Job 38
38
Ri Dios nich'on rik'in ri Job
1K'ari' ri Jehová xch'on-pe rik'in ri Job chupan jun surkum y xubij chire:
2¿At achike k'a rat richin chi nach'ob chi ri nuq'atbel-tzij yin xa man utz ta?
Rat xaxe yach'on y man awetaman ta ri achike ninch'ob yin.
3Wakami k'a, kan at achin kapa'e-pe chinuwech;
roma yin k'o ri xtink'utula' chawe y rat kan xtaq'alajirisaj chinuwech ri ninwajo' ninwetamaj.
4¿Akuchi atk'o-wi rat, toq yin xinben re ruwach'ulew?
wi rat k'iy awetaman, kan taq'alajirisaj k'a chinuwech.
5¿Awetaman rat achike ri xch'obon, janipe' rubanik nuben chire ri ruwach'ulew?
¿Awetaman achike xuk'uan ri rutza'n ri k'an richin xetex?
6¿Achoq pa ruwi' tz'uyul-wi ri rupalibal re ruwach'ulew?
y ¿achike xya'on-qa ri abej ri kow chapayon ri pa taq rutza'n re ruwach'ulew?
7Y rokik yin yinajin chubanik ri samaj ri', ri ch'umila' ri e q'alaj nimaq'a' yebixan k'a,
y keri' chuqa' konojel ri ángel ri ek'o wik'in, kan yekikot k'a janila.
8¿Awetaman kami rat achike xbanon chi ri palou xtz'ape' kan pa ruk'ojelibal, richin man nel ta pe chiri',
toq kan nibulbu'x xel-pe pa ruk'u'x re ruwach'ulew y xunojisaj ri ruwi'?
9Re palou re' kan xinya' k'a rutziaq y ri' ja ri sutz',
kan xinya' chuqa' ximibel-rupan y ri' ja ri q'equ'm.
10¿Akuchi k'a atk'o-wi rat toq yin xinchojmirisaj kan ri ruk'ulba't ri palou
toq yin kan xintz'apej kan ri ruchi', richin man nel ta pe?
11Y yin kan xich'on k'a rik'in ri palou y xinbij chire:
Rat xaxe k'a wawe' ri utz yatoqaqa-wi y man xkaq'ax ta el,
xaxe k'a wawe' xtorupaxij-ri' ri ruwi-ya' ri nibolqo't, xicha' chire.
12¿Rat, Job k'o kami jun bey chupan ri ak'aslen abanon chi roma ri atzij rat roma ri' xseqer-q'anej?
¿O abin ta kami chire ri saqil richin ri nimaq'a' yan chi ja ri chiri' k'o-wi ri ruk'ojelibal,
13o kan yatikir ta chuqa' nasaqirisaj ruchi' chijun re ruwach'ulew,
y rik'in ri saqil yatikir naben chike ri banoy etzelal, chi nibekewaj ki' pa q'equ'm?
14Toq nibek'ulun-pe ri rusaqil ri q'ij, kan jebel yeq'alajin-pe ri juyu' y ri kojol taq juyu',
kan jebel nibeq'alajin-pe achi'el nuwiq-ri' rik'in jun tzieq ri jebel ok.
15Ri rusaqil ri q'ij man nuya' ta q'ij chike ri maneq Dios chikiwech chi nikiben ri nikajo'.
16¿Rat Job, at beneq kami chuxe' qa ri palou, ri k'a akuchi nalex-wi-pe?
¿Kan at qajineq-qa k'a chuxe' richin nawetamaj ri rubanik?
17¿Awetaman akuchi k'o-wi ri okibel richin ri kamik?
¿Atz'eton chik kami rat ri q'equ'm richin ri jul ri'?
18¿Kan ach'obon k'a ri achike rubanik re ruwach'ulew y ri k'a akuchi napon-wi?
wi kan awetaman ronojel, tatzijoj k'a chuwe.
Ri nimalej na'oj richin ri Dios
19¿Awetaman rat ri bey ri nuk'uan k'a akuchi k'o-wi ri rachoch ri saqil,
akuchi k'o-wi ruk'ojelibal ri q'equ'm?
20¿Yatikir kami rat nak'uaj ri saqil y ri q'equ'm k'a akuchi k'o-wi ri kachoch?
¿Awetaman kami rat ri bey ri napon k'a akuchi ek'o-wi rije'?
