Job 34
34
Ri Elihú nubij chi ri Dios ronojel pa ruchojmilal ri nuben
1Ri Elihú xch'on chic y xubij:
2Tiwak'axaj k'a ri nuch'abel, rix aj-na'oj taq achi'a';
kan jebel k'a tiya' ixikin, rix ri kan k'o etamabel iwik'in.
3Achi'el ri qak'axabal kan nuya' wi kikojolil chikijujunal ri ch'abel,
keri' chuqa' ri qaq' kan nuya' kikojolil chikijujunal ri nitij.
4Wakami, kan ja roj k'a qojya'on rukojolil ri chojmilal,
kan qonojel k'a roj qojetaman ri rukojolil ri utz.
5Roma ri Job kan rubin k'a: Yin kan man jun mak nubanon,
ri Dios kan relesan k'a chuwe ri chojmilal.
6Stape' yin kan choj ri nuk'aslen, xa banon chuwe chi in jun tz'ukuy-tzij.
stape' kan maneq numak, re nusokotajik man nutz'apej ta ri' y yiruk'uaj pa kamik, nicha'.
7Man jun chik achin achi'el ri Job
roma rija' kan nitze'en chirij ri Dios.
8Rija' kan junan rubey ruk'uan kik'in ri winaqi' itzel taq kibanobal,
y junan nuben kik'in ri achi'a' e aj-maki'.
9Ri Job kan rubin k'a: Ri wineq xa man jun nuch'ek chi kan utz nuben chuwech ri Dios, chayineq.
10Roma ri' rix nowineq taq achi'a', kan kiniwak'axaj k'a:
Ri Dios kan man jun bey k'a xtuben ta jun itzel banobel;
ri Dios ri k'o ronojel uchuq'a' pa ruq'a' man jun bey xtuben ta jun banobel ri man pa ruchojmilal ta.
11Roma rija' kan nuya' rutojbalil chire ri wineq roma ri rubanik ri rusamaj,
kan nuben chuqa' chi niqaqa rutojbalil pa ruwi', ri ruk'amon chi nuk'ul roma ri rubanik ri ruk'aslen.
12Kan qetaman k'a ri' chi ri Dios kan man jun etzelal ri nuben ta,
ri Dios ri k'o ronojel uchuq'a' pa ruq'a' kan man jun bey k'a nuben ta ri xa man pa ruchojmilal ta.
13Kan chuxe' k'a rutzij ri Dios k'o-wi re ruwach'ulew,
y pa ruq'a' rija' k'o-wi ronojel ri nikiben ri ek'o chuwech.
14Roma ri' xa ta nipe pa ránima ri Dios
chi nuben chike ri winaqi' chi nroyoj-el ri kánima y nuq'et ri kaq'iq',
15xa kan konojel k'a pa jun bey yeken-el,
y konojel ri winaqi' ri', xa kan xke'ok chik ulew jun bey.
16Wi rat, Job, kan niq'ax chawech ronojel ri nubin-qa,
kan tawak'axaj k'a ri ch'aqa' chik ch'abel ri xtinbij chawe.
17Xa ta ri Dios man ta niqaqa chuwech ri utzilej ruchojmilal,
man ta nitikir ruk'uan jebel re ruwach'ulew rik'in utzilej q'atbel-tzij.
Y ¿achike roma toq rat naya' rejqal ri Dios ri kan choj nuben?
18Roma xaxe k'a ri Dios ri nitikir nibin chire jun q'atoy-tzij: Rat xa maneq awejqalen,
xaxe chuqa' rija' ri nitikir nibin chire jun wineq ri kan k'o ruq'ij: Rat xa at aj-mak.
19Chuwech rija' qonojel oj junan, man xaxe ta kik'in ri achi'a' e tata'al k'o-wi,
chuqa' man xaxe ta ri beyoma' ri yeruto', xa kan yeruto' chuqa' ri man jun k'o kik'in,
roma kan qonojel roj winaqi' kan ja ri ruq'a' rija' ri banayon qichin.
Ri ruq'atoj-tzij ri Dios
20Ri wineq xabachike k'a ramaj noqaqa ri kamik rik'in, rik'in juba' pa nik'aj-aq'a', o xabachike ri noqaqa chikij ri chi'aq'a' y xkek'is konojel,
ri winaqi' ri kan k'o janila uchuq'a' pa kiq'a' xa xkeken chuqa' y man ruq'a' ta wineq ri xtibano-el chike.
