'amon-pe pa wánima nitzolin chik el wik'in.
3Rat kan e k'iy k'a winaqi' ri e ato'on-pe rik'in tijonik,
y ri maneq chik kuchuq'a' kan xe'ato' richin xk'oje' chik el kuchuq'a'.
4Rat kan rik'in ri ach'abel xe'atemela-wi toq xa yetzaq yan,
y xaya' ruchuq'a' ri kaqen ri xa e lawaleq chik.
5Y re wakami toq xa ja rat ri atk'o chupan ri tijoj-poqonal, namalij ak'u'x.
Toq xawil re tijoj-poqonal re' xa nisach ak'u'x.
6Rat kan kuqul-pe ak'u'x roma kan k'o rukiy ri Dios chawech.
Rat kan k'o pe oyobenri'il pan ak'aslen, roma kan tz'aqet-wi rubanik ri ak'aslen.
7Wakami kan tach'obo' k'a jebel;
¿Banatajineq kami chi jun wineq ri man jun rumak nikamisex ta roma ri'?
Ó ¿Banatajineq ta kami chi ri choj kik'aslen nelesex ta el kik'aslen?
8Roma ri nutz'eton chupan ri nuk'aslen yin,
chi ja ri yetiko etzelal y ri yetiko oyowal, jari' ri nibanon chike chi k'o nikik'uluwachij.
9Y ja winaqi' re' ri xkerukamisaj ri Dios rik'in ri kaq'iq' ri nel-pe pa ruchi';
y kan xkeruk'is k'a el jumul rik'in ri xkeruxupuj-el rik'in royowal.
10Ri Dios kan xkeruk'is k'a ri achi'a',
stape' kan yexibin achi'el nixibin jun koj toq niq'ajan y nureq ruchi'.
Kan xtuben chike achi'el niban chire jun alaj koj;
nitz'oq-el ri rey richin man jun chik nuben.
11Ri achi'a' ri' kan xkeken k'a achi'el niken jun rijlej koj roma man nril ta chik ruway.
Ri kalk'ual xketalutej-el, achi'el xketalutej-el ri alaji' taq koj chuwech ri kite', xcha' ri Elifaz.
Ri rachik' ri Elifaz
Y ri Elifaz kan xubij chik chuqa':
12Jun chi'aq'a', pa nuwaran k'o k'a jun ri xbix chuwe pa ja's,
y stape' man kan ta jebel q'alaj, kan k'o ri xinwak'axaj.
13Chupan k'a ri chi'aq'a' ri', toq konojel e kamineq chi waran;
jari' toq yin xinben ri itzel achik' ri'.
14Kan xpe k'a jun xibinri'il chuwe y xiruyikikej,
y kan xuk'ararej chijun nubaqil.
15Y xik'o k'a jun itzel kaq'iq' chinupalej,
y kan xuben chuwe chi xpe tew chuwij.
16Xa jun xibinel ajk'a y xpa'e' chiri' chinuwech,
jak'a yin man nintz'et ta achike rubanik.
Xa achike na y pa'el chiri' chinuwech.
Nabey xa man xch'on ta, k'ari', xch'on k'a y xubij:
17¿Kan k'o kami jun achin ri más choj ke chuwech ri chojmilej Dios?
¿Kan k'o kami chuqa' jun achin ri más ch'ajch'oj chuwech ri xbanon richin?
18Ri Dios kan man ruya'on ta ránima kik'in ri aj-ruwach'ulew rusamajela'.
Y chuqa' kan keri' nuben kik'in ri ángel ri ek'o rik'in chila' chikaj.
19¡K'atala' chik k'a chi xtuya' ránima rik'in jun wineq ri xa ulew, ri xa man kow ta;
ri xa kan tikirel chi nupach'ij, achi'el nuben jun wineq rik'in jun ti palamax!
20Ri ruk'aslen k'a ri wineq xa man richin ta q'asen,
xa achi'el ok jun q'ayis ri jebel rubanon ri nimaq'a',
y toq nitzaq ri q'ij xa nichaqi'j-qa.
Xa jari' xk'is y man jun chik xtinatan richin.
21Ri ruk'aslen ri wineq xa niraq'achitej achi'el jun betz'.
Nibe y xa man xril ta el ri na'oj;
keri' xubij chuwe ri xch'on wik'in.
Ri k'o pa ruk'ayewal tuk'utuj k'a to'onik
Y ri Elifaz xch'on chik k'a y xubij chire ri Job:
Currently Selected:
Job 4: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
