Job 39
39
1¿Awetaman rat ri ruq'ijul toq ri juyubel taq tzuntzun ye'alan?
¿Atz'eton kami rat toq ri ixoqi' taq masat ye'alan?
2¿Awajlan kami janipe' ik' nikoyobej ri masat richin ye'alan,
y achike q'ij toq k'o chi ye'alan?
3Toq rije' ye'alan, xaxe k'a yejupe-qa pan ulew y ri taq alaji' ye'alex;
y keri' yekolotej k'a chuwech ri kiq'axomal.
4K'ari' ri taq alaji' ri', nik'oje-el kuchuq'a' y chiri' pa taq juyu' yek'iy-wi;
xeri' yebe y man yetzolin ta chik rik'in ri kite'.
5¿Awetaman rat Job, achike ri xya'on q'ij richin chi ri juyubel bur nibe?
¿Awetaman achike xkiron-el ri rukolo' richin xbe?
6Ja yin ri xibanon chire chi ruyon nik'ase' pa juyu',
y ri rachoch ja ri tz'iran ruwach'ulew.
7Ri chikop ri' kan k'a nej k'a nik'oje-wi, roma man nukoch' ta nik'oje' chunaqaj jun tinamit,
kan man jun ri niyuq'un richin, ni man jun chuqa' ri niya'on ta pa samaj.
8Rija' kan nibe-kela' nibe-kela' nuben' pa ruwi' taq juyu', chukanoxik ruq'os,
nukanola' k'a ronojel ruwech rex q'os, ri utz nutej rija'.
9Keri' chuqa' jun juyubel achij wákix, man nuya' ta ri' richin chi naya' pa samaj y yaruto' ta.
Chuqa' man ruk'ulun ta chire chi nik'oje' chuwa-jay richin niwa' y nuxlan ri chi'aq'a'.
10Kan man k'a yatikir ta naben chire ri chikop ri', richin chi naxim ri che' chirij ruwi' richin nujik' ri arado.
Ni man yatikir ta chuqa' naben chire chi tujik'a' ri samajibel rastra, richin chi nuben ri boloj ri nik'atzin.
11¿Kan nakuquba' kami ak'u'x rik'in ri chikop ri', roma janila ruchuq'a'?
¿Kan nakuquba' kami ak'u'x rik'in richin nuben ri asamaj más k'ayew?
12¿Y kan nakuquba' kami ak'u'x rik'in, chi rija' nitikir nuk'ol ri jalajoj ruwech atiko'n,
y toq ruch'ayon chik ri chiri' pan era, niberuyaka' kami kan pa k'ujay?
13¿Achike xbanon chire ri avestruz, chi kan rik'in kikoten nusiloj ri ruxik',
y chi ri cigueña, chi jebel ok nitzu'un ri ruxik' y jebel ok nuben ri pa kaq'iq'?
14Ri avestruz nuk'ot-qa ri sanayi', chiri' nok wi kan y xeri' numuq kan kiwi' ri rusaqmolo';
kan retaman chi ri rumeq'enal ri q'ij jari' ri nibanon richin chi e meq'en.
15Rija' kan retaman y kan kuqul ruk'u'x e ruya'on kan,
chi kan man jun chikop ri xtipa'e' ta pa kiwi' y yerupaxij kan.
16Rija' man nuk'ut ta ajowabel kik'in ri taq ral,
y nuben chike chi achi'el xa man taq ral ta.
Y man nuch'ob ta ri samaj ri xuben toq xeruya' kan ri rusaqmolo'.
17Yin ri Dios, kan keri' rubanik xinben chire ri avestruz,
man nim ta ri ruch'obonik, y man nim ta ri na'oj ri xinya' chire.
18Jak'a kan xinben chire chi toq niropop nibe richin nukol-el-ri',
nanin jebel, y stape' jun wineq ri ch'okol-el chirij kiej, kan man xtuq'i' ta.
19¿Ja kami rat Job, ri xbanon chi janila ruchuq'a' ri kiej?
¿O ja rat ri xawiqon rik'in ri rusumal-rij-ruwi', ri kan liq'-liq' nitzu'un?
20¿Ja kami rat ri at banayon chire ri kiej chi nitikir niropiyaj achi'el jun sak'?
¿O ja rat at banayon chire ri kiej, chi xa rik'in nuxupuj pa rutza'n, kan nikixibij-ki' ri winaqi'?
21¿Kan ja kami rat ri at banayon chire chi kan nuchoy ri ulew rik'in ri ruq'a', roma nikikot,
y k'ari' nel-el richin chi nibe k'a ri akuchi kichapon-ki' chi kamik ri achi'a'?
22Ri kiej kan man jun k'a chuwech, achi'el xa ta kan nitze'en chirij ri xibinri'il,
junanin napon ri chiri' y man nanimej ta pe roma yetziniloj ri espada.
23Man nuxibij ta ri' stape' niq'ajan beneq ri yakbel-ch'ab,
kan man nuxibij ta ri' roma yerepelun chuwa-q'ij ri kitza'n ri kum kokoj y nima'q kaqen.
24Rija' kan rik'in royowal nibakek nibe-kela' nibe-kela' nuben,
y kan man jun ta nik'oje-qa, royoben toq xtixupux ri ruk'a' karne'l.
25Y toq nixupux ri uk'a' ri', rija' kan nuxupuj k'a pa rutza'n;
y kan k'a nej ek'o-wi ri achi'a' ri achoq ik'in nibekibana-wi oyowal, rija' kan jari' nuna' yan.
Rija' kan niq'ax k'a chuwech ri ch'abel ri nibix chike ri achi'a' banoy oyowal.
26Job, ¿kan ja kami ri ana'oj rat ri banayon chire ri halcón chi nej nibe-wi chikaj,
y xaxe nurik'-el ri ruxik', jari' nuchop bey, richin nibe kere' pa xokon chire re ruwach'ulew?
27¿Kan roma kami ri ach'abel rat Job, toq ri kot kan nej-nej nijote-wi chikaj,
y kan k'a pa rutza'n nimalej taq juyu' nuben-wi rusok?
28Ri kot chiri' k'a pa kiwi' nima'q taq abej nik'oje-wi y chiri' niwer-wi ri chi'aq'a',
chiri' chutza'n taq abej nik'oje-wi, roma chiri' man jun k'a xtinaqo richin.
29Ri kot ja ri chiri' k'ulan nitzu'un-wi-pe, richin nukanoj ri chikop ri nrajo' nuchop y nutej,
ri runaq' taq ruwech rija' kan k'a nej k'a nitzu'un-wi.
30Ri kot kan chi'anin k'a nikimol-ki' akuchi k'o jun ch'akulaj kamineq richin yewa',
y ri taq alaji' kot ja ri kik' k'a ri nikijululej.
Currently Selected:
Job 39: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
