Job 33
33
Ri Elihú nrajo' nupixabaj ri Job
1Jak'a re wakami, rat Job, kan ja ri ninnojij yin ri tawak'axaj.
Taya' k'a axikin chike chikijujunal ri tzij ri xtinbij chawe.
2Ri nuchi' kan royoben chik richin xtich'on-apo chawe,
ri nuch'abel kan k'o chik chutza'n waq', richin nel-apo ri ninwajo' ninbij.
3Ri nuch'abel yin kan xtuq'alajirisaj k'a chi choj ri wánima;
ri nuchi' yin kan ja ri qitzij ri xtuq'alajirisaj, kan xtubij k'a ronojel ri ninnojij.
4Ri Espíritu richin ri Dios jari' ri xbanon wichin yin;
ri Dios ri k'o ronojel uchuq'a' pa ruq'a', xuxupuj k'aslen wik'in yin.
5Wakami k'a, kan tak'uluba-pe ronojel ri xtink'utuj chawe, wi tikirel,
kan pa rucholajen k'a tabana' chire ri atzij, toq xtapaba-awi' chinuwech.
6Rat y yin kan oj junan k'a chuwech ri Dios,
roma yin chuqa' kan chupan ri ulew in elesan-wi-pe.
7Roma ri' kan maneq achike roma naxibij ta awi' chinuwech yin,
ni maneq nik'atzin-wi richin chi nach'ob chi yin kan xtinben chawe chi yak'oje' pa ruk'ayewal.
8Kan qitzij k'a ninbij chawe chi kan ja ri nuxikin yin ri ak'axayon ri abin,
rat kan kere' k'a ri abin:
9Yin kan ch'ajch'oj wi ri nuk'aslen y maneq mak ri e nubanalon;
yin kan ch'ajch'oj ri nuk'aslen y kan man jun etzelal wik'in.
10Man rik'in ri' ri Dios kan jantape' nril rubanik richin chi yiruya' pa tijoj-poqonal,
y rubanon chuwe chi in jun etzelanel richin.
11Kan rubanon chuwe chi k'ayew yibiyin ri pa nuk'aslen, achi'el e ruq'ataban ri waqen pa che' ri nibix cepo chire,
y kan naqaj k'o pe chuwe richin nutzu' ri achike rubanik ri nubinibal pa nuk'aslen, xacha'.
12Jak'a yin ninbij chawe chi ronojel k'a re xabij rat xa man utz ta;
roma ri wineq xa man jun ok ruq'ij y ri Dios kan janila nim.
13Achike na roma toq rat kan yach'ojin-q'anej chire ri rija',
xaxe roma man xuk'uluba' ta pe rik'in ri ach'ojinik ri naben chire.
Ri Dios nutijoj ri wineq rik'in q'axo'n
14Ri Elihú kan xubij chik k'a chire ri Job:
Ri Dios kan k'iy k'a rubanik richin nich'on qik'in;
xa jak'a roj winaqi' niqaben chi achi'el man chiqe ta roj nich'on-wi.
15K'o bey nich'on qik'in pan achik', o k'o nik'utumej chiqawech ri chi'aq'a',
k'o bey ja toq janila qawaran, y toq nipe-qa juba' qawaran.
16Ri Dios kan nich'on chuqa' pa ja's pa ruxikin ri wineq,
toq nubij chire ri achike nibebanatej, kan nipe k'a jun nimalej xibinri'il chire.
17Ri Dios nuben keri' richin nutzolij-pe ruk'u'x jun wineq chire ri itzel taq rubanobal,
richin chi man napon chupan ri nimirisanenri'il richin ri ránima.
18Richin chi man napon yan chupan ri jul richin kamineq,
y richin chi nukol chuwech ri kamik.
19Y ri Dios k'o bey nuqasaj ri wineq chuwa warabel richin nutijoj,
kan nuben chire chi jantape' yejulujut-yepaq'pot ri rubaqil,
20ri yabil ri' kan nuben chire chi man nurayij ta ruwech ri wey,
ri ránima kan man jun chik ruwech q'utun ri nurayij, ni ri más xqa' chuwech toq k'a utz na.
21Ri rutiojil eqal-eqal nik'is-qa,
y ri rubaqil ri xa man e q'alaj ta ri pa nabey, xa jari' ri más yebeq'alajin-pe.
22Ri ránima kan jari' ninaqajub-apo chire ri jul richin kamineq,
kan ninaqajub k'a apo chire ri kamik.
23Jak'a wi rija' k'o jun ángel chunaqaj richin nuto',
stape' xaxe ta jun chike ri pa 1,000 ri ek'o rik'in ri Dios,
kan nubij chire ri ruk'amon chi nuben.
24Ri ángel ri' kan xtubij k'a chire ri Dios chi tujoyowaj ruwech,
y man tuya' q'ij chi nibe chupan ri jul richin kamineq,
roma xa k'o chik ri nitikir nikolon richin chuwech ri kamik ri'.
25Xeri' ri ruch'akul kan xtok chik k'a achi'el ruch'akul jun ak'ual,
y kan xtik'oje' chik k'a ruchuq'a' achi'el toq kan k'a ala' na.
26Toq rija' xtich'on-el rik'in ri Dios, kan xtik'ul-wi jebel,
re' kan xtuben chire chi xtuya' ruq'ij ri Dios rik'in kikoten;
y ri Dios kan xtuben chire chi xtich'akon y xtikolotej chuwech ri kamik.
27K'ari' rija' xtapon kik'in ri ch'aqa' chik winaqi' y xtubij chike:
Yin kan man pa ruchojmilal ta xinben, xa xinyoj rubanik ri choj,
jak'a ri Dios man xuya' ta ruk'ayewal pa nuwi', achi'el ri ruk'amon.
28Pa ruk'exel ri' kan xirukol chuwech ri kamik,
y wakami k'a nintzu' na re saqil, xticha'.
29Ronojel re' nuben ri Dios rik'in ri wineq,
man xaxe ta jun bey o ka'i' mul, xa kan jantape' nuben kere'.
30Richin chi nukol ri ránima ri wineq y man napon ta pa jul richin kamineq,
richin nusaqirisaj rik'in ri saqil richin k'aslen.
31Wakami k'a, rat Job, xaxe k'a kinawak'axaj,
man k'a taq'et-pe re nutzij, roma kan k'a yich'on na.
32Jak'a wi kan k'o jun tzij ri kan ruk'amon chi nabij yan pe, kan xtinwak'axaj,
kach'on k'a, roma yin ninwajo' chi niq'alajin ri abanobal rat.
33Y wi xa man jun k'a ri nawajo' nabij, kinawak'axaj na,
man kach'on-pe y yin xtink'ut chawech achike rubanik naben richin nik'oje' ana'oj.
Currently Selected:
Job 33: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