21Roma ri Dios kan rutzuliben k'a ri achike rubanik ruk'aslen ri wineq,
kan rutzuliben chuqa' chikijujunal ri ruxaka'l ri nuya' chuwech re ruwach'ulew.
22Ri ruchuq'a' ri ruwech ri Dios, kan maneq k'a q'equ'm ni muj chuwech,
roma ri' ri winaqi' ri e banoy taq etzelal kan man yetikir ta nikewaj-ki' chuwech.
23Ri Dios kan k'a man jani k'a tucha' jun q'ij richin nuq'et-tzij pa kiwi' ri aj-maki',
richin chi yebepa'e' chuwech y nuq'et-tzij pa kiwi'.
24Rija' kan man nuk'utuj ta na achike kibanik ri achi'a' ri k'o uchuq'a' pa kiq'a',
rija' k'a yerumututej y yerelesaj-el
y yeruch'okoba' chik kan ch'aqa' pa kik'exel.
25Roma rija' kan jebel-wi retaman ri achike ri yekiben rije';
chi'aq'a' toq nipe, yerelesaj-el, nuqasaj kiq'ij jumul y man yeq'alajin ta chik.
26Rija' kan nuya' k'a ruk'ayewal pa kiwi' ri itzel taq kibanobal
ri akuchi kan yetz'etetej koma konojel winaqi'.
27Ri Dios kan kere' k'a ri nuben chike, roma xa xkich'er kan ki' y man xkitzeqelibej ta chik rija',
roma man xkich'ob ta juba' rij ri ruchojmilal ri kik'aslen.
28Rije' kan man xekito' ta ri winaqi' ri man jun k'o kik'in y roma ri' ri koq'ej ri winaqi' ri' xapon k'a rik'in ri Dios;
y rija' kan xrak'axaj k'a ri koq'ej ri kan k'o nik'atzin chike.
29Wi ri Dios nik'oje' kan choj keri' y man jun nuben richin yeruto' ri winaqi', ¿k'o kami nitikir nich'ojin chire?
Wi ta nrewaj ruwech, ri winaqi' kan man jun chik xtito'on kichin.
Rija' kan rutz'uliben k'a stape' ta jun tinamit o xaxe jun wineq.
30Kan ja ri Dios ri nicha'on kichin ri q'atoy taq tzij,
y man nuya' ta kan jun ri maneq Dios chuwech.
richin chi man yeruya' pa k'ayew ri winaqi'.
Ri rubanik ri Job chuwech ri Elihú
31¿Abin kami rat chire ri Dios? Yin kan qajineq ruk'ayewal pa nuwi' roma ri numak,
y wakami k'a, kan xtintej nuq'ij richin chi man yimakun ta chik.
32Kan taq'alajirisaj k'a chinuwech ri numak, ri xa man ninna' ta chi nubanon,
y wi k'o itzel taq banobel ri e nubanon, kan man xtinben ta chik, at chayineq.
33Rat, Job, nawajo' chi ri Dios nuya' rutojbalil chawe achi'el ri nawajo' rat,
y rat xa man nawajo' ta nitzolin-pe ak'u'x.
Y roma kan ja rat ri nawajo' yabin ri achike ri nawajo', y man ja ta yin.
Tabij k'a pe chiqe ri nach'ob.
34Roma ri' rix achi'a' ri kan yixtikir niya' rukojolil ri niwak'axaj, kan tibij k'a chuwe,
rix ri ix aj-na'oj taq achi'a' kixch'on k'a pe y tibij pe chuwe,
35roma ri Job man rik'in ta etamabel nich'on,
ri ruch'abel xa nuq'alajirisaj chi rija' man nich'obon ta jebel.
36Kan k'atzinel chi nich'ob rij jebel chikijujunal ri ch'abel ri yerubij,
roma ri ch'abel ri yerubij, xa achi'el kichin ri achi'a' e aj-maki'.
37Roma rija' man xaxe ta k'a jun aj-mak, pa ruwi' ri', rija' kan yakatajineq chirij ri Dios,
kan chiqawech k'a roj nretzelaj y nitze'en chirij ri Dios,
kan janila nich'on y nich'ojin chire rija'.
Currently Selected:
Job 34: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
