Job 36
36
Ri Elihú nich'on pa ruwi' ri nimalej taq rubanobal ri Dios
1Ri Elihú kan k'a nich'on na k'a rik'in ri Job y nubij:
2Kinakoch'o' chik juba', roma k'a k'o na ri ninwajo' nink'ut chawech chirij ri Dios,
kinawoyobej chik juba' roma k'a ninwajo' na ninbij ri nrajo' ri Dios chi nawetamaj.
3Yin kan xtink'ut k'a chawech ri janipe' etamabel ri k'o wik'in,
richin chi tawetamaj chi ri Dios ri banayon wichin, xaxe rija' ri choj.
4Y yin kan qitzij k'a ri yich'on, ri nuch'abel man jun q'oloj chupan,
roma yin re yich'on awik'in, kan ronojel etamabel ri ya'on-pe chuwe.
5Ri Dios kan janila nim, man rik'in ri' man yerumalij ta ri winaqi';
Rija' retaman ri achike nuben, roma janila nim rubanik ri ruchuq'a' ri retamabal.
6Rija' kan man nuya' ta q'ij chire ri maneq Dios chuwech, chi jebel nik'ase',
jak'a chire ri wineq ri nutej poqon', kan nuya' ri nik'atzin y ri k'o ruq'a' chire.
7Kan beneq k'a ruwech yeruchajij ri winaqi' ri choj kik'aslen,
kan yeruya-q'anej k'a kik'in ri rey ri ek'o pa taq kitz'uyubal,
y kan jantape' k'a nunimirisaj kiq'ij.
8Jak'a wi re winaqi' re' nikina' chi e ximil kiq'a-kaqen pa ruk'ayewal,
o nikina' chi e ximil roma ri tijoj-poqonal,
9jari' toq ri Dios xtuk'ut chikiwech, ri itzel taq kibanobal,
roma kan janila xkinimirisaj-q'anej-ki'.
10K'ari' xtujeq ri kak'axabal, richin chi nikik'ul ri rutzijol ri nuya' chike
y nubij chike chi titzolej-pe kik'u'x chire ri itzel taq kibanobal.
11Wi ri winaqi' ri' kan nikak'axaj ri nibix chike y kan nikisamajij ri Dios,
kan xkebe k'a pa jotol, chupan ri q'ij richin ri kik'aslen,
kan rik'in kikoten xtikiq'axaj-el ri kijuna' chuwech re ruwach'ulew.
12Jak'a wi man nikak'axaj ta ri rutzijol ri niya'ox chike,
roma ri' rije' xke'el-el chuwech re ruwach'ulew pa ruq'a' jun k'ayewalej kamik,
roma man xketamaj ta xek'ase' achi'el ri xbix chike.
13Ri winaqi' ri maneq Dios chikiwech, kan nitike' ri koyowal ri pa taq kánima,
y stape' ek'o pa ruk'ayewal, man nikik'utuj ta kito'ik chire ri Dios.
14Re winaqi' re' kan k'a e k'ajola' na yeken-el,
nikik'uaj jun k'ixbel k'aslen, achi'el xa ta e kachibil ri yeya'on ruq'ij jun dios rik'in ri kich'akul, y keri' yeken-el.
15Ri Dios kan nukusaj k'a ri tijoj-poqonal richin chi nukol ri wineq,
k'iy ruk'ayewal yeruya' pa rubey richin chi tik'astej y tutzu' ri akuchi k'o-wi.
16Y ri Dios xarukol-pe, rat Job, chupan ri ruk'ayewal ri akuchi xak'oje-wi,
xaruya' pa kikoten, y k'ari' xana' chi kan utz atk'o;
ri pa ruwi' ri a-mesa kan xenuk'e' ronojel ri xk'atzin chawe.
17Jak'a re wakami xa xq'at-tzij pan awi', roma ri ralal ri mak ri e abanalon.
18Kan tachajij k'a awi', richin chi man yapuaqix,
chuqa' man taya' q'ij chi man yatzaq pa ruq'a' ri beyomel.
19Man nach'ob chi roma ri araqoj-chi'ij, yatak'axex,
y chi ri aq'ij y ri awuchuq'a' xkarukol.
20Man tarayij chi nok yan pe ri aq'a' toq yechap ri tinamit, y ri winaqi' yek'is jumul.
21Rat xa tachajij-awi', richin man yatzolin ta chik chupan ri itzel banobel;
jak'a rat xa jare' ri acha'on chik y man ja ta ri yak'oje' pa tijoj-poqonal.
Ri Dios kan nim wi ri retamabal
22Ri Dios ja rija' ri tijonel ri más ruchuq'a' k'o,
kan man jun chik tijonel ri nitikir ta nujunamaj-ri' rik'in rija'.
23Kan man jun wi k'a ri nitikir ta nik'utu chuwech ri Dios ri achike ruk'amon chi nuben;
chuqa' kan man jun ri nitikir ta nibin chire: Re' xa man ja' ta rubanik xaben chire.
24Kan toqaqa k'a chi'ak'u'x rat chi nanimirisaj ruq'ij ri Dios, roma ri nima'q taq rubanobal,
kan achi'el ri kibanalon-pe ri wineq, ojer ri'.
25Konojel ri winaqi' kan kitz'eton k'a ri rusamaj ri rubanon ri Dios,
ri winaqi' kan nikitz'et-wi stape' ta k'a nej ri nikitz'et-apo ri rusamaj.
26Ri Dios kan nik'o ruwi' nim, y ri qach'obonik roj man nuq'i' ta nuch'ob ri rubanik rija',
ni man yojtikir ta niqach'ob akuchi tikerineq-pe ri ruk'aslen, ni ri janipe' chik rujuna' rija'.
27Ri Dios kan nuben chi niyakatej ri ruxla' ri ya' y nibek'oje-el chuwech ri kaj,
y toq ri sutz' ri' nikitunula-ki', jari' ri nok job.
28Ri sutz' ri' nuya-pe ya' y niqaqa-pe;
y ri job ri' kan nich'orin k'a niqaqa pa kiwi' konojel winaqi'.
29Kan man jun k'a wineq ri niq'ax ta chuwech ri nuben ri Dios, richin chi ri sutz' nibiyin chuwech ri kaj,
ni man jun wineq ri niq'ax ta chuwech, toq ri Dios nuben chi niq'ax ri ruch'abel ri koqolajay chupan ri kaj, ri akuchi k'o-wi rija'.
30Ri koyopa' ri nuben rija', kan nusaqirisaj ri ruwi' ri palou,
jak'a ri akuchi k'o-wi-qa ri ruxe' ri palou xa nik'oje' kan pa q'equ'm.
31Ri Dios rik'in ri nuteq-pe janila chi job, nuq'et-tzij pa kiwi' ri winaqi',
y rik'in chuqa' ri job yerutzuq ri winaqi' ri'.
32Rija' kan yerumoq'ej k'a ri koyopa' ri pa taq ruq'a'
k'ari' nuben chike chi keqaqa ri akuchi nubij-wi rija'.
33Ri koqolajay nuya' rutzijol chi peteneq jun nimalej kaq'iq'-job,
y ri chikopi' kan ketaman chi ri kaq'iq'-job noqaqa yan.
Currently Selected:
Job 36: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
