Job 37
37
1Y roma ri kaq'iq' ri' kan janila nuxibij-ri' ri wánima,
kan niropin janila achi'el xa ta pa ruk'ojelibal.
2Kan tiwak'axaj k'a ri ruch'abel ri Dios kan achi'el niwulul ri koqolajay,
kan niwulul k'a ri ch'abel ri nel-pe pa ruchi' rija'.
3Ri Dios kan nuya' k'a q'ij richin chi ri koyopa' nibe chuxe' ri kaj,
y ri rusaqil kan napon k'a pa ruk'isibel chire ri ruwach'ulew.
4Chirij ri' niwajin k'a kan ri ruch'abel ri koqolajay, ri nuq'alajirisaj ri nimalej ruchuq'a',
y rokik najin ri koqolajay y niwulul janila, ri koyopa' kan man k'a nitane' ta.
5Ri ruch'abel ri Dios kan achi'el ri ruch'abel ri koqolajay, kan meyel wi ri ruch'abel;
rija' kan yeruben-wi nimalej taq banobel, ri kan man niq'ax ta chiqawech.
6Roma xaxe rija' ri nitikir nibin chire ri pimilej-tew chi tiqaqa pa ruwi' ri ruwach'ulew,
xaxe rija' ri nitikir nibanon chi niqaqa choj job y ri kamik-job.
7Y rik'in ri keri', ri Dios yerupaba' ri winaqi' chire ri kisamaj
richin chi tiketamaj ri rubanik ri rusamaj rija'.
8Y ri chikopi' chuqa' kan nikik'ol-ki',
y yek'oje' kan chiri' pa taq kijul.
9Ri nimalej-kaq'iq' kere' pa xokon nipe-wi,
y ri tewulej-kaq'iq' kere' pa xaman nipe-wi.
10Toq ri Dios nuxupuj-pe ri tewulej-kaq'iq', ri ya' nikowir,
kan yekowir k'a kiwi' ri kokoj y ri nimalej taq palou.
11Ri Dios nuben chi k'o sutz' y jebel ya' ruk'uan,
y nuben chi chiri' chupan ri sutz' ri' nibe'el-pe ri koyopa'.
12Ri sutz' kan yesutiyaj k'a chirij chijun re ruwach'ulew,
keri' nikiben richin nikinimaj rutzij ri Dios.
13K'o jujun bey ri Dios nuk'en-pe ri sutz' ri ruk'amon-pe job, richin nuya' ruk'ayewal pa kiwi' ri winaqi',
k'o bey richin nuya'aj re ruwach'ulew, richin nuk'ut ajowabel chikiwech ri winaqi'.
14Rat Job, kan kinawak'axaj k'a, tawak'axaj ronojel ri ninbij,
kapa'e' y tach'obo' jebel kij ri nima'q taq samaj ri yeruben ri Dios.
15¿Awetaman kami rat achike rubanik nuben ri Dios rik'in ronojel re'?
¿Y achike rubanik nuben richin nibesaqirisan-pe ri koyopa' ri pa taq sutz'?
16¿Awetaman rat achike rubanik nuben ri Dios richin chi ri sutz' jebel k'o ri pa kaq'iq' y nibiyin?
¿Y achike rubanik richin yeruben ri nimalej taq banobel?
17Rat, xaxe ok nana' chi janila k'aten nuben,
toq ri xokomil ruk'amon-pe janila k'aten.
18¿Yatikir kami nato' ri Dios richin chi nuben ri kaj,
ri kan jebel kow nik'oje', achi'el ri espejo banon rik'in q'enq'oj-pueq?
19Rat Job kan tak'utu' k'a chiqawech achike ri nik'atzin chi niqabij chire ri Dios,
roma kan ojk'o pa q'equ'm y man jun yojtikir niqach'ob richin niqabij chire.
20Y xa ta yin yich'ojin-apo chire ri Dios.
Ri keri', xaxe richin ninliba-wi' pa ruq'a' richin chi yiruk'is.
21Y kan man jun k'a nitikir nitzu'un richin ri q'ij,
toq kan nisaqirisan-pe jebel ri chila' chikaj,
toq ri kaq'iq' xa xuk'uaj yan el ri sutz' y jebel tz'iran-tz'iran rubanon.
22Y toq xtibek'ulun k'a pe ri Dios re kere' pa xaman, kan xtibech'ich'an- pe y kan q'en-q'en k'a ri xtitzu'un-pe,
y ri rubanik k'a ri Dios kan nuya' xibinri'il, roma kan niq'alajin rik'in ronojel ruq'ij-ruk'ojlen.
23Rija' kan jun Dios ri k'o ronojel uchuq'a' pa ruq'a',
ri rubanik rija' man niqaq'i' ta roj rik'in ri qach'obonik.
Ri ruq'atbal-tzij y ri nimalej ruchojmilal rija' man nuben ta chire jun wineq chi nik'oje' pa ruk'ayewal.
24Roma ri', konojel winaqi' nikiqasaj-ki' chuwech y nikiya' ruq'ij,
chuwech ri Dios kan man jun k'a kejqalen ri xa kiyon nikina-ki' chi janila kina'oj.
Currently Selected:
Job 37: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