21Wi rat Job, awetaman ronojel re', xa atk'o chik k'a rat toq yin xinben ronojel,
wi keri' xa kan janila chik k'iy juna' atk'o-pe pa ruwi' re ruwach'ulew.
22¿At apowineq rat ri akuchi nuyakon-wi yin ri pimilej-tew,
y atz'eton kami ri akuchi nuyakon-wi ri saqboch,
23ri e nuyakon richin ri q'ij richin tijoj-poqonal,
y e nuyakon richin ri q'ij richin ri labal y toq nikichop-ki' chi kamik ri tinamit?
24¿Awetaman chik achike bey nuk'uaj ri saqil toq nutaluj-ri',
y awetaman akuchi k'o-wi ruk'ojelibal ri kaq'iq' ri nitiker-pe pa relebel-q'ij
y nutaluj ri' pa ruwi' re ruwach'ulew?
25¿Awetaman rat achike ri nijaqon-pe ri job richin chi niqaqa-pe,
y achike nibanon ri rubey ri koqolajay?
26¿Awetaman chi ri job kan nuya'aj ri ulew ri akuchi xa e maneq winaqi',
kan nuch'eqeba' k'a ruwi' ri tz'iran ruwach'ulew,
27y kan nuya'aj-wi jebel chaqi'j ulew, ri man jun nuya',
y kan nuben chi yebejinijo-pe q'ayis?
28¿Achike kami tata'aj pa ruwi' ri job,
y ri taq tz'uj richin ri raxq'ab ri niqaqa-pe pa ruwi' re ruwach'ulew?
29¿Achike kami xalan richin ri ya' ri nikowir?
30¿Achike kami nibanon chi ri ya' nikowir achi'el abej,
y chi nikowir ruwi' ri palou?
31¿Yatikir kami rat ye'axim ri tzobaj ch'umila' ri nibix pléyades chike?
¿Yatikir kami ye'ach'er ri ch'umila' ri nibix Orión chike?
32¿Yatikir kami rat naben chike ri ch'umila' chi kan ja toq ruk'amon jari' yebek'ulun-pe?
¿Yatikir nak'uaj kibey ri tzobaj ch'umila' kibini'an nima-osa y ri ko'ol-osa?
33¿Awetaman rat ri chojmilal, ri uk'uayon kichin konojel ri ek'o chupan ri kaj?
¿Ja rat ri yaya'on ri chojmilal pa ruwi' re ruwach'ulew?
34¿Yatikir kami rat chi kan yach'on-q'anej chire ri sutz' chi tuya-pe job,
richin chi ri job ri' kan numuba' jebel ri ulew y kan nik'iy-q'anej?
35¿Yatikir naben chire ri koyopa' chi tibe y tiqaqa akuchi nawajo-wi rat?
y toq kan yach'on rik'in ri koyopa' ri', ¿kan nubij kami chawe chi jari' k'o chiri' y achike nawajo' chi nuben?
36¿Awetaman rat Job, achike chi na'oj nibanon chire ri awánima chi nisamej jebel,
y achike xya'on ri ch'obonik chire ri anojibal?
37¿K'o kami jun ri kan k'o na'oj rik'in richin nitikir yerajlaj janipe' sutz' ri k'o chikaj?
¿K'o ta kami chuqa' jun ri kan nitikir nuben chike ri sutz' chi nibekiq'eja-pe ri job,
38y richin chi toq niqaqa-pe ri job ri' ri poqolaj niqaqa ruwi' y nubajij-ri' jebel;
chi ri k'olok'eq ulew nikichop-ki' jebel, y nikowir ruwi' ri ulew?
Ja ri Dios ri k'o pa kiwi' ri chikopi'
39¿Ja kami rat yatel pa kanonik, richin natzuq ri ixoq koj,
richin ye'atzuq ri taq alaji' koj y man yewayjan ta?
40¿Yatikir kami rat naben chike ri koj richin chi yebe pa taq kijul y yejupe' chiri',
richin nikewaj-ki', richin yeberopin-pe chikij ri chikopi' richin yekik'ux?
41Rat Job, ¿yatikir kami ye'atzuq ri qo'ch?
Roma ri taq alaji' xa kow yeq'ajan y chuwe yin nikik'utuj-wi kiway.
Rije' kan yebe-kela' yebe-kela' nikiben roma maneq kiway.
Currently Selected:
Job 38: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
